Esikeel 34
34
Abọọñ Ayaado Akpemeedọñ Isrel
1Ikọ Abọọñ amaadinsịm miin idem ate: 2“Ayịn awo, tañ prọfesi baña mme akpemeedọñ Isrel; tañ prọfesi nyʌñ bo ammọ ate: ‘Ami ado se Abọọñ Andikara atañ: Adọdiọọk inọ ndufo mme akpemeedọñ Isrel e-eseeghe ñkpọ ebaña idem ndufo ikpọọñ! Nte mme akpemeedọñ ikpinaaha ese ñkpọ ebaña mme edọñ? 3Ndufo emenwọñ mmọọñeba, emesịne afọñidem e-enamma ke idededọñ enyʌñ ewot unam se ema, ado ndufo iseeghe ñkpọ ibaña udịmedọñ. 4Ndufo isọọñọke mbon mmemidem idem, inyʌññọ ikọk mbon udọñọ me adinwam mbon e-enieghe unan. Ndufo ibenne mbon se iyooñ itịmme idi, inyʌññọ iyem mbon e-esoppo. Ndufo ekara ammọ ke mfiomo ye ke ntiim. 5Ke ntoro ammọ emaesuana sia mme andikpeme ikibaaha, ndin ke ini ammọ ekesuanake, ammọ emaekappa edo ndidia enọ afịd mme afai unam. 6Mme edọñ mmi emaeyooñ ke afịd ikpọabod ye ke afịd ñkoñ-ñkoñ abod. Ammọ emaesuana ke afịd ederimbod, ndin ibaaha awo se ikiyeem me iduuñọ ibaña ammọ.’ ”
7“Do ndin, ndufo mme akpemeedọñ, ikop ikọ Abọọñ: Se 8Abọọñ Andikara abo, ‘Ma uwem mmi, sia adooho mme ufene mmi e-enana andikpeme ñko ke ntoro e-ekappa edo mbịme enyʌñ edo ndidia enọ mme unam afai, ñko sia mme akpemeedọñ imiikiyemme mme edọñ mmi ado ese ñkpọ ebaña idem ammọ utu ke mme ufene mmi, 9ke ntoro ndufo mme akpemeedọñ ikop ikọ Abọọñ: 10Ami ado se Abọọñ Andikara atañ: Ami mmeyat esịd ye mme akpemeedọñ, ndin ami ñyaamʌm ammọ nọ enam ibad ufene mmi. Ami ñyaasio ammọ ñkpọñ adise ñkpọ mbaña mme udịmedọñ mmi nọ ato do mme akpemeedọñ edikan enọọ idem ammọ ndidia aba. Ami ñyaafak edọñ mmi nsio ammọ ke inua ndin ammọ idiidooho ndidia aba inọ ammọ.’ ”
11“ ‘Sia se Abọọñ Andikara atañ ado ami: Ami ke idem mmi ñyaayem mme edọñ mmi ñnyʌñ nse ñkpọ mbaña ammọ.’ 12Kpa naña akpemeedọñ ase ñkpọ abaña udịmedọñ amọ esuanake ke ini anye abaaha ye ammọ, kpa ntoro ke ami ndiise ñkpọ mbaña mme edọñ mmi. Ami ñyaafak ammọ nsio ke afịd itie se ammọ ekesuana ke usen ntọñanyọñ ye akịm. 13Ami ñyaasịññe ammọ ke atu mme idịd ñnyʌñ ñkoot ammọ mbok ke atu mme idʌñ, ñko ami ñyaaben ammọ ntịmme ndi isọñ emana ammọ. Ami ñyaabọọk ammọ ke mme ikpọabod Isrel, ke mme abedeñ ye ke afịd itie idʌñ ke isọñ Isrel. 14Ami ñyaabọọk ammọ ke eti mbid, ñko mme ñkoñ-ñkoñ ikpọabod Isrel ediido itie ndidia ammọ. Do ke ammọ ediisuuk inaa ke eti itie ndidia, do ñko ke ammọ ediita nsek mbid ke ikpọabod Isrel. 15Abọọñ Andikara atañ, ‘Ami ke idem mmi ñyaabọọk edọñ mmi ñnyʌñ nnam ammọ esuuk enaa’ 16Ami ñyaayem mbon se isop ñnyʌñ ñkoono mbon se iyooñ ntịmme ndi. Ami ñyaabọp se inie unan ñnyʌñ nsọọñọ mbon mmemidem idem, ado mbon se ikpoon inyʌñ isọọñ ke ami ndiisobo. Ami ñyaakpeme ufene ke unen.”
