Ñwed Mbon Kalesia 5

Ñkpọkñyak ke Krais

1Ke ntak adinam ñnyịn ido mme nditọ amanaisọñ ke Krais akisịññe ñnyịn ke ufʌn. Isọọñọ ida, ndin, ikiimaana iben akpọnọ ufʌn ikọñọ.

2Iwet ikọ mmi inịm! Ami, Pọọl, mbo ke imaiyak ifọọrọ ndufo edʌd, Krais idiibaaha ufọn ndomokeed inọ ndufo aba. 3Mmemaana ntañ, awo a-ayaaha idem amọ anọ yak efọọrọ edʌd ana anịm afịd mbed. 4Emaidiañña ndufo e-enwanake adibọ utoppo ikpe nto mbed ekpọñ Krais; ndufo emewuọ ekpọñ mfọn Abasi. 5Sia ato ke Sịbidịd ye ke mbuọdidem ke ñnyịn itie ibet adinenido a-ñnyịn idotto anyen. 6Sia ke Krais Yisọs adifọọrọ edʌd me aditre adifọọrọ edʌd iwuọñọke ñkpọ ndomokeed. Ñkukweeñe ñkpọ a-abaaha ufọn, ado mbuọdidem a-awọttọ idem ke ima.

7Ndufo ekefeghe eti itọk. Anie awo ikikpịkke ndufo iso ibo ikiinam se ido akpanikọ? 8Utọ ndukpek ado itooho anye i-ikoodo ndufo. 9“Etək yiis asinam afịd eboho uyo atịt.” 10Ami mmenekke nnie isọñesịd ke Abọọñ mbo, ke ndufo idiikereke ke usʌñ mfen. Awo akeedodo i-itoppo ndufo asịn ke ndutịme ayaabọ ufen. 11Nditọeka ke Krais, adieke adooho ami nsʌk ñkwọrọ ufọọrọ edʌd, ntak e-esʌkkọ eñkọbọ miin-e? Ke ntoro e-eben ndudue a-atooho krọs efep. 12Amaado mme andisịn ndutịme, ami ñkpaama ammọ ekpok idem ammọ ke ikwa akan ufọọrọ edʌd kpọd!

Uwem ke Sịbidịd

13Ekikoot ndufo, nditọeka ke Krais, ebo ewuọñọ ke ufʌn. Ado ikiiyak uwuọufʌn ndufo anam nọ ndufo edʌk enyịne ke utom abʌkidem; utu ke ado, inam ñkpọ inọ emọ-emọ ke nsuukidem ye ima. 14Sia afịd mbed akọñọ ke mbed keed ami kpọd: “Ma mbọhọidʌñ mfo nte idem mfo.” 15Adieke ndufo ekaaha iso ke adidom ñnyʌñ nta emọ-emọ, ikpeme, miidooho ntoro ndufo eyaesobo emọ-emọ.

16Ke ntoro, ami ibo ndufo, isaña ke Sịbidịd, ndin ndufo idiinọọhọ mme udọñ abʌkidem uyʌkkọ. 17Sia abʌkidem ayem se Sịbidịd imiimaaha, ndin Sịbidịd inyʌññọ iwʌrọ se abʌkidem ama. Naña ammọ iba enwanwana ye idem ammọ, ke ntoro afo ukanna unam se akpeyem adinam. 18Ado adieke Sịbidịd udatta fiin usʌñ, afo ubaaha ke idak mbed.

19Mme utom abʌkidem ewuọñọ eda anwa-anwa: Use, efịbe, ndedeghe uwem, akpọsọñ udia uwem; 20ukpono ndem ye ifọd; usua, ntịme, ufịb, akpọsọñ ifiobesịd, idiọọk udọñ, unana ndukoppo, ubakka 21ye isịnanyen, ukpa mmịn, akpọsọñ udia uwem ye mme ndiọi uwem mfen. Ami mmetañ inọ ndufo nte mmaaketatañ ke mbon e-eduuho utọ uwem ami idiidʌkkọ abioubọọñ Abasi.

22Ado mfịd Sịbidịd ado ima, idadesịd, emem, ime, mfọnido, eti uwem, mbuọdidem, 23ifuuro-ifuuro ido ye mfadidem. Mbed ndomokeed ibiọọñọke mme ñkpọ ntoro. 24Mbon e-ebaaha ke Krais Yisọs emaekọñ abʌkidem ye afịd nduwʌrọ ye idiọọk itọñ ammọ ke krọs. 25Sia ñnyịn iduuho ke Sịbidịd, yak ñnyịn isaña ke Sịbidịd. 26Yak ñnyịn ikiikịt idem, inam esịd ayat emọ-emọ inyʌñ inie ufịb ye emọ-emọ awo.

Currently Selected:

Ñwed Mbon Kalesia 5: ICB

Highlight

Copy

Compare