Esikeel 27
27
Aseeme ke Abaña Tai
1Ikọ Abọọñ amaadinsịm miin ate: 2“Ayịn awo, seeme aseeme baña Tai. 3Bo Tai, adaaha ke esʌk ekamba akpainyañ, a-adooho esʌk mbeghe mme awo ke uwak mben akpainyañ, ‘Se Abọọñ Andikara atañ ado ami:
“ ‘Afo, abio Tai, abo ate,
“Ami mmenekke ñyaiya.”
4Itie mfo akeba ke akpainyañ;
mme abọbufọk emaenam afo anekke ayaiya.
5Afịd adukpọk yunipa mfo
e-ekenamma eketo Seni#27:5 A-adooho Ekamba abod Hemọn;
ammọ emaedat sida ke Lebanọn
se ekama enam eto ubom unọọ fiin.
6Ekedat afriyo ke Basan
enam mme udeñ mfo;
emaedat eto saipres ke mme mben akpainyañ Saiprọs;
ammọ ekekama nnʌk eniin ebana anyọñ ubom mfo.
7Uyaiya awedeñwed linen a-atooho Iyib akedo afada mfo,
anyʌñ ado afọñidiọọñọ mfo;
se ekedat ufʌk fiin ekedo bru ye iduod-iduod
e-eketooho mme mben akpainyañ Elisa.
8Ideen Sidọn ye Afaad ekedo mme awadudeñ mfo;
nta mme anam usọ mfo, Tai, mmọdo ekedọñọ nte mme awad nsʌñikañ mfo.
9Nta mme adiọọñọ usọ a-Baiblos emaeba do ye afo
nte mme adaaha udiọñ nsʌñikañ adisiit mme ndudu ke nsʌñikañ.
Afịd nsʌñikañ ke akpainyañ ye mme andiwad ammọ
emaekeene edi adinyam ñkpọudua mfo.
10“ ‘Ideen Pesia, Lidia ye Pud
ekesịne ke atu udịmekọñ mfo.
Ammọ emaekọọñ atuekọñ ye itam ukwak ammọ ke ndibene mfo,
a-akunọọhọ fiin uyai.
11Ideen Afaad ye Helek
emaekpeme ndibene mfo ekanna ekʌk;
ideen Kamaad
ekeba ke mme tọwa mfo.
Ammọ emaekọọñ atuekọñ ammọ ke ndibene mfo;
ammọ emaenam uyai mfo afọn ama.
12“ ‘Taasis ekenam ndubeghe ye afo ato ntak uwak inie mfo; ammọ emaedat silfa, ukwak, tian ye leed edikpuho ebọ ñkpọ udua mfo.
13“ ‘Kriis, Tubal ye Mesek emaenam ndubeghe ye afo; ammọ emaesidat mme awo ye mme ñkpọ udua brọns edinyam unọ fiin enyʌñ ebọ mme ñkpọ udua mfo.
14“ ‘Ideen Bed Tokama ekekama enañmbakara sariọd, enañmbakara kafalri ye ñwaahadọñki ekpəho ye ñkpọ udua mfo.
15“ ‘Ideen Rod ye Dedan emaenyam udua ye afo, uwak mme mben akpainyañ ñko ekedo mme adebudua mfo; ammọ ekukpe fiin ke nnʌk eniin ye abubịd eto.
16“ ‘Aram#27:16 Ataa uwak mme ikpañwed Hibru; usʌk mme ikpañwed Hibru ye Siriak ewet Edom ekenam ndubeghe ye afo ke ntak uwak ñkpọ udua mfo; ammọ emaedat nsem-nsem itiad, iduod-iduod afọñ, awedeñwed ñkpọ usọ, eti linen, kọral ye mme rubi edep ñkpọ udua mfo.
17“ ‘Yuda ye Isrel emaenyam udua ye afo; ammọ emaedat wiid ye usasañ ñkpọ a-atooho Minịd ekpəho, ekama adanakwọọk, adan ọlif ye baam ekpəho ye mme ñkpọ udua mfo.
