Esikeel 26
26
Prọfesi ke Abaña Tai
1Ke ayọhọ afiọñ duob mme keed ke ayọhọ isua duob mme iba, ke akpa usen afiọñ, ikọ Abọọñ amaadinsịm miin ate: 2“Ayịn awo, sia Tai aketañña abaña Yeruselem abo ate, ‘Aha! Inuaatob mme idịd abʌññọ, ndin mme udọk amọ ebeere ennọ; idaha anye amaadʌk atahade do, ami ñyaaforo,’ 3ke ntoro se Abọọñ Andikara atañ ado ami: Ami ñyaanam ikọ ye afo, Tai, ndin ñyaanyʌñ nnam uwak idịd enam ikọ ye afo, nte inyañ atọ adọọk. 4Ammọ eyaewuut mme ndibene Tai enyʌñ enyui mme tọwa amọ eduọọñọ ke isọñ; ami ñyaakwọọk mbio amọ nsio ñnyʌñ nnam anye ado nsaad itiad. 5Ko ke akpainyañ anye adiido itie se ebịt iyịre ukọ iyak, sia ami mmetañ mma, Abọọñ Andikara atañ. Anye ayaakappa ado ñkpọ ndubịme anọ mme idịd, 6ndin akañkañ ayaasobo mme idʌñ amọ ke abod. Ndin ammọ eyaediọọñọ ke ami ndo Abọọñ.
7“Sia se Abọọñ Andikara atañ ado ami: Ami ñyaaben Nebukadnesa#26:7 Ke Hibru Nebukadnesa, asʌk ado Nebukadnesa;ke ufañ ami ye ke uwak itie ke mme ñwed Esikeel ye Yerimaiya. adidem Babilọn, adidem mme ndidem, nto adoro ye mme enañmbakara ye mme sariọd, ye mme mbon ewatta enañmbakara ye ekamba udịmekọñ mbịne Tai. 8Anye ayaakama akañkañ asobo mme idʌñ ndufo ke abod; ayaanyʌñ abọp ñkpọ ekọñ adidat ñnwana ye afo, abọp usʌñ se esaña edọọk ekewuọ ndibene mfo anyʌñ adịppe atuekọñ anwana ye afo. 9Anye ayaabono ñkpọ uwuut ñkpọ ke itie ndibene mfo anyʌñ akama ñkpọ ekọñ amọ awuut mme tọwa mfo. 10Enañmbakara amọ ayaawak tutu esio ntọñ ufʌk fiin. Mme ndibene mfo eyaenyeeñe emaekop uyom mme enañ ekọñ, wakọn ye sariọd ke ini anye adʌkkọ inuaatob mfo nte mme awo edọñọ abio e-emaekewuut ndibene amọ. 11Ñkpad mme enañmbakara amọ eyaesọnnọ afịd efaak mfo; anye ayaawot mbon mfo ye akañkañ, ndin mme ñkpọsọñ abai mfo eyaeduọññọ ke isọñ. 12Ammọ eyaebịme inie mfo enyʌñ edat ñkpọ udua mfo ke ñwo; eyaeboom ndibene mfo enyʌñ ewuut mfọọn ufọk mfo, etoomo mme itiad mfo eduọọk, ñkọrọ eto ye mbio mfo edọñ ke akpainyañ. 13Ami ñyaanam uyom ikwọ mfo atre, ndin awo idiikoppo mbiiñe ikwọ a-atooho mme ekpa mfo aba. 14Ñyaanam afo ado nsaad itiad, anyʌñ akappa itie se etat iyịre ukọ iyak enwan. Awo iduubọppọ fiin aba tutu amama, sia ami Abọọñ ntañ, uyio Abọọñ Andikara ado ami.
15“Se Abọọñ Andikara adọkkọ Tai ado ami: Nte mme isuọ idiinyeeñeke ke uyom iduọ mfo, ke ini mbon se idat unan esioho ñkpo ke ini ewotto mme awo ke ufọọd mfo? 16Ndin afịd nditọ ideen abọọñ mben inyañ eyaesọiyọ ke mme ebekpo ammọ enyʌñ ekpọnnọ afọñ ammọ enịm, enyʌñ esịññe mme aweedeñwed afọñidem ammọ ke idem. Ammọ eyaedat ndịk esịne ke idem, ammọ eyaesọiyọ etie ke isọñ, enyeñ idem afịd ini, eba ke ñkpaidem ubaña fiin. 17Ndin ammọ eyaeseeme eseeme ubaña fiin enyʌñ ubo fiin ete:
“ ‘Se naña usobo fiin, ñwuọnda abio,
a-ayọhọke ye mme awadinyañ!
Afo akedo adudu ke mme akpainyañ,
afo ye mme andidʌñ ke afo;
amaanam ndịk mfo amʌm
afịd awo se ikidʌñ do.
18Idahami mme isuọ enyeeñe
ke usen iduọ mfo;
mme isuọ ke akpainyañ
ekop ndịk ebaña iduọ mfo.’
19“Se Abọọñ Andikara atañ ado ami: Ke ini ami mmaanam nọ afo ado mbiara abio, nte mme abio a-awo imiidʌññọ aba, ndin ami mmaanam akpa atọ adọọk usịm fiin nọ akwa mmọọñ amọ ufʌk fiin, 20idaha ado ami ñyauben fiin nsọiyọ ye mbon e-esọiyọke edʌk ube ebịne mbon esed. Ami ñyaanam afo adʌñ ke ataa idak isọñ, ke itie a-amaakebiara ikpeene, ye mbon e-esọiyọke edʌk ube, ndin afo uduutịmmeke ududat itie mfo ke isọñ mme aduuwem. 21Ami ñyaanam utịd mfo adiọọk, ndin afo uduubaaha aba. Eyauyem fiin, ado awo iduukịtte fiin aba tutu amama, Abọọñ Andikara atañ.”
Currently Selected:
Esikeel 26: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
