Esikeel 30
30
Aseeme ke Abaña Iyib
1Ikọ Abọọñ amaadinsịm miin ate: 2“Ayịn awo, tañ prọfesi nyʌñ bo: ‘Se Abọọñ Andikara atañ ado ami:
“ ‘Tua seeme nyʌñ bo,
“Mbọm ke usen ado!”
3Sia usen ado akpere,
usen Abọọñ akpere,
usen idiọọk anyọñ,
adiido ini idiọọk ñkpọntịppe inọ mme idịd.
4Akañkañ ayaadi abịne Iyib,
ekamba ubiak ayaanyʌñ adi abịne Kuus.
Ke ini mme akpañña afai emaeduọññọ ke Iyib,
eyaekoono inie amọ
enyʌñ ewuut itiad idakisọñ amọ.
5Kuus ye Libia, Lidia ye afịd Arebia, Kub ye mbon isọñ enwọñọ eyaeduọññọ ke akañkañ ye Iyib.
6“ ‘Se Abọọñ atañ ado ami:
“ ‘Mme ufan Iyib eyaeduọññọ
ndin iseri adudu amọ ayaakpu.
Tọọñọ ke Mikdol tutu akewuọ Aswan
ammọ eyaeduọ ke akañkañ ke esịd amọ,
ado Abọọñ Andikara atañ.
7Ammọ eyaenaa ukpọk
ke atu mme abio se inaa ukpọk,
ndin mme abio ammọ eyaeba
ke atu mme ñwuudo abio.
8Ndin ammọ eyaediọọñọ ke ami ndo Abọọñ,
ke ini ami mmaakịm ikañ nsịn ke Iyib,
enyʌñ enuak afịd mbon se isinwam anye.
9“ ‘Ke usen ado mme isʌñutom eyaento miin esaña ke mme ubom ekedịkke Kuus ke ndueidem. Ammọ eyaekop ekamba ubiak ke usen idiọọk ñkpọntịppe ke Iyib, sia ke akpanikọ ayaatịppe.
10“ ‘Se Abọọñ Andikara atañ ado ami:
“ ‘Ami ñyaanam ekamba atu awo ke Iyib ekweeñe
ato ke ubọk Nebukadnesa adidem Babilọn.
11Anye ye udịmekọñ amọ, mbon se isọñ esịd ikan ke atu mme idịd,
eyaedʌk edisobo idịd ado.
Ammọ eyaesịññe mme akañkañ ammọ enwana ye Iyib
enyʌñ enam akpo awo ayọhọ isọñ.
12Ami ñyaanam mmọọñ ke akpa Nail asat
ñnyʌñ mben isọñ ado ñnyam nnọ idiọọk idịd;
ato ke ubọk isenawo
ami ñyaasobo idịd ado ye afịd se idọñọ ke esịd.
Ami Abọọñ mmetañ.
13“ ‘Se Abọọñ Andikara atañ ado ami:
“ ‘Ami ñyaasobo mme ubobodñkpọ,
ñnyʌñ nnam mme ubobodñkpọ ke Memfis atre.
Akpanabọọñ ndomokeed idiibaaha aba ke Iyib,
ami ñyaanyʌñ nsuan ndịk ke afịd isọñ abio.
14Ami ñyaasobo Adoro Iyib,
ñnyʌñ ñkịm ikañ nsịn ke Soan,
ñnyʌñ nnọ Tebes ufen.
15Ami ñyaanwañña ifiobesịd mmi mfʌk Pelusium,
akpọsọñ itie Iyib,
ñnyʌñ nsọọk ekamba atu awo ke Tebes nsio.
16Ami ñyaakịm ikañ nsịn ke Iyib;
Pelusium ayaakop ataa ubiak.
Eyaedat Tebes ke afai-afai usʌñ:
Memfis adiiba ke ukuud afịd ini.
17Eyaewot ñkparawa Heliopolis ye Bubastis
ke akañkañ,
ndin eyaetañ mme abio ammọ esio nte ifʌn,
18Abio Tapanes ayaakịm ke usen ado
ke ini ami mmaabuuñ akpọnọ Iyib;
do ndin ke iseri adudu amọ adiitre.
Ntọñanyọñ ayaafʌk anye,
eyaenyʌñ ekoono mbon idʌñ amọ esịññe.
19Ke ntoro ami ñyaanọ Iyib ufen,
ndin ammọ eyaediọọñọ ke ami ndo Abọọñ.’ ”
Ebʌñ Fero Ubọk
20Ke ayọhọ isua duob mme keed, ke akpa afiọñ ke ayọhọ usen itiaba, ikọ Abọọñ amaadinsịm miin ate: 21“Ayịn awo, ami mmebuuñ Fero adidem Iyib ubọk. Awo ibọppọ anye nọ ato do unan ado akpa, awo inyʌññọ isịn anye ke afọñ nọ ato do akop adudu se amʌm akañkañ. 22Ke ntoro se Abọọñ Andikara atañ ado ami: Ami mmenam ikọ ye Fero adidem Iyib. Ami ñyaabuuñ anye naña ubọk iba, ñyaabuuñ ubọk se ifọn ndian ye anye amaakebọbʌññọ, ñnyʌñ nnam akañkañ abọkkọ anye ke ubọk aduọ. 23Ami ñyaabịn nditọ Iyib ndọñ ke atu mme idịd ñnyʌñ nsuan ammọ ndọñ ke mme abio. 24Ami ñyaasọọñọ adidem Babilọn ubọk ñnyʌñ nsịn anye akañkañ mmi ke ubọk amọ, ado ñyaabuuñ Fero ubọk, ndin anye ayaamịm mmịm ke iso amọ nte awo a-akpaaha afai. 25Ami ñyaasọọñọ adidem Babilọn ubọk, ado ubọk Fero ayaamem. Ndin ammọ eyaediọọñọ ke ami ndo Abọọñ, ke ini ami mmaaben akañkañ mmi nsịn adidem Babilọn ke ubọk nọ anye aben anyan ke isọ Iyib. 26Ami ñyaabịn nditọ Iyib ndọñ ke atu mme idịd ñnyʌñ nsuan ammọ ndọñ ke mme abio. Ndin ammọ eyaediọọñọ ke ami ndo Abọọñ.”
Currently Selected:
Esikeel 30: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
