Ñwed Mbon Kalesia 3

Mbuọdidem me Utom Mbed

1Ndufo ndisịme mbon Kalesia! Anie ikifʌk ndufo ñkịm ke anyen? Emaenekke eben Yisọs Krais e-ekọññọ ke krọs iwọt ndufo. 2Ami ñkpaama adikpeep ñkpọ keed kpọd ito ndufo. Ndufo ekebọ adisana Sịbidịd eto adinịm mbed me adinịm se ekekop? 3Ado nte ndufo emenekke esịme? Ke imaikitọọñọ ye Sịbidịd, nte eyem adikama abʌkidem ñkweeñe se eketọọñọ? 4Nte afịd ufen ndufo akappa ado utak-utak, adieke akedooho utak-utak ke akpanikọ? 5Isọñ ida ise, nte Abasi inọ ndufo Sịbidịd, amaana anam mme utịppeñkpọ ke atu ndufo sia emenam utom mbed me sia emenịm se ekekop? 6Ebraham ñko “amaanịm Abasi ke akpanikọ, ndin emaebat enọ anye nte adinenido.”

7Yak inwaña ndufo ndin ke mbon e-enieghe mbuọdidem edoñño nditọ Ebraham. 8Ikọ Abasi amaada akịt ke Abasi ayaatoppo mme Gentile ikpe ke mbuọdidem, ndin anye amaabem iso asuan etob ado anọ Ebraham ate: “Afịd mme idịd eyaebọ adidiọñ uto fiin.” 9Ke ntoro e-ediọñ mbon e-enieghe mbuọdidem edian ye Ebraham, a-adooho awo mbuọdidem.

10Afịd mbon e-edotto anyen ke edinịm mbed eba ke idak isuuñọ, sia e-ewet: “Adọdiọọk anọ afịd mbon i-imiikaaha iso inam se iwere ke Ñwed Mbed.” 11Ado awọt anwa-anwa ke awo ndomokeed inieghe utoppo ikpe ke iso Abasi ito mbed, sia, “mme ndinen awo ediidu uwem ke mbuọdidem.” 12Mbed ikọñọke ke mbuọdidem, utu ke ado, anye abo, “Awo a-anamma mme ñkpọ ami adiidu uwem ikeene mme ñkpọ ami.” 13Krais amaifak ñnyịn asio ke isuuñọ mbed ke anye adikikappa ndo isuuñọ inọọ ñnyịn, sia e-ewet ebo, “Adọdiọọk anọ awo akeedodo e-ekọññọ ke eto.” 14Anye akifak ñnyịn nọ ato do mme adidiọñ e-ekenọọhọ Ebraham akanna abịne mme Gentile ato ke Krais Yisọs, nọ ato ke mbuọdidem ñnyịn ibọ enwọñọ a-Sịbidịd.

Mbed ye Enwọñọ

15Nditọeka ke Krais, yak ami ndat uwọdñkpọ nto edu uwem ke usen ke usen. Kpa naña awo ndomokeed imiikemeke adituut nnịm me adidian ñkpọ ke edioomo ubon awo a-amaakebaba, anyʌñ ado ntoro ke ñkpọ ami. 16Emaetatañ mme enwọñọ ami enọ Ebraham ye mme mfịd idịb amọ. Ñwed Abasi ibooho, “ye mme mfịd,” a-awuọñọke uwak awo, ado abo “ye mfịd mfo” a-adooho Krais. 17Se ami ntañ awuọñọ ntom: Mbed e-ebenne edi ke mme isua ikie inaañ mme edịb mme duob (430) emaekeboiyo, isịkke isio edioomo A-Abasi amaakenanam, inyʌññọ itop enwọñọ ado iduọọk. 18Sia, adieke udiaakpa akọñọke ke mbed, awuọñọ ke anye ikọñọke aba ke enwọñọ; ado Abasi ke mfọn amọ akeyaak anye anọ Ebraham ato enwọñọ.

19Nsoo ido ntak ndin e-ekenọọhọ mbed? Ekedian anye ke ntak ndiọiñkpọ tutu mfịd e-ekenwọñọke enọ adi. Ekenọ mbed ke ubọk mme enyere ndin eyaak enọ atie ubiọñ. 20Atieubiọñ isibaaha inọ ñkañ keed kpọd; ado Abasi ado keed.

21Ke ntoro, ado nte mbed a-anie ntuaha ye mme enwọñọ Abasi? Nwaaña nsa-o! Sia akpedo emaenọ mbed a-akpekekanna anọ uwem, adinenido akpeketo mbed ado. 22Ado ñwed Abasi asịn afịd ñkpọ ke ñkpakọb idiọọkñkpọ, nọ ato do se emaekenwọñọ, e-ekenọọhọ ato mbuọdidem ke Yisọs Krais, ekeme iyaak nnọọ mbon e-enịmme ke akpanikọ.

Nditọ Abasi

23Mbemiso mbuọdidem akedidi, ñnyịn ikisịne ke ñkpakọb ke idak mbed, e-ekikọppọ ñnyịn enịm tutu ediyaara mbuọdidem. 24Ke ntoro ekenịm mbed nọ idat ñnyịn usʌñ asọk Krais, nọ itoppo ñnyịn ikpe ke mbuọdidem. 25Idahami sia mbuọdidem amaakedi, ñnyịn ibaaha aba ke idak mbed.

26Ke ntoro ke Krais Yisọs afịd ndufo edoñño nditọ Abasi ato ke mbuọdidem, 27sia afịd ndufo e-emaekeduọk mmọọñ isịn ke Krais emeben Krais esịne ke idem. 28Yuu me Gentile, me afʌn me amanaisọñ ibaaha, awodeen me awonwaan inyʌññọ iba, sia afịd ndufo edo keed ke Krais Yisọs. 29Adieke adooho Krais inie ndufo, awuọ ndufo edo mfịd Ebraham, enyʌñ edo mme adiaakpa ato ke enwọñọ.

Currently Selected:

Ñwed Mbon Kalesia 3: ICB

Highlight

Copy

Compare