18“ ‘Damaskọs ekenam ndubeghe ye afo ato ntak uwak ñkpọ usọ mfo ye uwak inie mfo. Ammọ ekekama wain a-atooho Helbon, idededọñ a-atooho Saha 19ye mme atu ukọd mbon Daan ye mbon Kriis e-ekebenne eto Wedan ke Aisal ekpəho ye mme ñkpọ udua mfo: uyaiya ukwak, akesia ye kalamus.
20“ ‘Dedan ekekama blañked esibịtte ke edem enañmbakara enyam udua ye afo.
21“ ‘Arebia ye afịd nditọ ideen abọọñ Keda ekedo mbon udua mfo; ammọ ekekama nditọedọñ, mme akukịmedọñ ye mme ebod enam ndubeghe ye afo.
22“ ‘Mme anyamudua Seba ye Raama emaenyam udua ye afo; ammọ ekedat ataa nti ye kutọ-kutọ anem ufịk mfiọññọ ye nsọñudua itiad, ye kold enyam udua ye afo.
23“ ‘Haran, Kane ye Idịn ye mbon udua Seba, Asiria ye Kilmad emaenyam udua ye afo. 24Ke itie udua mfo ammọ ekenyam udua ye afo ke mfọọn afọñidem, bru afọñ, awedeñwed ñkpọ usọ ye udʌk e-ewañña enyʌñ ebọp yak anekke asọñ.
25“ ‘Mme nsʌñikañ Taasis edo
se ikoono ñkpọ udua mfo.
Ndoppo mbiomo uyọhọ fiin ke esịd
nte afo awatta ke akpainyañ.
26Mme awadudeñ mfo uben fiin
edʌk akpainyañ.
Ado ekamba ayobio edem usakkautịn ayaubʌñ fiin mbai-mbai
ke ufọọd akpainyañ.
27Inie mfo, ñkpọudua ye ñkpọmbịn mfo,
mme anamutom ubom, mme awadinyañ ye mme asiit ndudu ubom mfo,
mme anyamudua mfo ye afịd mbon ekọñ mfo,
ye afịd mbon mfen se isịne ke esịd
eyaedeñ ke esịd akpainyañ
ke usen iduọ mfo.
28Mme mben inyañ eyaenyeeñe
ke ini mme awadinyañ mfo edịisio ñkpo.
29Afịd mbon se iwat udeñ
eyaewuọñọ ekpọñ nsʌñikañ ammọ;
mme anamutom ubom ye afịd mme awadinyañ
eyaesọiyọ eda ke mben mmọọñ.
30Ammọ eyaedịppe uyio
enyʌñ etua ndod-ndod mmọọñayịd ubaña fiin;
ammọ eyaeben ntan eduọk ke iwuod ammọ
enyʌñ ewere ke ntọñ.
31Ammọ eyaekwaat ided ammọ ke ntak mfo
enyʌñ esịne afọñikpo.
Ammọ eyaetua ubaña fiin ke mbʌññọ esịd
ye ke ndod-ndod aseeme.
32Naña ammọ etua enyʌñ eseeme ubaña fiin,
ammọ eyaeseeme aseeme ubaña fiin:
“Anie ke ekekʌp inua akpa nte Tai,
a-akpainyañ akannake anye akʌk?”
33Ke ini ñkpọ udua mfo akewuọhọ aka mme akpainyañ,
afo amaanam uwak idịd ekop uyʌkkọ;
ye uwak inie mfo ye ñkpọ udua mfo,
afo amaanam mme ndidem ederimbod eforo.
34Idahami akpainyañ usep fiin mbai-mbai
ke utəño mmọọñ;
ñkpọ udua mfo ye afịd udịm awo mfo
edeñ ye afo.
35Afịd mbon se idʌñ ke mben akpainyañ
ekop ñkpaidem ubaña fiin;
mme ndidem ammọ ekop ekamba ndịk,
iso ammọ anyʌñ akpəho anọ ndịk.
36Mme anyamudua ke atu mme idịd usaha fiin;
utịd mfo adiọọk eti-eti,
uduunyʌññọ uba aba ke nsi-nsi.’ ”
Currently Selected:
Esikeel 27: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
