Yerimaiya 48
48
Etob A-abañake Mọb
1Se ibaña Mọb:
Se Abọọñ Andikponñkan, Abasi Isrel atañ ado ami:
“Adọdiọọk anọ Nebo, sia anye ayaakịt ñwuudo.
Eyaesuenne Kiriataim enyʌñ emʌm anye;
eyaesuenne mme ñkpọsọñ itie enyʌñ esuan ammọ.
2Awo idiitooroke Mọb aba;
ke Hesbọn mbon awo eyaeduak iduọ amọ:
‘Idi, yak ñnyịn ikọọk iwuod ibaña iduọ idịd ado.’
Ndufo, mbon abio Madmen, eyaeba ñko ke ndobuyio;
akañkañ ayaibịne ndufo.
3Ntuaña ayịd ntaeded awuọ ato Horonaim,
ntuaña ayịd ekamba afanekọñ ye nsobo.
4Eyaebuuñ Mọb;
ntək nditọ ammọ eyaetua.
5Ammọ eyaekaa ke abod Luhid,
etua ndod-ndod ayịd naña ammọ esañake eka;
ke usʌñ a-akaaha Horonaim
eyaekop akpọsọñ ntuaña ayịd, ntaeded ebaña nsobo.
6Ifeeñe! Ifeeñe ke ntak uwem ndufo;
iba nte ikọd ke akpautatan.
7Sia ndufo ebuọttọ idem ke mme adinam ye inie ndufo,
eyaiben ndufo ñko nte ifʌn,
ndin eyaeben Kemos enyọñ nte ifʌn,
dian ye mme aku ye mme adaaha amọ.
8Andisobo ayaadi abịne afịd mme abio,
ibaaha abio ndomokeed se idiibọkkọ.
Nsobo ayaasịm abedeñ
ndin eyaesobo mme ikpọabod,
sia Abọọñ atañ.
9Isịn inʌñ ke Mọb,
sia eyaenịm anye nsobo;
mme abio amọ eyaenaa ukpọk,
ibaaha awo ndomokeed se idʌñ ke esịd.
10“Isuuñọ anie awo akeedodo a-akoppo ifu adinam utom Abọọñ!
Isuuñọ anie awo akeedodo a-adịppe akañkañ ammọ mbaak uduọkiyiib!
11“Mọb aba ke emem tọọñọ ke uyịn,
nte ukọd asʌhọke ke ntak amọ,
awo inwaññake ito ikịm keed isịn ke mfen,
anye ikaaha ikidʌñ ke asen idịd.
Ke ntoro anye anem inua naña akesʌk aba,
ndin inem ufịk amọ ikpʌhọke.
12Ado mme usen esʌk edi,” Abọọñ atañ,
“idaha se ami ndiidọñ ideen e-etọkkọke ukọd eto mme abañ ukọd,
ndin ammọ eyaeduọk anye;
ammọ eyaenịm abañ ukọd amọ ukpọk
enyʌñ eboom mme ikịm amọ.
13Ndin Mọb ayaakop abuud abaña Kemos,
kpa naña Isrel akekop abuud
idaha a-ammọ ekebuọttọ idem ye Beteel.
14“Die ke ndufo ekeme edibo, ‘Ñnyịn ido mbon uko,
ideen se isọñ adudu ke ekọñ’?
15Eyaesobo Mọb, enyʌñ edọñọ mme abio amọ;
mme akobidem ñkparawa amọ eyaeduọññọ ke afịd,”
Adidem atañ, a-anyịñ amọ adooho Abọọñ Andikponñkan.
16“Iduọ Mọb akpere;
afanekọñ amọ ayaadi usọp-usọp.
17Itua ibaña anye, afịd ndufo e-edʌññọ ekpere anye,
afịd mbon e-ediọọñọke etob amọ;
ibo, ‘Enam die ebuuñ akpọsọñ esañ,
enam die ebuuñ esañ ubọọñ!’
18“Isọiyọ ke itie ubọọñ ndufo idi,
inyʌñ itie ke nsaad isọñ,
ndufo mbon e-edʌññọ ke Adiaha Dibon,
sia anye a-asoboke Mọb
ayaadi ibịne ndufo
anyʌñ abiat ñkpọsọñ abio ndufo.
19Ida ke usʌñ inyʌñ ise,
ndufo e-edʌññọ ke Arowa.
Ibịp awodeen a-afegheke inyʌñ ibịp awonwaan a-abọkkọke,
ibịp ammọ, ‘Nsoo itịppe?’
20Esuenne Mọb, sia emaesuan anye.
Isio ñkpo ayịd inyʌñ itua!
Isian etob ke Anọn
ibo ke esobo Mọb.
21Ubiereikpe adi anọ mbara-mbara abod,
anọ Holon, Yasa ye Mefaad,
22anọ Dibon, Nebo ye Bed Diblataim,
23anọ Kiriataim, Bed-Kamul ye Bed-Mọọn,
24anọ Keriọd ye Bosra,
tutu afịd mme abio Mọb, ke anyan ye ñkpere.
25E-ekpịkke nnʌk Mọb esio;
e-ebuuñ anye ubọk,”
Abọọñ atañ.
