Esikeel 36
36
Idodanyen A-anieghe Ikpọabod Isrel
1“Ayịn awo, tañ prọfesi nọ ikpọabod Isrel nyʌñ bo, ‘Ikpọabod Isrel, ikop ikọ Abọọñ.’ 2Ami ado se Abọọñ Andikara atañ: Awo usua akubo fiin, ‘Aha! Mme ñkoñ-ñkoñ itie esed e-ekappa edo udeeme ñnyịn.’ ” 3Ke ntoro tañ prọfesi nyʌñ bo, “Se Abọọñ Andikara atañ ado ami: Sia adooho ammọ unuak enyʌñ usọnnọ fiin ke afịd usʌñ nọ ato do afo akanna ado udeeme mme idịd mfen ye ñkpọ se ekama etop ufiid ye ñkpọ asuenne, 4ke ntoro, mme ikpọabod Isrel ekop ikọ Abọọñ Andikara: Se Abọọñ Andikara atañ anọ mme ikpọabod ye ntəkabod, mme itịkke isọñ ye abedeñ, mme ñwuudo ndoon ye mme idʌñ e-emaekesịn a-mme idịd e-edaaha idiana ndufo emaekebịme enyʌñ edọọñ ndọk ado ami, 5se Ndakeidem Abọọñ Andikara atañ ado ami: Ke ikañ akpọsọñ ufịb esịd mmi ke ami ntañ mbaña idịd mbon ako, ñnyʌñ ntañ mbaña afịd Edọm, sia ke idadesịd ye ke esịd usua ammọ e-eben isọñ mmi enịm udeeme ammọ nọ ato do ammọ eben mbid e-edatta ebọọk ufeene enịm mbịme. 6Ke ntoro tañ prọfesi nọ isọñ Isrel nyʌñ bo mme ikpọabod ye ntəkabod, mme abedeñ ye mme itịkke isọñ: ‘Se Abọọñ Andikara atañ ado ami: Ami ntañ ikọ ke ufịb ye ifiobesịd sia adooho ndufo emaebiom asuenne mme idịd. 7Ke ntoro, se Abọọñ Andikara atañ ado ami: Ami mmedịppe ubọk ke anyọñ ñnwọñọ mbo ke mme idịd e-edaaha idiana ndufo eyaenyʌñ ebọ ndọk.’ ”
8“ ‘Ado ndufo, ikpọabod Isrel, eyaesakka ñkọk ye mfịd enọ ikọd mmi Isrel, sia adooho ammọ eyaesọp enyọñ edi ufọk. 9Ami mmenie akikere unọ fiin, ñko ami ñyause fiin ke anyen mfọn; eyautem fiin enyʌñ etọ, 10ñko ami ñyaanam uwak awo edʌñọ ke anyọñ mfo, ii, afịd Isrel. Eyaedʌñọ ke mme idʌñ ado enyʌñ emaana ebọọp mme ndoon. 11Ami ñyaanam ibad awo ye unam se idʌñọ ke anyọñ mfo etọt, ndin ammọ eyaenwịm mfịd ekappa ewak. Ami ñyaanam mme awo edidʌñọ ke anyọñ mfo naña akedo ke esed, ñko ami ñyaanam afo amọinyọ akan akpa. Ndin afo ayaadiọọñọ ke ami ndo Abọọñ. 12Ami ñyaanam ikọd mmi Isrel edʌñọ ke afo. Ammọ eyaudat fiin enie, ndin afo ayaado udeeme ñkpọ ammọ; tutu amama afo uduuyakka ammọ enana nditọ aba.’ ”
13“ ‘Ntom ke Abọọñ Andikara atañ: Sia adooho usʌk awo ibo ndufo, “Ndufo esibeben awo emen, inyʌññọ iyak idịd ndufo enie nditọ,” 14ke ntoro, Abọọñ Andikara abo, afo uduumenne awo aba, uduunyʌññọ unam idịd mfo anana nditọ. 15Ami ndiiyakka nọ akop aseeme mme idịd aba, ñko ndiiyakka afo abiom isuuñọ mme awo aba me adinam nọ mme abio mfo aduọ, Abọọñ Andikara atañ.’ ”
Eyaemaana Edịppe Isrel
16Akem ikọ Abọọñ amaamaana adinsịm miin idem ate: 17“Ayịn awo, ke ini nditọ Isrel ekedʌñọke ke idʌñ ammọ, ammọ emaesappa anye ato ke se ammọ ekenañña. Adinam ammọ akeba ke iso mmi nte ndek itieisọñ a-awonwaan anieghe kwa afiọñ. 18Ke ntoro ami mmaanwañña iyadesịd mmi nduọk ammọ sia emaeduọk iyiib ke isọñ, ñko sia ammọ emaesappa isọñ ye mme ubobodñkpọ ammọ. 19Ami mmaasuan ammọ ndọñ ke mme idịd, ñko ammọ emaesuana ke mme idʌñ; ami ñkekpe ikpe nnọ ammọ ñkeene mme adinam ammọ 20Ndin itie keed akeedodo a-ammọ ekekaaha ke atu mme idịd ammọ emaesappa adisana anyịñ mmi, sia emaetañ ebaña ammọ ebo, ‘Mbon ami edoñño mbon Abọọñ kpayeado akena ammọ ekpọñ isọñ amọ.’ 21Ami mmaakop mbọm mbaña adisana anyịñ mmi a-mbon Isrel ekesappake ke atu mme idịd se ammọ ekekaiya.
