Ñwed Mbon Kalesia 4

Ndufo Edo Nditọ Abasi

1Se ami ntañ ado ke ini adiaakpa asʌkkọ ado etəkayịn, anye aba nte afʌn, akpesʌkado a-anye anieghe afịd se ete akekpa akpọñ. 2Ana anye asịne ke idak ukara ye andikama anye ye mbon se ekeyaak afịd ñkpọ esịn ke ubọk tutu ini se ete amọ akenịm adikem. 3Kpa ntoro ñko, ke idaha a-ñnyịn ikidoññoke ntəkayịn, ikibañña ke ufʌn ke idak mme sịbidịd mbed ukara ederimbod. 4Ado ke ini amaakedikem ayọhọ-ayọhọ, Abasi amaadọñ Ayịn amọ a-akemanake ato awonwaan, amana ke idak mbed, 5nọ adifakka mbon e-ebaaha ke idak mbed, nọ ñnyịn ikan ibọ ayọhọ unen nditọ. 6Sia ndufo edoññoke nditọ, Abasi amaasịn Sịbidịd Ayịn ke esịd, Sịbidịd a-asioho uyio akoot “Abba,#4:6 Abba awuọñọ ete ke usem Aramaik Ete.” 7Ke ntoro, afo udooho aba afʌn, ado Ayịn, ndin sia afo adooho Ayịn, Abasi unam fiin ado adiaakpa ñko.

Pọọl a-Anie Eyịghe Abaña Mbon Kalesia

8Ke mme usen edem, ke ini a-ndufo imiikidiọọñọke Abasi, ndufo ekedoñño ifʌn enọ mme ñkpọ i-imiidoññoke abasi. 9Ado idahami, a-ndufo ediọọñọke Abasi, ke adinekke ntañ, akap ado Abasi idiọọñọ ndufo, nsoo inam nọ ndufo ekanna edem emaana ebịne mme ntək sịbidịd ye mme ubonoñkpọ adudu i-imiiwuọñọke ñkpọ ndomokeed? Nte ndufo eyem ammọ emaana isịn ndufo ke ufʌn? 10Ndufo esʌk enaanam mme ndutʌm e-ebañake mme asaña-asana usen, mme afiọñ, mme ini ye mme isua. 11Ndịk annam miin ibaña ndufo, sia adiba nte afịd ufen mmi ke idem ndufo ababaha.

12Nditọeka ke Krais, ami mmikpe ndufo ubọk, ikappa iba nte ami, sia ami mmaakappa mba nte ndufo. Ndufo ikinnamma miin idiọọkñkpọ. 13Nte ndufo ediọọñọke, aketo ke ntak udọñọ ikpọkidem ke ami ñkebemiso ñkwọrọ ikọ inọọ ndufo ke akpa ifed. 14Akpesʌkado u-udọñọ mmi akedooho ñkpọ idomo inọọ ndufo, ndufo ikiinsọọnọ miin, utu ke ado, emaedaara adidi mmi nte ñkedo enyere Abasi, me Krais Yisọs ke idem amọ. 15Inemesịd a-ndufo ekenieghe ennọ miin aba mọọ idahami? Ami mmekeme itie ntiense mbo ke ndufo ekpaekekappa anyen ndufo esio ennọ miin, adieke ekpekekanna enam ntoro. 16Nte ami mmekappa ndo asua ndufo ke edidọkkọ ndufo akpanikọ?

17Mbon e-ekwọrọke nsu-nsu etob inọọ ndufo esịn ifịk nọ ato do idʌt ndufo enọ idem ammọ, ado idooho ke eti. Se ammọ eyem ado adidiañña ndufo ikpọñ ñnyịn, nọ ato do ndufo eyaak idem ndufo afịd-afịd enọ ammọ. 18Anekke afọn adisịn ifịk afịd-afịd ini, adieke adooho ke eti ntak, ñnyʌñ nnam ntoro afịd-afịd ini, idooho ke ini ami mbaaha ye ndufo kpọd. 19Ndima nditọ mmi, a-ami nsʌkkọ mba ke ubiak uman nnọ tutu Krais aboiyo adʌk esịd ndufo, 20ubaha nte ami ñkpebaaha ye ndufo idahami ñnyʌñ ñkpʌhọ uyio mmi, sia idem a-anekke añkpa miin ibaña ndufo.

Haka ye Sera

21Indọkọ miin, ndufo e-eyemme adiba ke idak mbed, ndufo idiọọñọke se mbed atañ? 22Sia e-ewet ebo ke Ebraham akenie nditọ ideen iba, keed akemana ato afʌn awonwaan, anye ako akemana ato amanaisọñ awonwaan. 23Ayịn a-afʌn awonwaan akemana akeene usʌñ abʌkidem; ado ayịn a-aketooho amanaisọñ awonwaan akemana akeene enwọñọ Abasi.

24Edat mme ñkpọ ami nte ñke, sia mme ibaan ami eda enọ edioomo iba. Edioomo keed ato Abod Sainai anyʌñ aman nditọ e-ediidoñño ifʌn: Anye ami ado Haka. 25Ndin Haka ada anọ Abod Sainai ke Arebia a-anyʌññọ aba nte abio Yeruselem abio mfịn, sia anye asịne ke ufʌn ye nditọ amọ. 26Ado Yeruselem a-abaaha ke anyọñ idooho afʌn, ndin anye ado eka ñnyịn. 27Sia e-ewewet:

“Nem esịd, awonwaan ada,

afo a-adooho kpaanam umanna ayịn:

Sio ñkpo idaara nyʌñ bọñ ke akpọsọñ uyio;

afo a-adooho kpaanam ukoppo ubiak uman;

sia nditọ ikpọọñ awonwaan

ewak ekan nditọ adọ ebe.”

28Idahami ndufo, nditọeka mmi ke Krais, kpa nte Aisik, ndufo edoñño nditọ enwọñọ. 29Ke ini ado ayịn a-akemanake ato abʌkidem amaatʌkkọ ayịn a-akemanake ato adudu Sịbidịd. Asʌk ado ntoro tutu idahami. 30Ado nsoo ke ñwed Abasi atañ? “Bịne afʌn awonwaan ado ye ayịn amọ sio, sia ayịn afʌn awonwaan ado idiiwanake ke udeeme ñkpọ adiaakpa ye ayịn amanaisọñ awonwaan.” 31Ke ntoro, nditọeka ke Krais, ñnyịn idooho nditọ afʌn awonwaan, ido nditọ amanaisọñ awonwaan.

Currently Selected:

Ñwed Mbon Kalesia 4: ICB

Highlight

Copy

Compare