Esikeel 35
35
Prọfesi A-abañake Edọm
1Ikọ Abọọñ amaadinsịm miin ate: 2“Ayịn awo, nen iso se Abod Sei; tañ prọfesi baña anye 3nyʌñ bo: ‘Ami ado se Abọọñ Andikara atañ: Ami ñyaanam ikọ ye afo, Abod Sei, ñko ami ñyaanyan ubọk mmi ubaña fiin ñnyʌñ nnam afo ado itie nsobo ye mbiara. 4Ami ñyaanam mme idʌñ mfo ekappa edo ndoon. Ndin afo ayaadiọọñọ ke ami ndo Abọọñ.’ ”
5“ ‘Sia adooho afo amaamʌm akaan udu asịn ke esịd anyʌñ ayaak nditọ Isrel anọ akañkañ ke ini ukuud ammọ, ini se ufen ammọ akenekke akpon, 6ke ntoro, Abọọñ Andikara abo, maama uwem mmi, ami ñyaiyaak ndufo nnọ uduọkiyiib ndin anye ayaadubịnne ndufo. Sia ndufo imiikisuaha uduọk iyiib, uduọkiyiib ayaibịne ndufo. 7Ami ñyaanam Abod Sei ado ataa idiọọk nsobo ñnyʌñ ñkpịkke afịd mbon se ika inyʌñ inyọñ ke ukañ amọ nsio. 8Ami ñyaayọhọ mme ikpọabod ndufo ye mbon e-ekpaññake afai; mbon ewotto ke akañkañ eyaeduọññọ ke abod ndufo ye ke mme ndua ndufo ye ke mme abedeñ ndufo. 9Ami ñyaanam ndufo edo ñwuudo ke nsi-nsi; awo idiidʌññọ ke mme abio ndufo aba. Ndin ndufo eyaediọọñọ ke ami ndo Abọọñ.
10“ ‘Sia adooho afo amebo, “Mme idịd ye mme abio iba ami eyaedo ake ñnyịn ndin ñnyịn iyaidat ammọ inie,” akpesʌkado ami Abọọñ ñkebaaha do, 11ke ntoro Abọọñ abo, ma uwem mmi, ami ndiinam ñkpọ ye afo ñkeene iyadesịd ye ufịb a-ndufo ekewọttọ ke usua a-ndufo ekenieghe enọọ ammọ, ndin ami ñko ñyaanam ammọ endiọọñọ miin ke ini ami ñkpeeghe ikpe iwuod ndufo. 12Ndin ndufo eyaediọọñọ ke ami Abọọñ, mmaakop afịd abʌd-abʌd ñkpọ se ndufo eketañ ebaña mme ikpọabod ke Isrel. Ndufo ekebo “Emaeyaak ammọ enịm nọ abiara enyʌñ eyaak inọ ñnyịn ebo isobo.” 13Ndufo emaenam inua embaña miin, enyʌñ etaañ ikọ embaña miin inieghe ubere, ami mmaanyʌñ ñkop. 14Ami ado se Abọọñ Andikara atañ: Ke ini afịd ederimbod edaarake, ami ñyainam ndufo edo ñwuudo. 15Sia adooho ndufo emaenem esịd ke ini udeeme ñkpọ Isrel akedooho ñwuudo, kpa ntoro ke ami ndiinam ndufo. Abod Sei, afo ye afịd Edọm ediido ñwuudo. Ndin ammọ eyaediọọñọ ke ami ndo Abọọñ.’ ”
Currently Selected:
Esikeel 35: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