26“Nam ukọd anaam anye,
sia anye asọñ iwoud ye Abọọñ.
Yak Mọb anyịne ke akikọi amọ;
yak anye ado ñkpọ nsaha.
27Nte Isrel ikidooho ñkpọ nsaha ndufo?
Nte ekemʌm anye ke atu mme inọ,
nọ ndufo efuuñ iwuod ndufo ke ndọk
ini akeedodo a-ndufo etañña ikọ ebaña anye?
28Ifeghe ikpọñ abio ndufo, inyʌñ idʌñ ke mme abaitiad,
ndufo mbon e-edʌññọ ke Mọb.
Iba nte ibiom a-abọppọ efọk amọ
ke inua abaitiad.
29“Ñnyịn imikop ibaña ntañidem Mọb,
ñkokkoidem amọ akpon die!
Usọñanyen amọ, ntañidem amọ, ñkịdidem amọ
ye ntañidem esịd amọ.
30Ami mmediọọñọ ke usọñanyen amọ ibaaha ufọn,” Abọọñ atañ,
“ñko ñkpoon inua amọ idatta ufọn ndomokeed idi.
31Ke ntoro ami mmetua mbaña Mọb,
mmetua mbaña afịd Mọb,
ami mmefʌhọ mbaña mbon Kii Haresed.
32Ami mmetua ibaña ndufo, naña Yasa atua,
ndufo mme fain Sibma.
Mme ñkọk ndufo etara ekewuọ mben akpainyañ;
ammọ emaetara tutu ekewuọ ukañ Yasa.
Andisobo amaaduọ
adʌk mfịd ye mme kreb mfo emaekedat.
33Idaara ye inemesịd enyọñ
ke inwañ mfịd ye mme inwañ Mọb.
Ami mmetre ukọd adiwuọ ke mme ñkpọ unyịmme ukọd;
awo ndomokeed isọnnọke ammọ aba ye ñkpo idaara.
Akpesʌkado ñkpo abaha,
ado idooho ñkpo idaara.
34“Uyio ayịd ammọ adọọk
atọọñọ ke Hesbọn akewuọ Eliele ye Yahas,
atọọñọ ke Soa anyọọñ akewuọ Horonaim ye Eklad Selisiya,
sia mme mmọọñ Nimrim emaesaat.
35Ke Mọb ami ñyaatre
mbon e-enamma mme uwa ke mme ñkoñ-ñkoñ itie,
enyʌñ efọp insensi enọ mme abasi ammọ,” Abọọñ atañ.
36“Ke ntoro esịd mmi aseeme abaña Mọb nte ikwọ e-efịtte ke adʌk;
anye aseeme nte adʌk abaña mbon Kii Haresed.
Mme inie se ammọ ekekọọk ebono atahade.
37Emaekwaat afịd iwuod,
enyʌñ efat afịd ñwaebek esio;
emaekpịkke afịd ubọk,
enyʌñ efʌk afịd isịn ke afọñikpo.
38Ke afịd mme akọmufọk ke Mọb
ye ke mme afe idʌñ
ibaaha ñkpọ ndomokeed mfen ikan mfʌhọ,
sia ami mmebom Mọb
nte abañ a-awo ndomokeed imiiyemme,” Abọọñ atañ.
39“Kase naña anye asuana! Kase naña ammọ etuaha!
Kase naña Mọb akanna edem amọ ke abuud!
Mọb akappa ado ñkpọ ndọk,
ñkpọ akpọsọñ ndịk anọ afịd mbon e-edʌññọ ekpere anye.”
40Se Abọọñ atañ ado ami:
“Se! Ntrukpuum asʌk asọiyọ adi,
ataat mba amọ afʌk Mọb.
41Eyaedat Keriọd
enyʌñ eben ñkpọsọñ itie.
Ke usen ado esịd mbon uko Mọb
adiiba nte esịd awonwaan a-abaaha ke ubiakuman.
42Eyaesobo Mọb nte idịd
sia anye amaasọñ iwuod ye Abọọñ.
43Akpọsọñ ndịk ye ube ye afia eda ibet ndufo,
ndufo mbon Mọb,”
Abọọñ atañ.
44“Awo akeedodo a-afegheke akpọñ afai ami,
ayaaduọ adʌk ube,
awo akeedodo adọọhọ awuọ ke ube,
afia ayaamʌm anye;
sia ami ñyaaben isua ufen amọ
ndot Mọb,”
Abọọñ atañ.
45“Ke mfuud Hesbọn
mbon itọk ñkpakọb eda inieghe udịd,
sia ikañ amaato Hesbọn awuọ,
ikañ ato ufọọd Sihọn asak awuọ;
anye ata mme ekoiso Mọb,
mme ñkpọkpọrọ mbon uyom ukpọinua.
46Mọb, adọdiọọk unọ fiin!
Esobo mbon Kemos;
ekoono nditọ ideen mfo ekaa asen idịd
enyʌñ ekoono nditọ ibaan mfo nte ifʌn.
47“Kpayeado ami ñyaatịmme ndịppe mfọnọñkpọ Mọb
ke mme usen ini iso,”
Abọọñ atañ.
Ubiereikpe Mọb akweeñe mi.
Currently Selected:
Yerimaiya 48: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
