Esikeel 25
25
Etañ Prọfesi Ebaña Amọn
1Ikọ Abọọñ amaadinsịm miin ate: 2“Ayịn awo, wuuk iso mfo se nditọ Amọn nyʌñ tañ prọfesi baña ammọ. 3Bo mbon Amọn ate, ‘Ikop ikọ Abọọñ Andikara. Se Abọọñ Andikara atañ ado ami: Sia amaabo “Aha!” ke abaña adisana itie mmi ke ini ekesappake anye, ye ke abaña isọñ Isrel ke ini ekebiatta anye, ye ke abaña ufọk Yuda ke ini eketañña ammọ enyọñọ, 4ke ntoro ami ñyauben fiin nnọ mbon edem Usakkautịn nte inie ammọ. Ammọ eyaebọp itie nnaaekọñ ammọ ye itie nnaa ammọ ke atu ndufo; ammọ eyaedia mfịd ndufo enyʌñ enwọñ mmọọñeba ndufo. 5Ami ñyaanam Raba akappa itie ndidia kamel ñnyʌñ nnam Amọn ado itie nnaa mme edọñ. Ndin ndufo eyaediọọñọ ke ami ndo Abọọñ. 6Sia se Abọọñ Andikara atañ ado ami: Sia afo amaakwak ubọk anyʌñ atuak ñkpad mfo, anem esịd ke afịd idiọọkesịd mfo abaña isọñ Isrel, 7ke ntoro ami ñyaanyanna ubọk mmi udot fiin ke idem ñnyʌñ uben fiin nnọ mme idịd nte ñkpọ mbịme. Ami ñyausọọk fiin nsio ke atu mme idịd ñnyʌñ usobo fiin nsio ke atu mme abio. Ami ñyaubiat fiin, ndin afo ayaadiọọñọ ke ami ndo Abọọñ.’ ”
Prọfesi ke Abaña Mọb
8“Se Abọọñ Andikara atañ ado ami: ‘Sia Mọb ye Sei ekebooho ete, “Se Yuda, ayekappa aba nte afịd mme idịd mfen,” 9ke ntoro ami ñyaatat ñkañ Mọb nnịm anwa-anwa, tọọñọ ke mme abio adaña amọ, Bed Yesimod, Baal Mọọn ye Kiriataim, e-edoññoke uku isọñ ado. 10Ami ñyaaben Mọb ñkọrọ ye nditọ Amọn nnọ mbon edem Usakkautịn nte inie ammọ, mbaak editoiyo mbon Amọn ke atu mme idịd; 11ñko ami ñyaanọ Mọb ufen. Ndin ammọ eyaediọọñọ ke ami ndo Abọọñ.’ ”
Prọfesi ke Abaña Edọm
12“Se Abọọñ Andikara atañ ado ami: ‘Sia Edọm akesioho ufọk Yuda usiene anyʌñ anam ataa ekamba ndudue ke adinam ntoro, 13ke ntoro se Abọọñ Andikara atañ ado ami: Ami ñyaanyanna ubọk mmi ndot mbon Edọm ke idem ñnyʌñ ñwot awo ye unam. Ami ñyaasobo anye, ndin tọọñọ ke Teman tutu awuọ Dedan ammọ eyaekpa ke akañkañ. 14Ami ñyaasio Edọm usiene ke ubọk ikọd mmi Isrel, ndin ammọ eyaenam Edọm naña asaña akekem ke iyadesịd ye ifiobesịd mmi; ammọ eyaediọọñọ usiene mmi, Abọọñ Andikara atañ.’ ”
Prọfesi ke Abaña Filistia
15“Se Abọọñ Andikara atañ ado ami: ‘Sia mbon Filistia ekenamma ñkpọ ami ke usiene, enyʌñ esio usiene ye idiọọkesịd ke esịd ammọ, enyʌñ ekama akaan usua eyem adisobo Yuda, 16anam kop se Abọọñ Andikara atañ mi: Ami ñyaanyanna ubọk mmi ndot mbon Filistia ke idem, ndin ami ñyaasọọk mbon Kered nsio, ñnyʌñ nsobo mbon se isʌhọ ke mben inyañ. 17Ami ñyaasio ammọ ekamba usiene ñnyʌñ mmia ammọ ufen ke ifiobesịd mmi. Ndin ammọ eyaediọọñọ ke ami ndo Abọọñ, ke ini ami mmaasio ammọ usiene.’ ”
Currently Selected:
Esikeel 25: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
