Esikeel 6
6
Nsobo mme Ikpọabod Isrel
1Ikọ Abọọñ amaadinsịm miin ate: 2“Ayịn awo, kappa iso mfo se mme ikpọabod Isrel; tañ prọfesi baña ammọ 3nyʌñ bo ate: ‘Ndufo mme ikpọabod Isrel, ikop uyio Abọọñ Andikara. Se Abọọñ Andikara atañ anọ mme ikpọabod ye ntək abod, mme abedeñ ye itịkke ado ami: Ami ñyem adisio akañkañ ibịne ndufo, ñnyʌñ nsobo mme ñkoñ-ñkoñ itie ndufo. 4Eyaewuut mme akpokoro uwa ndufo enyʌñ enuak mme akpokoro uwa insensi ndufo; ndin ami ñyaawoot mbon mfo ke iso mme ubobodñkpọ ndufo. 5Ami ñyaabon mme akpo nditọ Isrel ke iso ubobodñkpọ ammọ, ami ñyaanyʌñ nsuan mme akpọ ndufo ñkanna mme akpokoro uwa ndufo. 6Nte ndufo edọdʌñ, eyaenam mme abio ado enaa ukpọk enyʌñ ewuut mme ñkoñ-ñkoñ itie ndufo, nọ ato do mme akpokoro uwa ndufo ena ukpọk, enuak enyʌñ ebiat mme ubobodñkpọ ndufo, ebom mme akpokoro uwa insensi ndufo, enyʌñ esọọk utom ndufo efep. 7Mbon ndufo eyaekpañña afai ke atu ndufo, ndin ndufo eyaediọọñọ ke ami ndo Abọọñ.
8“ ‘Ado ami ñyaasʌhọ ubaak, sia ubaak ndufo eyaebọkkọ akañkañ ke ini emaisuan ndufo ke atu mme abio ye mme idịd. 9Ndin ke mme idịd se eketañ ammọ ekebon nte mbon ñkpakọb, mbon se ikibọkkọ eyaentoiyo miin; naña mme esịd efịbe ammọ enam nọ ami mfʌhọ, e-emaekewọññọ eñkpọñ miin, anyen ammọ ñko, e-enamma use ye mme ubobodñkpọ ammọ enyʌñ ekeene enam ami mfʌhọ. Ammọ eyaesua idem ammọ ke ntak ibak se ammọ enam ye afịd mbubiam ido ammọ. 10Ndin ammọ eyaediọọñọ ke ami ndo Abọọñ; idooho ke ikpu-ikpu ke ami ñkebo ke ñyaanam ammọ idiọọkñkpọ ami.
11“ ‘Se Abọọñ Andikara atañ ado ami: Ben ubọk mfo iba mia nyʌñ tọ ukod mfo ke isọñ nyʌñ bọñ ñkpo bo “Sai!” ke ntak afịd ibak ye mbubiam ido nditọ Isrel, sia ammọ eyaekpañña ke akañkañ, ke akañ ye ke udọñọ nsobo. 12Andiba ke anyan usʌñ ayaakpa ke udọñọ nsobo, akañkañ ayaanyʌñ asobo andiba ke ñkpere usʌñ, ndin awo akeedodo a-abọkkọke adiikpa ke akañ. Ntom ke ami ndiinwañña iyadesịd mmi mfʌk ammọ. 13Ndin ammọ eyaediọọñọ ke ami ndo Abọọñ, ke ini mbon ammọ emaekpañña ena ke atu ubobodñkpọ ammọ e-enaaha ekanna mme akpokoro uwa ammọ ekʌk, ke afịd ñkoñ-ñkoñ abod ye ke afịd atịñe ikpọabod, ke idak afịd eto se itiañña ñkọk ye afịd eto afriyo se ibañña mfañ-mfañ, mme itie se ammọ ekesifọp anemufịk insensi enọ afịd mme ubobodñkpọ ammọ. 14Ndin ami ñyaanyanna ubọk mmi ntuuk ammọ ñnyʌñ nnam isọñ ado ado ndoon tọọñọ ke akpautatan tutu asịm Dibla#6:14 Ataa uwak mme ikpañwed Hibru ewet Dibla; ado ibad-ibad mme ikpañwed Hibru ewet Ribla, itie akeedodo a-ammọ edʌññọ. Ndin ammọ eyaediọọñọ ke ami ndo Abọọñ.’ ”
Currently Selected:
Esikeel 6: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
