Yerimaiya 51
51
1Se Abọọñ atañ ado ami:
“Se, ami ñyaademme udọñ sịbidịd awo nsobo
mbaña Babilọn ye mbon Leb Kamai.
2Ami ñyaadọñ isenawo nnọ Babilọn,
nọ ekeñ anye nte mbio enyʌñ esobo isọñ amọ;
ammọ eyaetịmede anye ke afịd ndaha
ke usen afanekọñ amọ.
3Yak atobidañ akudʌt utịgha amọ,
me adibọbọ mbọbọekọñ amọ.
Ikiisʌhọ ñkparawa ammọ;
isobo mbon ekọñ amọ ataa afịd-afịd.
4Ammọ eyaeduọ enaa ekpañña ke Babilọn,
enaa ke mme efaak ye unan ñkpa.
5Sia Abasi, Abọọñ Andikponñkan,
ifreke Isrel ye Yuda,
akpesʌkado isọñ ammọ ayọhọke ye ndudue
ke isọ Adisana Abasi Isrel.
6“Ifeeñe ikpọñ Babilọn!
Ifeghe ke ntak uwem ndufo!
Ikiiyak isobo ndufo ke ntak ndiọiñkpọ amọ.
Ini usio usiene Abọọñ adikem;
anye ayaakpe anye utịb naña anye adot.
7Babilọn akedo kọọb kold ke ubọk Abọọñ;
anye amaanam ukọd anaam afịd ekondo.
Mme idịd emaenwọñ ukọd amọ;
ke ntoro idahami ammọ edamma.
8Babilọn ayaaduọ anyʌñ abomo adiwad-adiwad.
Itua ibaña anye!
Ibọ adan mfiọññọ ibaña ubiak amọ;
akemeido anye ayaabọ ukọk.
9“ ‘Ñnyịn ikpaikikọk Babilọn,
ado awo ikanna ikọk anye;
yak ñnyịn ikpọñ anye inyʌñ ikaa ke isọñ ñnyịn keedekeed,
sia ubiideikpe amọ awuọ ikpaanyọñ,
anye adọọk anyọñ anyọọñ nte mme hefịn.’
10“ ‘Abọọñ itoppo ñnyịn ikpe;
idi, yak ñnyịn itañ ke Saiyọn
se Abọọñ Abasi ñnyịn anam.’
11“Iban mme idañ,
iben mme atuekọñ!
Abọọñ amaademme iyadesịd ndidem mbon Med,
sia uduak amọ ado adisobo Babilọn.
Abọọñ ayaasio usiene,
usiene ke abaña tembịd amọ.
12Idịppe afọñidiọọñọ ibaña mme ndibene Babilọn!
Imaana idian mme awo inọ mbon ukpeme,
idaaha mbon ukpeme,
ibeeñe idem idịbe ibem!
Abọọñ ayaanam uduak amọ,
ewʌhọ amọ ke abaña mbon Babilọn.
13Ndufo mbon e-edʌññọ ekpere mme mmọọñ
enyʌñ emọinyọ ke mme inie,
utịd ndufo a-adi,
ini a-anaaha nte isobo ndufo.
14 Abọọñ Andikponñkan anwọñọ ke idem amọ:
Ke akpanikọ ami ñyaiyọhọ ndufo ye udịmekọñ, nte eboho uwak ñkukuñkpọyọriyọ,
ndin ammọ eyaesio ñkpo adikan ibaña ndufo.
15“Anye akenam ekondo ke adudu amọ;
anye aketọọñọ ederimbod ke aniọñ amọ,
anyʌñ adeet mme hefịn anịm ke mbufiọk amọ.
16Anye amaatop nte aduma, mme mmọọñ ke mme hefịn ekuun;
anye anam mme ntọñanyọñ edakka tọọñọ ke mme utịd ekondo.
Anye adọñ akebkeb nọ asaña ye edịm,
anyʌñ asio afịm ke mme ufọk ubonoñkpọ amọ.
17“Afịd awo enana ifiọk ye ikike;
afịd anamusọ kold abọ asuenne ato mme ubobodñkpọ amọ.
Mme ubobodñkpọ se anye anam edo mbiaña;
ibifịk ndomokeed isịneke ammọ ke idem.
18Ammọ edo ikpu-ikpu, mme ñkpọ ndọk;
ubiomikpe ammọ amaadi, ammọ eyaetak.
19Anye a-adooho Udeeme Yekọb ibaaha nte mbon ami,
sia anye ado Andinam afịd ñkpọ,
kpa ye mbon e-edooho udeeme amọ,
Abọọñ Andikponñkan ado anyịñ amọ.
20“Afo ado akpeti ekọñ mmi,
ñkpọ unwana ekọñ mmi;
ye afo ami mmesuan mme idịd,
ye afo ami mmesobo mme abioubọọñ,
21ye afo ami mmesuan enañmbakara ye andiwad,
ye afo ami mmesuan sariọd ye andiwad,
22ye afo ami mmesuan awodeen ye awonwaan,
ye afo ami mmesuan akaanadeen ye iwaad,
ye afo ami mmesuan akparawa ye abọikpa,
23ye afo ami mmesuan akpemeedọñ ye udịmedọñ
ye afo ami mmesuan atọinwañ ye abaakenañ,
ye afo ami mmesuan mme adaukara ye mme adaaha ukara.
