Esikeel 33
33
Udemme Ikood Esikeel nte Awoukpeme
1Ikọ Abọọñ amaadinsịm miin ate: 2“Ayịn awo, dọkkọ mbon mfo ate: ‘Ke ini ami mbenne akañkañ mbịne idʌñ, ndin mme andinie idʌñ ado esio awodeen ammọ keed enam anye ado awoukpeme anọ ammọ, 3ndin anye akịt naña akañkañ adʌkkọ idʌñ anyʌñ afịt adukpoñ adʌt mme awo utọñ, 4ado adieke awo ndomokeed akoppo adukpoñ ado inamma item ndin akañkañ adiben uwem ammọ, iyiib ammọ adiidoro ammọ ke iwuod. 5Sia adooho ammọ emaekop uyio adukpoñ, ado ikpañña utọñ inọ ndʌdutọñ, iyiib ammọ adiidoro ammọ ke iwuod. Akpedo ammọ emaekop ndʌdutọñ, ammọ ekpaekenyaaña idem ammọ. 6Ado adieke awoukpeme akịtte akañkañ naña adi ado anye ifịtte adukpoñ adidʌt mme awo utọñ ndin akañkañ adi anyʌñ asobo uwem awo, ediiben uwem mbon awo ado ke ntak idiọọkñkpọ ammọ, ami ñyaamʌm awoukpeme mbịp mbaña iyiib ammọ.’ ”
7“Ayịn awo, ami mmunịm fiin nte awoukpeme nnọ mbon Isrel; ke ntoro kop ikọ se ami ntañ nyʌñ dat ado dʌt ammọ utọñ. 8Ke ini ami mbooho awo ibak, ‘Afo awo ibak, ke akpanikọ afo ayaakpa,’ ado afo utañña usio nọ anam ammọ ewuọ ekpọñ usʌñ ibak ammọ, awo ibak ado ayaakpa ke ntak idiọọkñkpọ amọ, ndin iyiib amọ aduudoro fiin ke idem. 9Ado adieke afo adʌttọ awo ibak utọñ nọ awuọ akpọñ idiọọk usʌñ ammọ ndin ammọ inamma ado, ammọ eyaekpa ke ntak idiọọkñkpọ ammọ, ado afo ayaabọkkọ.”
10“Ayịn awo, dọkkọ nditọ Isrel ate, ‘Se ndufo etañ ado ami, nnamndue ye ndiọiñkpọ ñnyịn isuuhọ ñnyịn anịm, ñko ñnyịn imiyeppe ke ntak ammọ. Die ndin ke ñnyịn idiidu uwem?’ ” 11Dọkkọ ammọ ate, adaña nte ami nduuho uwem, Abọọñ Andikara atañ, ami nnemme esịd mbaña ñkpa awo ibak, ado yak ammọ ekappa esịd ekpọñ idiọọkñkpọ ammọ enyʌñ edu uwem. Iwọññọ! Iwọññọ ikpọñ mme idiọọk usʌñ ndufo! Mbon Isrel, nsoo ido ntak a-ndufo ekpekpaaha?
12“Ke ntoro, ayịn awo, dọkkọ mbon mfo ate, ‘Adieke adinen awo atreke utọñ, eyaebat akaan adinenido amọ ke ikpu-ikpu. Ñko adieke awo ibak akappake esịd, akaan ibak awo ado idiibenne ubiomikpe isọk anye. Awo idiiyakka adinen awo a-anamma idiọọkñkpọ adu uwem akpesʌkado ammọ ekedoññoke ndinen.’ 13Adieke ami mbooho adinen awo ke akpanikọ ke ana ammọ edu uwem, ado ammọ ebuọt idem ke adinenido ammọ enyʌñ enam idiọọk ido, awo idiitoiyoke ndinen ñkpọ ndomokeed se awo ado akenam; ammọ eyaekpa ke idiọọkñkpọ a-ammọ enamma. 14Ñko adieke ami mbooho awo ibak, ‘ke akpanikọ afo ayaakpa,’ ado ammọ ewọññọ ekpọñ idiọọkñkpọ ammọ enyʌñ enam se idot inyʌñ ifọn, 15adieke ammọ enọọhọ se ammọ ekebọọ ke isọn ke idak unwọñọ, eyaak se ammọ ekeyịp enọ unie, ekeene mme mbed edatta uwem edi, inyʌññọ inam idiọọkñkpọ ndomokeed, ke akpanikọ awo ado ayaadu uwem; ammọ idiikpaaha. 16Awo idiitoiyoke idiọọkñkpọ ndomokeed se awo ado akenam inọ anye. Ammọ e-enam se idot inyʌñ inen; ana ammọ edu uwem.”