22“Ke ntoro tañ nọ nditọ Isrel bo, ‘Ntom ke Abọọñ Andikara atañ: Nditọ Isrel idooho ke ntak ndufo ke ami ñyem inam ñkpọ ami, ado ke ntak adisana anyịñ mmi, a-ndufo ekesappake ke atu mme idịd se ndufo ekekaiya. 23Abọọñ Andikara anyʌñ abo ntom, ami ñyaawọt naña akwa anyịñ mmi ado adisana, a-ndufo ekesappake ke atu mme idịd, anyịñ a-ndufo ekesappake ke atu ammọ. Ndin mme idịd eyaediọọñọ ke ami ndo Abọọñ, ke ini ndufo emaenam nọ ami ndo adisana ke anyen ammọ.
24“ ‘Sia ami ñyaisịññe ndufo mfep ke mme idịd; ami ñyaikoot ndufo mbok nto mme abio, ñnyʌñ iben ndufo ntịmme ñkaa isọñ ndufo. 25Ami ñyaisiime ndufo adisana mmọọñ, ndin ndufo eyaesana; ami ñyaisio ndufo afịd ndek ke idem ñnyʌñ idiañña ndufo ñkpọñ mme ubobodñkpọ ndufo. 26Ami ñyainọ ndufo ufa esịd ñnyʌñ isịn ndufo ufa sịbidịd ke idem; ami ñyaasịññe esịd itiad ndufo ñkanna inọ ndufo esịd a-anieghe abʌk. 27Ami ñyaisịn ndufo sịbidịd mmi ke idem ñnyʌñ inək ndufo nọ ekeene ewʌhọ mmi enyʌñ ekpeme adinịm mme mbed mmi. 28Ndin ndufo eyaedʌñ ke isọñ a-ami ñkenọọhọ mme eteete ndufo; ndufo eyaedo mbon mmi, ami ñko ñyaado Abasi ndufo. 29Ami ñyainyaaña ndufo nsio ke ndek ndufo. Ami ñyaanam abakpa awak inọ ndufo, ndin ndiinamma akañ aba ke atu ndufo aba. 30Ami ñyaanam mfịd eto ye mbunwịm inwañ ndufo ewak, nọ ato do ndufo ikiibọọ ndọk ito mme idịd aba ke ntak akañ. 31Ndin ndufo eyaetoiyo mme idiọọk usʌñ ndufo ye mme adinam ibak ndufo, ñko ndufo eyaesua idem ndufo ke ntak idiọọkñkpọ ye mme ñkpọ a-atekke awo esịd a-ndufo ekenamma. 32Abọọñ Andikara abo, ami ñyem nọ ndufo ediọọñọ ke ami nnamma ami ke ntak ndufo. Ikop abuud ye asuenne ke adinam ndufo, nditọ Isrel!
33“ ‘Ntom ke Abọọñ Andikara atañ: Ke usen a-ami ndiiyet afịd ndiọiñkpọ ndufo nsio, ami ñyaamaana nnam ndufo edʌñ ke abio ndufo ñnyʌñ mmaana mbọp ndoon ndufo. 34Eyaemaana etọ ñkpọ ke isọñ amaakebiara utu ke anye ana nsobo ke iso mme awo se isaña iboiyo. 35Ndin ammọ eyaebo, “Isọñ a-akedooho mbiara a-akappa aba nte inwañ Idịn; mme idʌñ e-ekekappake ndoon, nsobo ye ñwuudo, e-ekappa enie ndibene idahami enyʌñ edo se edʌñ.” 36Ndin mme idịd se isʌhọ e-edaaha idiana ndufo eyaediọọñọ ke ami, Abọọñ mmemaana mbọp se emaekewuut, ñko mmaana ntọ se emaekesobo. Ami Abọọñ mmetañ, ndin ñyaanam.’
37“Ntom ke Abọọñ Andikara atañ: Ini keed mfen ami ñyaakpañ utọñ nnọ ebeeñe Isrel ñnyʌñ nnam ami nnọ ammọ: Ami ñyaanam ammọ ewak nte edọñ, 38nte ibad mme ufene e-edatta enam uwa ke Yeruselem ke mme ini usọrọ ekemme. Kpa ntoro ke ñwuudo abio adiiyọhọ ye mme atu awo. Ndin ammọ eyaediọọñọ ke ami ndo Abọọñ.”
Currently Selected:
Esikeel 36: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