24“Ke iso mfo ami ñyaasio Babilọn ye afịd mbon se idʌñ ke Babilọn usiene ke afịd ndiọi se ammọ ekenam ke Saiyọn,” Abọọñ atañ.
25“Ami mmetọhọ ye afo, afo ekamba abod nsobo,
ndufo e-esoboke afịd ekondo,”
Abọọñ atañ.
“Ami ñyaanyan ubọk mmi udot fiin ke idem,
uwere fiin ndooro ke mme anyọñ itiad,
ñnyʌñ nnam afo ado ekamba abod u-udịd amaakweeñe.
26Awo idiibenne mbai itiad mfo inam itiad inuuk,
me itiad ndomokeed inam itiad idakisọñ,
sia afo adiido anaan ke nsi-nsi,” Abọọñ atañ.
27“Idịppe afọñidiọọñọ ke anyọñ ke isọñ ami!
Ifịt adukpoñ ke atu mme idịd!
Ibeeñe mme idịd idem adinwana ekọñ ye anye;
ikoot mme abioubọọñ ami ediana keed ebaña anye:
Ararad, Mini ye Askenas.
Imek adaiso ekọñ ibaña anye;
idọñ mme enañmbakara nte udịm ñkukuñkpọyọriyọ.
28Ibeeñe mme idịd idem ekọñ adinwana ye anye,
ndidem mbon Med,
mme adaukara ammọ ye afịd mme adaaha ukara,
ye afịd mme abio se ammọ ekaara.
29Isọñ anyeñ anyʌñ amiañña,
sia mme uduak Abọọñ a-abañake Babilọn asọọñọ ada;
adisobo isọñ Babilọn
mbaak awo ndomokeed adidʌñ do.
30Mbon uko ekọñ Babilọn etre anwan;
ammọ eda ke mme ñkpọsọñ itie ammọ.
Udịd ammọ akweeñe;
ammọ ekappa edo mme idek.
Esịn ikañ ke mme itieidʌñ amọ;
ebʌñ mme ukwak inuaatob amọ.
31Asuanetob keed akeene mfen,
ndin isʌñutom akeene isʌñutom,
adisian adidem Babilọn mbo
ke emʌm afịd abio amọ,
32uboiyo inyañ atre,
esịn ikañ ke mme ndua,
ndin akpọsọñ ndịk anam mbon ekọñ.”
33Se Abọọñ Andikponñkan, Abasi Isrel atañ ado ami:
“Adiaha Babilọn aba nte afe ubeek abakpa
ke idaha e-esọnnọke anye;
ini adidọk anye ayaasọp adi.”
34“Nebukadnesa adidem Babilọn isobo ñnyịn,
anye itop ñnyịn asịn ke ndutịme,
anye inam ñnyịn ido ukpọk ikịm.
Nte akukubarakpa anye iben ñnyịn amen,
anyʌñ ayọhọ idịp amọ ye inem udia ñnyịn,
ndin anyʌñ ikọkkọ ñnyịn aduọọk.
35Mme andidʌñ ke Saiyọn ebo ete,
yak enam Babilọn ibak e-ekenamma ikpọkidem ñnyịn.”
Yeruselem abo,
“Yak iyiib ñnyịn adoro mbon e-edʌññọ ke Babilọn ke idem.”
36Ke ntoro se Abọọñ atañ ado ami:
“Se, ami ñyaanwana ekọñ iwuod mfo,
ñnyʌñ nsio usiene mfo;
ami ñyaanam akpainyañ amọ asat,
ñnyʌñ nnam idịm amọ asat.
37Babilọn adiido ebono itie mbio,
itie ndidia mme ewaikọd,
ñkpọ ndịk ye asuenne,
itie a-awo ndomokeed imiidʌññọ.
38Afịd mbon amọ ekuun nte mme ñyịn ekpe,
ammọ ekpọi nte nditọ ekpe.
39Ado ke idaha ammọ edịppeke idem,
ami ñyaanam usọrọ nnọ ammọ,
ñnyʌñ nnam ammọ ekpa mmịn,
nọ ammọ ebọọñ ñkpo ye imam,
ndin edaiya ke nsi-nsi, idemmeke aba,”
Abọọñ atañ.
40“Ami ñyaasuuhọ ammọ nnịm ke isọñ
nte mme edọñ ke itie ubakunam,
nte akukịmedọñ ye mme ebod.
41“Naña ediimʌm Sesak,
emʌm ñkpooninua afịd ekondo!
Die ke ñwuudo Babilọn adiiba,
ke iso afịd mme idịd!
42Akpainyañ ayaadakka afʌk Babilọn;
mbufịd akpa amọ ayaafʌk anye.
43Mme abio amọ eyaenaa ukpọk,
nsaad isọñ ye akpautatan,
isọñ a-awo ndomokeed imiidʌññọ,
awo ndomokeed imiinyʌññọ isaña ke anye iboiyo.