17“Ado mbon mfo ebo, ‘Usʌñ Abọọñ inenne.’ Ado usʌñ ammọ ado se iminenne. 18Adieke adinen awo awọññọke akpọñ adinenido amọ akenam idiọọkñkpọ, ammọ eyaekpa ke ntak ado. 19Ñko idiọọk awo akpekpọñ idiọọk usʌñ ibak amọ anyʌñ anam se ifọn ye se idot, ammọ eyaedu uwem ke adinam ado. 20Ado ndufo nditọ Isrel ebo, ‘Usʌñ Abọọñ inenne.’ Ado ami ndiikpe ikpe ndufo keedekeed ñkeene usʌñ ndufo.”
Enam Iduọ Yeruselem Anwaña
21Adikem ke ayọhọ isua duob mme iba tọọñọ ekitañ ñnyịn efep, ke ayọhọ afiọñ duob ke ayọhọ usen ition, awodeen a-akebọkkọke afeghe akpọñ Yeruselem amaadi ambịne miin adibo, “Abio ado aduọ!” 22Ndin ndubiayio ado mbemiso awodeen ado adiwuọ, ubọk Abọọñ amandoro miin ke idem, ñko anye amaatat inua mmi mbemiso awodeen ado adi ambịne miin ubakusen. Ke ntoro inua mmi amaatara, ñko ami ñkidoppo uyio aba.
23Akem ikọ Abọọñ amaadinsịm miin ate: 24“Ayịn awo, mme mbon e-edʌññọ ke ndoon ke isọñ Isrel ebo, ‘Ebraham akedo awo keed kpọd, ado anye amaadat isọñ anie. Ado ñnyịn imiwak; ke akpanikọ i-inọ ñnyịn isọñ nte udeeme ñkpọ ñnyịn.’ 25Ke ntoro dọkkọ ammọ ate ke Abọọñ Andikara abo: ‘Sia adooho ndufo eta unam i-iyiib asʌkkọ asesịne anye ke idem, enyʌñ ese mme ubobodñkpọ ndufo, enyʌñ eduọk iyiib, nte ado se ndufo edat isọñ enie? 26Ndufo ebuọt idem ke akañkañ ndufo, ndufo enañña mbubiam ñkpọ, ñko ndufo keedekeed emesappa ibaan mbọhọidʌñ ndufo. Akpa asʌk ado se ndufo edat isọñ enie?’ ”
27“Tañ ami nọ ammọ: ‘Ami ado se Abọọñ Andikara atañ: Adaña nte ami nduuho uwem, mbon esʌhọke ke mme nsobo eyaeduọññọ ke akañkañ, mbon esʌhọke ke ñwuudo eyaeduọññọ ke akañkañ, ami ñyaayaak nnọ mme idiọọk unam nọ eta, mbon e-ebaaha ke akpọsọñ itie ye ke abaitiad ediikpa ke idiọọk udọñọ nsobo. 28Ami ñyaanam isọñ akappa ado ataha ndoon, ñko adudu ñkịdidem amọ ayaanie utịd, ndin mme ikpọabod Isrel eyaedoñño ikpu-ikpu nọ ato do awo isañake ammọ iboiyo. 29Ndin ammọ eyaediọọñọ ke ami ndo Abọọñ, ke ini ami mmaanam isọñ ado akappa ntaha ndoon ke ntak mme mbubiam ñkpọ a-ammọ enamma.’
30“Ayịn awo, amaado afo, mbon mfo esʌk etie keed etañ ikọ ubaña fiin ke mben ndibene ye ke inuausʌñ ufọk, ebo emọ-emọ, ‘Idikop etob a-atooho Abọọñ adi.’ 31Mbon mmi edi ubịne fiin, naña ammọ esidak enam, enyʌñ utie fiin ke iso adikop ikọ mfo, ado ibenne ammọ isịn ke adinam. Inua ammọ atañ abaña ima, ado esịd ammọ ayem idiọọk udod. 32Ke aditʌm ntañ, afo udooho ñkpọ ndomokeed ke iso ammọ ukan awo a-akwọọhọ ikwọ ima ke inem uyio anyʌñ akwak ñkukwak mfọn-mfọn, sia adooho ammọ e-ekop se afo atañ ado ibenne isịn ke adinam.”
33“Ke ini afịd ñkpọ ami amaawuọ iwọt idem, a-adooho ayaawuọ iwọt, ammọ eyaediọọñọ ke prọfed mmọdo ke ufọọd ammọ.”
Currently Selected:
Esikeel 33: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
