Esikeel 29
29
Prọfesi A-abañake Iyib
Ubiereikpe Nnọọ Fero
1Ke ayọhọ isua duob, ke ayọhọ afiọñ duob ke ayọhọ usen duob mme iba, ikọ Abọọñ amaadinsịm miin ate: 2“Ayịn awo, wuuk iso mfo se Fero adidem Iyib nyʌñ tañ prọfesi baña anye ye afịd Iyib. 3Tañ ikọ ye anye nyʌñ bo anye ate: ‘Se Abọọñ Andikara atañ ado ami:
“ ‘Fero adidem Iyib, ami mmetọhọ ye afo,
afo ekamba aniendịk amọn a-anaaha ke ufọọd mme idịm mfo.
Afo ate, “Akpa Nail annie miin;
ami ñkenam anye nnọ idem mmi.”
4Ado ami ñyaasịn mme ekọb uwaam ke mbañ mfo,
ñnyʌñ nnam iyak idịm mfo uyịre fiin ke mme ikpọk mfo.
Ami ñyaudʌt fiin nsio ke ufọọd mme idịm mfo,
afịd iyak ke idịm mfo eyauyịre fiin ke ñkpọk.
5Ami ñyaukpọñ fiin nnịm ke anaan,
afo ye afịd iyak ke mme idịm mfo.
Afo ayaaduọ ke iso isọñ,
awo idiinyʌññọ utañ ibok aba.
Ami ñyauben fiin nte ndidia
nnọ mme unam ikọd ye mme inuen anyọñ.
6Ndin afịd mbon se idʌñ ke Iyib eyaediọọñọ ke ami ndo Abọọñ.
“ ‘Afo amedo esañ ñnyanyaha anọ mbon Isrel. 7Ke ini ammọ ekumʌmmọ fiin ke ubọk ammọ, afo amaasaiya anyʌñ asiak ammọ afara; ke ini ammọ ekebette idem ke afo, afo amaabʌññọ ndin edem ammọ amaanyʌñ abʌññọ.
8“ ‘Ke ntoro se Abọọñ Andikara atañ ado ami: Ami ñyaaben akañkañ ukeene fiin ñnyʌñ ñwot awo ye unam. 9Isọñ Iyib ayaakappa ado ñwuudo ndoon. Ndin ammọ eyaediọọñọ ke ami ndo Abọọñ.
“ ‘Sia afo amaabo ate, “Akpa Nail ado ake mmi; ami ñkenam anye,” 10ke ntoro ami mmetọhọ ye afo ye mme idịm mfo, ndin ami ñyaanam isọñ Iyib ado nsobo itie ye ñwuudo ndoon tọọñọ ke Mikdol akewuọ Aswan, tutu akesịm adaña Kuus. 11Ñkpad awo me unam idiisañake iboiyo ke esịd; awo ndomokeed idiidʌññọ do ke isua aba. 12Ami ñyaanam isọñ Iyib anaa ukpọk ke atu mme idịd se esobo, ndin mme abio amọ eyaenaa nte ñwuudo itie ke atu mme ñwuudo abio ke isua aba. Ami ñyaanyʌñ mbịne mbon Iyib ndọñ ke atu mme idịd ñnyʌñ nsuan ammọ ndọñ ke atu mme abio.
13“ ‘Kpayeado, se Abọọñ Andikara atañ ado ami: Ke utịd isua aba, ami ñyaakoono mbon Iyib nto mme idịd se ekesuan ammọ edọñ mmaana mbok. 14Ami ñyaakoono mbon eketañña esio ke idʌñ ke isọñ Iyib mmaana ñnyọñ Adoro Iyib, isọñ emana ammọ. Do ke ammọ ediido usuuhọ idịd. 15Anye adiido andisịb ñkan ke atu mme idịd mfen, idiinyʌññọ ibenne idem amọ aba ikan mme idịd mfen tutu amama. Ami ñyaanam idem amem anye tutu anye ikanna ikara mme idịd mfen aba. 16Iyib idiidooho ibededem inọ mbon Isrel aba, ado eyaetoiyo idiọọkñkpọ ammọ ke ini ekannake eyem unwam eto Iyib. Ndin ammọ eyaediọọñọ ke ami ndo Abọọñ Andikara.’ ”
Utịb Nebukadnesa
17Ke ayọhọ isua edịb mme itiaba, ke akpa afiọñ ke akpa usen, ikọ Abọọñ amaadinsịm miin ate: 18“Ayịn awo, Nebukadnesa adidem Babilọn amaanam mbon ekọñ amọ eka ekọñ ye Tai; emaefʌnnọ ammọ ke edikwaat afịd iwuod enyʌñ efoñ afịd afara. Kpayeado anye ye mbon ekọñ amọ ikinieghe ñkpọ ayịnutom ito ekọñ a-ammọ ekenwanake ye Tai sia ammọ ikikanna Tai. 19Ke ntoro se Abọọñ Andikara atañ ado ami: Ami ñyaayaak Iyib nnọ Nebukadnesa adidem Babilọn, ndin anye ayaaben inie amọ anyọñ. Anye ayaabịme ñkpọ amọ anyʌñ awo isọñ ado adidat ñkpe udịmekọñ amọ. 20Ami mmenọ anye Iyib nte utịb amọ ke afịd ifịk se anye akesịn sia anye ye udịmekọñ amọ ekenam ado ennọ miin, Abọọñ Andikara atañ.
21“Ke usen ado ami ñyaanam nnʌk atịppe anọ mbon Isrel, ami ñyaanyʌñ ukʌppọ fiin inua ke atu ammọ. Ndin ammọ eyaediọọñọ ke ami ndo Abọọñ.”
Currently Selected:
Esikeel 29: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
