Esikeel 5
5
Akadañ Ubiereikpe Abasi
1“Idahami, ayịn awo, dat akañkañ se isọp nyʌñ kama nte akadañ afadided fat ided iwuod mfo nyʌñ kwaat ñwaebek mfo. Umauma ado dat udomoñkpọ bakka ided ado. 2Ini ubiọọñọ mfo amaakweeñe, fọp mbakka keed ke itie ita ided ado ke esịd abio. Ben mbakka keed ke itie ita mfen mia ke akañkañ kanna afịd abio. Ndin suan akpatre mbakka keed ke itie ita nọ afịm. Sia ami ñyaasio akañkañ mbịne ammọ. 3Ado sio ñkpọ nte idem ided ifañ faak ke afọñidem mfo. 4Ñko, dat usʌk ke atu ami top dọñ ke ikañ nyʌñ fọp ammọ. Ikañ ayaato do atara awuọ afịd Isrel.”
5Se Abọọñ Andikara abo ado ami: Ami ado Yeruselem, a-ami nnịmme ke ufọọd mme idịd, ndin mme abio ekanna anye ekʌk. 6Ado ke ido ibak amọ anye amaatre utọñ abaña mme mbed ye mme ewʌhọ mmi akan mme idịd ye mme abio e-ekannake anye ekʌk. Anye asịn mme mbed mmi inyʌññọ ikeene mme ewʌhọ mmi.
7“Ke ntoro se Abọọñ Andikara atañ ado ami: Afo ameba mfịna-mfịna akan mme idịd u-ukannake fiin ekʌk unyʌññọ ukeene mme ewʌhọ mmi me adinịm mme mbed mmi. Afo udʌkkọdʌk uda ke ndaha mme idịd u-ukannake fiin ekʌk.”
8“Ke ntoro se Abọọñ Andikara abo ado ami: Ami ke idem mmi mmenam ikọ ye afo, Yeruselem, ndin ami ñyaumia fiin ufen ke iso mme idịd. 9Ke ntak afịd mme mbubiam ubobodñkpọ mfo, ami ñyaunam fiin se akenaanam ami nnamma, a-mme ndiinyʌññọ nnanam. 10Ke ntoro, mme ete ye mme eka eyaeta nditọ ammọ ke ufọọd mfo, nditọ ñko eyaenyʌñ eta mme ete ye mme eka ammọ. Ami ñyaunọ fiin ufen ñnyʌñ nsuan afịd nsʌhọ mfo nsịn ke afịm. 11Abọọñ Andikara abo ate, ke ntoro maama uwem mmi, sia afo ameben afịd ndedeghe mbid ñkpọ mfo ye mme mbubiam adinam mfo asappa adisana itieukpono mmi, ami ke idem mmi ñyaukpooño fiin; ami nduukoppo fiin udʌk ndiinyʌññọ usaana fiin ñyaak. 12Mbakka keed ke itie ita mbon mfo eyaekpañña ke udọñọ nsobo me ke akañ ke esịd abio mfo; akañkañ ayaasobo mbakka keed ke itie ita mfen ke edem abio mfo; ñyaanyʌñ nsuan mbakka keed ke itie ita asʌhọke ndọñ ke afịm ñnyʌñ nsio akañkañ mbịne ammọ.
13“Ndin iyadesịd mmi ayaatre, ifiobesịd a-ami ñkenieghe nnọ ammọ ayaanyʌñ asuuhọ, ndin ayaado ke ami mmesio ammọ usiene. Ndin ke ini ami mmaakenwañña ifiobesịd mmi mfʌk ammọ mma, ammọ eyaediọọñọ ke ami Abọọñ ntañ ikọ ye akpọsọñ udọñ.
14“Ami ñyaunam fiin ado ñkpọ nsobo ye ñkpọ asuenne ke atu mme idịd u-ukannake fiin ekʌk, ke anyen afịd mbon se isaña iboiyo. 15Afo ayaado ñkpọ asuenne ye ñkpọ nsaha, ñkpọ nnọ item ye ñkpọ ndịk anọ mme idịd se ukanna fiin ikʌk ke ini ami mmaumia fiin ufen ke iyadesịd ye ifiobesịd ye akpọsọñ nduaiya. Ami Abọọñ ntañ. 16Ke ini ami mmautop fiin ke ndiọi idañ nsobo akañ mmi, ami ndiitop nọ ato do usobo fiin. Ami ñyaanam akañ anenekke aba ye afo ñnyʌñ ñkpịkke usʌñ ndidia mfo nsio. 17Ami ñyaadọñ akañ ye ndiọi unam ikọd unọ fiin, ndin ammọ eyaenam afo anana nditọ. Idiọọk udọñọ nsobo ye uduọk iyiib eyaubeen fiin, ami ñyaanyʌñ usobo fiin ke akañkañ. Ami Abọọñ ntañ.”
Currently Selected:
Esikeel 5: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