44Ami ñyaamia Bel ufen ke Babilọn,
ñnyʌñ nnam anye akọkkọ se anye akemen.
Mme idịd idiinyʌkkọke aba ke atutu ibịne anye.
Ndin ndibene Babilọn ayaaduọ.
45“Ikọd mmi, iwuọ idi ikpọñ anye!
Ifeeñe iyem uwem ndufo!
Ifeeñe ibọkkọ ufiob iyadesịd Abọọñ.
46Ikiiduọọk idodanyen, ikiinyʌñ ikop ndịk
ke ini ekoppo etob ke abio;
mbʌk keed adi isua ami, mfen adi isua mfen,
mbʌk afai ke isọñ
ye ake adaukara a-anwanake ye adaukara.
47Sia, ke akpanikọ, ini ado ayaadi
a-ami ndiimia mme ubobodñkpọ Babilọn ufen;
eyaesuenne afịd isọñ amọ
ndin afịd mbon amọ se ewot eyaenaa ke esịd ammọ.
48Ndin hefịn ye ekondo ye afịd se idọñọ ke esịd ammọ
eyaesio ñkpo idaara ebaña Babilọn,
sia ayaato ke adoro
mme andisobo eyaenwana ye anye,”
Abọọñ atañ.
49“Babilọn ana aduọ ke ntak mbon Isrel e-ekewotto,
ukem naña mbon ewotto ke afịd ekondo
eduọ ato ke ntak Babilọn.
50Ndufo mbon e-ekebọkkọke akañkañ,
inyọñ ikiinyʌñ ida ibiat ini!
Itoiyo Abọọñ ke idịd anyan usʌñ,
inyʌñ itoiyo Yeruselem ke akikere ndufo.”
51“I-isuenne ñnyịn,
sia i-isọñ ñnyịn anyen
ndin abuud i-ifʌk ñnyịn iso,
sia mme isenawo emaedʌk
ndisana itie ufọk Abọọñ.”
52“Ado mme usen esʌk edi,” Abọọñ atañ,
“a-ami ndiimia mme ubobodñkpọ amọ ufen,
ndin ke afịd isọñ amọ
mbon edatta unan eyaemịm.
53Akpekọm Babilọn adọọk aka ke mme hefịn,
anyʌñ asọọñọ mme akpọsọñ itie amọ,
ami ñyaadọñ mme andisobo nnọ anye,”
Abọọñ atañ.
54“Uyom ayịd ato Babilọn adi,
uyom akwa nsobo
ato ke isọñ mbon Babilọn.
55 Abọọñ ayaasobo Babilọn;
anye ayaanịme akpọsọñ uyom amọ.
Ayobio mbon usua ayaafịt adi nte akpọsọñ mmọọñ;
mme ñkpoyo uyio ammọ eyaemaana efịt.
56Andisobo ayaadi abịne Babilọn;
eyaemʌm mbon ekọñ amọ,
ndin eyaebuñ mme utịgha ammọ.
Sia Abọọñ ado Abasi usiene;
anye ayaakpe utịb ayọhọ-ayọhọ.
57Ami ñyaanam mme adaaha amọ ye ideen aniọñ ekpa mmịn,
mme adaukara, adaaha ye mbonekọñ amọ ñko;
ammọ eyaedaiya ke nsi-nsi inyʌññọ idemme aba,”
Adidem, a-anyịñ amọ adooho Abọọñ Andikponñkan abo.
58Se Abọọñ Andikponñkan atañ ado ami:
“Eyaenịm ikpọ ndibene Babilọn ke isọñ,
eyaenyʌñ esịn ikañ ke mme anyan inuaatob amọ;
mbon awo etọọñ idem ammọ ke se imiibaaha ufọn,
ñwaidem mme idịd ado ifia anọ edemeikañ.”
59Ami ado etob a-prọfed Yerimaiya akenọọhọ akpan ayịnufọk Seraiya ayịn Neria, ayịn Maseiya, ke ini anye akekaaha Babilọn ye Sedekaiya adidem Yuda ke ayọhọ isua inaañ ke ukara amọ. 60Yerimaiya amaawet ke ikpañwed abaña afịd mme ñkpọ se idiitịppe inọ Babilọn, afịd se ekewet ebaña Babilọn. 61Ndin Yerimaiya amaabo Seraiya ate, “Afo amaakewuọ Babilọn, kịt bo ke afo amekoot afịd mme ikọ ami ke akpọsọñ uyio. 62Ndin bo, ‘Abọọñ, afo amebo ke imọ iyaisobo abio ami, mbaak mme awo me unam edidʌñ ke esịd amọ; anye adiina ukpọk ke nsi-nsi.’ 63Afo umaukoot ikpañwed ami uma, tobo anye ke itiad nyʌñ top anye sịn ke inyañ Yufretis. 64Ndin bo, ‘Kpa ukem ami ke Babilọn adiiduọ, inyʌññọ idakka ida aba ato ke nsobo a-ami ndiiben ndot anye ke idem. Ñko mbon amọ eyaeduọ.’ ”
Mme ikọ Yerimaiya etre mmi.
Currently Selected:
Yerimaiya 51: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
