Esikeel 28
28
Prọfesi A-abañake Adidem Tai
1Ikọ Abọọñ amaadinsịm miin ate: 2“Ayịn awo, dọkkọ adaukara Tai ate, ‘Se Abọọñ Andikara atañ ado ami:
“ ‘Ke ntañidem esịd mfo
afo abo ate, “Ami ndo abasi;
ami ntie ke ebekpo abasi
ke ufọọd akpainyañ.”
Ado afo ado ñkaña awo, abʌk ye iyiib, udooho abasi,
akpesʌkado a-afo akereke ke imọ iminie aniọñ nte abasi.
3Nte afo amediọọñọ ñkpọ akan Dandiel? #28:3 Akeme ido Danel, awuọ etob awo ke mbʌk esed
Ibaaha ndịbeñkpọ ndomokeed u-udịppe fiin?
4Ato ke aniọñ ye mbufiọk mfo
afo amekọ inie anọ idem mfo
amenyʌñ akọ kold ye silfa
adọñ ke itie unịm inie mfo.
5Ato ke ataa eti ifiọk a-afo anieghe ke unyam udua
afo amenam inie mfo atọt,
ñko ke ntak inie mfo
esịd mfo ayọhọ ye ntañidem.
6“ ‘Ke ntoro se Abọọñ Andikara atañ ado ami:
“ ‘Sia afo akereke ke imọ iminie aniọñ,
inie aniọñ ukem nte abasi,
7ami ñyaaben mme isenawo edinwana ndufo,
mme afai idịd i-imiikoppo mbọm;
ammọ eyaesio akañkañ ammọ ekpii uyai ye aniọñ mfo,
enyʌñ ekịm uyamma uyai mfo ebiat.
8Ammọ eyauben fiin eduọọk ke ube,
ndin afo ayaakpa ñkpa afai
ke ufọọd inyañ.
9Nte afo ayaabo, “Ami ndo abasi,”
ke iso mbon se uwot fiin?
Afo adiido ñkaña awo, udooho abasi,
ke ubọk mbon se uwot fiin.
10Afo ayaakpa ñkpa mbon i-imiifọọrọke edʌd
ke ubọk isenawo.
Ami mmetañ mma, ado Abọọñ Andikara atañ.’ ”
11Ikọ Abọọñ amaadinsịm miin ate: 12“Ayịn awo, seeme aseeme baña adidem Tai nyʌñ bo anye ate: ‘Se Abọọñ Andikara atañ ado ami:
“ ‘Afo akedo idiọọñọ mfọnmma,
ayọhọ ye aniọñ anyʌñ ayaiya ama.
13Afo akeba ke Idịn,
inwañ Abasi;
afịd nsọñudua itiad emaubana fiin idem:
kanelian, krisolaid ye emeraal,
topas, ọniks ye yaspa,
lapis lasuli, nsem-nsem itiad ye beril.
Ubonoñkpọ ye udodñkpọ mfo ekenam ke kold;
ke usen e-ekubotto fiin ke ekeneeñe ammọ ebono.
14Ekuyet fiin adan enịm nte serub ukpeme,
ntoro ke ami ñkumek fiin.
Afo akeba ke adisana abod Abasi;
amaasaña ke ufọọd mme itiad e-esakka ke ikañ.
15Afo amaanana ndo ke mme usʌñ mfo
tọọñọ ke usen e-ekubotto fiin
tutu edikịt ibak uwem ke idem mfo.
16Ato ke naña mbịn udua mfo atara,
afai amauyọhọ fiin idem,
ndin afo amaanam idiọọkñkpọ.
Ke ntoro ami mmaubịn fiin nsio ke abod Abasi ke asuenne,
ami mmaanyʌñ udiañña fiin nsio, serub ukpeme,
ke ufọọd mme itiad esakka ke ikañ.
17Esịd mfo akediyọhọ ye ntañidem
akeene ntak uyai mfo,
afo amaanyʌñ abiat aniọñ mfo
ke ntak ubọọñ mfo.
Anam ami mmautop fiin nduọọk ke isọñ;
ami mmaunam fiin ado ñkpọ ndise ke iso mme ndidem.
18Ato ke uwak idiọọkñkpọ mfo ye nsu-nsu udua mfo
afo amesappa mme ndisana itie mfo.
Anam ami mmaanam ikañ uwuọ fiin ke idem,
anyʌñ uta fiin,
ndin ami mmaanam afo akappa ntọñ ke isọñ
ke iso afịd awo se ikida ise.
19Afịd idịd se ikudiọọñọ fiin
ekop ñkpaidem ubaña fiin;
utịd mfo adiọọk eti-eti
ndin uduunyʌññọ uba aba ke nsi-nsi.’ ”
Prọfesi ke Abaña Sidọn
20Ikọ Abọọñ amaadinsịm miin ate: 21“Ayịn awo, wuuk iso mfo se Sidọn; tañ prọfesi baña anye 22nyʌñ bo ate: ‘Se Abọọñ Andikara atañ ado ami:
“ ‘Sidọn, ami ñyaanam ikọ ye afo,
ami ñyaanyʌñ ñwọt ubọọñ mmi ke atu ndufo.
Ndufo eyaediọọñọ ke ami ndo Abọọñ,
ke ini ami mmaimia ndufo ufen
ndin ndufo eyaekịt ke ami ndo adisana.
23Ami ñyaanọ idiọọk udọñọ nsobo isọk ndufo
ñnyʌñ nnam iyiib afiọrọ ke mme efaak ndufo.
Mbon se ikpañña afai eyauduọññọ fiin ke idem,
ndin akañkañ ayaato afịd ñkanñkʌk adudoro fiin ke idem.
Ndin ndufo eyaediọọñọ ke ami ndo Abọọñ.
24“ ‘Mbon Isrel idiinieghe ndiọi mbọhọidʌñ e-edooho akpab a-abiakka awo ye ñkukịm a-asọppọ aba. Ndin ammọ eyaediọọñọ ke ami ndo Abọọñ Andikara.
25“ ‘Se Abọọñ Andikara atañ ado ami: Ke ini ami mmaakekoono mbon Isrel nto mme idịd a-ammọ ekesuanake edọñọ, eyaenam nọ ami ndo adisana ke anyen mme idịd ke ntak ammọ. Ndin ammọ eyaedʌñ ke isọñ ammọ, a-ami ñkenọọhọ awo mmi Yekọb. 26Ammọ eyaedʌñ do ke ifuuro enyʌñ ebọọp ufọk, enyʌñ etọ inwañ fain; ammọ eyaedʌñ ke ifuuro ke ini ami mmaamia afịd mbọhọidʌñ ammọ e-esịnne ammọ ke ndek ufen. Ndin ammọ eyaediọọñọ ke ami ndo Abọọñ Abasi ammọ.’ ”
Currently Selected:
Esikeel 28: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
