Ñwed Mbon Kalesia 6
6
Adinam se Ifọn Nnọọ Afịd Awo
1Nditọeka ke Krais, adieke emʌmmọ awo ke idiọọkñkpọ, ndufo e-esʌkkọ eba ke Sịbidịd akpena ebenne anye edot ke itie amọ. Ado, ndufo ke idem ndufo ikpeme, miidooho ndufo ñko emekeme edinyʌñ ndʌk idomo. 2Ibiom mbiomo emọ-emọ, ndin ke utọ usʌñ ami eyaenam mbed Krais ayọhọ-ayọhọ. 3Adieke awo ndomokeed akereke ke imọ iminie se ido, ke ini anye miidooho ñkpọ ndomokeed, anye abiaña idem amọ. 4Akpena awo keedekeed adomo adinam amọ ase. Ndin ammọ ekeme adikokko idem, ibenne idem ammọ ikidomo ye mbon mfen, 5sia ana awo keedekeed abiom mbiomo amọ. 6Kpayeado, awo a-abọọhọ ukpeeb ke ikọ Abasi ana awana afịd nti ñkpọ ye mme andikpeeb anye.
7Ikiiyak awo ibiaña ndufo, awo ikemeke adikama Abasi ntọ ndọk. Se awo atọ, kpa ado ke adọk. 8Awo atọọhọ asịn ke inemesịd abʌkidem, ayaadọk nsobo ato abʌkidem; anye atọọhọ asịn ke inemesịd Sịbidịd, ayaadọk nsi-nsi uwem ato Sịbidịd. 9Yak ñnyịn ikuukpa mba ke adinam eti ñkpọ, sia ini amaakem iyaidọk mfịd nti utom ñnyịn, adieke ñnyịn isọọñọke ida ikisịm utịd. 10Ke ntoro, naña ñnyịn ikpikakan yak inam se ifọn inọ afịd awo, akpan-akpan mbon e-esịneke ke ubon mbon e-enịmme ke akpanikọ.
Adimana Ufa A-akpon Akan Adifọọrọ Edʌd
11Ise utọ ñkpoon abiisi a-ami ñkamake iwet ndufo ñwedetob ke ubọk mmi!
12Mbon e-eyemme adinam utom anyen awo ke abʌkidem enwana adinam ndufo efọọrọ edʌd. Ukweeñe ntak a-ammọ enamma ami ado nọ ebọkkọ ndutʌhọ ke ntak krọs Krais. 13Idooho nte ebo ke mbon e-efọọrọke edʌd enịm mbed, kpayeado ammọ eyem ndufo efọọrọ edʌd nọ ato do ammọ enam inua ebaña ikpọkidem ndufo. 14Abasi idiiyakka ami nnam inua ibọhọke ke krọs Abọọñ ñnyịn Yisọs Krais, a-atooho ke anye ekọñ ederimbod ke idem mmi, enyʌñ eñkọñ miin ke abaña ederimbod. 15Adifọọrọ edʌd me aditre adifọọrọ edʌd iwuọñọke ñkpọ ndomokeed; ukweeñe se iwuọñọ ñkpọ ado adimana ndʌk ufa uwem. 16Yak emem ye mbọm asịm afịd mbon e-ekeeneke mbed ami, kpa Isrel ake Abasi.
17Tọọñọ ke idahami kaa iso, ke awo ndomokeed amfịna miin aba, sia ami ñkama mme idiọọñọ mbọn Yisọs ke idem mmi.
18Nditọeka mmi ke Krais, yak mfọn Abọọñ ñnyịn Yisọs Krais aba ye sịbidịd ndufo. Amen.
Currently Selected:
Ñwed Mbon Kalesia 6: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