17“ ‘Amaado ndufo, mme ufene mmi, ami ado se Abọọñ Andikara atañ: Ami ñyaakpe ikpe ke ufọọd emọ-emọ edọñ, ye ke ufọọd mme akukịmedọñ ye mme ebod. 18Ado nte ikemme ndufo adita eti mbid? Akena nte ndufo esọnnọ mme mbid se isʌhọ ke ñkpad? Ado nte ikemme ndufo adinwọñ nsana mmọọñ? Akena nte ndufo etịmede se isʌhọ ke ñkpad? 19Nte ana mme ufene mmi edia se ndufo ekesọnnọ me se ndufo ekenuakka ke ñkpad?’ ”
20“ ‘Ke ntoro, ami ado se Abọọñ Andikara atañ anọ ammọ: Se, ami ke idem mmi ñyaakpe ikpe ke atu edọñ ekponno idem ye mbon e-esịppe idem. 21Sia adooho ndufo ekama ñkañ ye afara enuuk, enyʌñ ekama nnʌk etuai mme edọñ i-idem amemme tutu ndufo ebịne ammọ esio, 22ami ñyaanyaaña ufene mmi tutu ammọ idooho mbịme aba. Ami ñyaakpe ikpe ke ufọọd edọñ keed ye aken. 23Ami ñyaanịm akpemeedọñ keed nnọ ammọ, ayịnufọk mmi Defid, anye ñko ayaabọọk ammọ; anye ayaabọọk ammọ anyʌñ ado akpemeedọñ anọ ammọ. 24Ami Abọọñ ñyaado Abasi ammọ, ndin ayịnufọk mmi Defid adiido akpan abọọñ ke atu ammọ. Ami Abọọñ ntañ.
25“ ‘Ami ñyaanam edioomo emem ye ammọ ñnyʌñ nsịññe ndiọi unam ke isọñ nọ ato do ammọ edʌñọ ke anaan enyʌñ ena edaiya ke mme akai ke ifuuro. 26Ami ñyaanam ammọ ye mme itie e-ekannake abod mmi ekʌk edo adidiọñ. Ami ñyaanam edịm adep ke akemini; mbara adidiọñ ayaaba. 27Mme eto eyaenwịm mfịd ammọ, isọñ ayaanyʌñ anọ mbunwịm amọ; mme awo eyaedʌñ ke isọñ ke ifuuro. Ammọ eyaediọọñọ ke ami ndo Abọọñ ke ini ami mmaabuuñ akpọnọ mbiomo ammọ ñnyʌñ mfak ammọ nsio ke ubọk mbon ekesịnne ammọ ke ufʌn. 28Ammọ idiidooho aba mbịme inọ mme idịd, ñko ndiọi unam ikọd idiitaaha ammọ. Ammọ eyaedʌñọ ke ifuuro, ndin awo ndomokeed idiinamma ammọ ekop ndịk. 29Ami ñyaanọ ammọ isọñ awuọhọ etob ke ntak mbunwịm amọ, ñko ammọ idiikịtte akañ aba, idiinyʌññọ ido ñkpọ nsaha inọ mme idịd. 30Ndin ammọ eyaediọọñọ ke ami, Abọọñ Abasi ammọ, mmọdo mba ye ammọ ndin ke ammọ, nditọ Isrel, edo mbon mmi, Abọọñ Andikara atañ. 31Ndufo edo mme edọñ mmi, edọñ a-ami mbọọhọ, ñko ami ndo Abasi ndufo, Abọọñ Andikara atañ.’ ”
Currently Selected:
Esikeel 34: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
