Esikeel 24
24
Yeruselem nte Ako Utem Ñkpọ
1Ke ayọhọ isua usʌkkeed, ke ayọhọ afiọñ duob ke ayọhọ usen duob, ikọ Abọọñ amaadinsịm miin ate: 2“Ayịn awo, wet usen afiọñ mfịn ami nịm, kpa usen afiọñ mfịn ami, sia adidem Babilọn a-asiak ekọñ ye Yeruselem kpa usen mfịn ami. 3Top ntəño-ntəño ñke nọ mbon nsọñiwuod ami bo ate: ‘Se Abọọñ Andikara atañ ado ami:
“ ‘Dot ako ke ikañ; dot ako
nyʌñ nwañña mmọọñ sịn ke esịd.
4Tañ mme mbio unam dọñ ke esịd,
afịd nti itie unam, ukod ye afara.
Koono ataa nti akpọ dọñ ke esịd amọ nọ ayọhọ;
5dat ataa eti edọñ.
Dọñ ifia ke idak amọ nọ mme akpọ;
nekke tem anye nọ afịd
nyʌñ tem mme akpọ ke esịd ado ñko.
6“ ‘Sia se Abọọñ Andikara atañ ado ami:
“ ‘Adọdiọọk anọ abio uduọkiyiib,
ako a-atakka ñkarafañ idahami,
a-ñkarafañ ado imiidiidiaññake!
Sịññe unam ado ñkukʌk keedekeed,
kuusaasat ndomokeed.
7“ ‘Sia iyiib a-anye akeduọkkọ mmọdo asịne ke ufọọd amọ:
Anye akeduọk anye ke nsaad ekamba itiad;
anye ikiduọkkọ ke isọñ,
se ntọñ akpekefʌk.
8Nọ ifiobesịd adọọk nọ enyʌñ esio usiene;
ami ñkeduọk iyiib amọ ke nsaad ekamba itiad,
mbaak edifʌk anye.
9“ ‘Ke ntoro se Abọọñ Andikara atañ ado ami:
“ ‘Adọdiọọk anọ abio uduọk iyiib!
Ami ñko ñyaakọọk eboho ifia ikañ akoñ.
10Ke ntoro kọọk ifia nọ awak,
nyʌñ bara ikañ.
Tem unam ado nọ afọn,
waaha mme ñkpadia;
nyʌñ fọp mme akpọ yak asak.
11Ndin tem ñkaña ako ke ikañ
tutu anye afiop anyʌñ adat,
nọ ato do ndek amọ atara,
ikañ anyʌñ ata ñkarafañ amọ afịd asio.
12Afịd ufen ado ke ikpu-ikpu;
ekamba ñkarafañ amọ imaaha adiwuọ,
kpak ikañ ikanna isio anye.
13“ ‘Ndek mfo ado abʌd-abʌd ido mfo. Sia ami mmaanwana adinam yak afo asana ado afo umaaha isana, afo uduusanake aba tutu ifiobesịd mmi ye afo asuuhọ.
14“ ‘Ami Abọọñ mmetañ. Ini akem ami adinam ñkpọ. Ami ndiitreke adinam; ndiikoppo mbọm, ndiinyʌññọ ntua ñkpọfiọk. Ediikpe ikpe mfo ikeene ido mfo ye mme adinam mfo, Abọọñ Andikara abo.’ ”
Anwaan Esikeel Akpa
15Ikọ Abọọñ amaadinsịm miin ate: 16“Ayịn awo, ñyaaben eta ubọk keed nsobo se anyen mfo ama ataa eti-eti. Ado kuuseeme, kuunyʌñ utua, kuunyʌñ uyak mmọọñayịd uwuọ ke anyen. 17Seeme ke ndobuyio; kuufʌhọ unọọ mme akpañkpa. Kaa iso tobo tọban mfo nọ asọñ nyʌñ sịne ikpaukod mfo ke ukod; kuufʌk ñwainua ye ñwaebek mfo, kuunyʌñ udia ndidia mbon ufʌk ikpo.”
18Ndin ami mmaatañ ikọ nnọ afịd awo ubakusen, ndin akesịm ndubiayio anwaan mmi amaakpa. Ubakusen edem usen ami mmaanam naña ekennọọ uyio ebo nnam.
19Ndin mbon awo emaembịp miin ebo ete, “Nte afo ubooho udọkkọ ñnyịn naña mme ñkpọ ami ibeghe ñnyịn? Ntak afo anamma ñkpọ ntom-o?”
20Ndin ami mmaabo ammọ nte, “Ikọ Abọọñ amaadinsịm miin ate: 21Dọkkọ nditọ Isrel bo, ‘Se Abọọñ Andikara atañ ado ami: Ami ñyaasappa adisana itie mmi, itie udịbe a-ndufo etañña idem ebaña, ñkpọ anọọhọ anyen ndufo inemesịd, ñkpọ a-ndufo emaaha ataa eti-eti. Nditọ ndufo ideen ye ibaan a-ndufo edakkake ekpọñ eyaekpañña ke akañkañ. 22Ndin ndufo eyaenam kpa naña ami nnam. Ndufo idiifʌkkọ ñwainua ye ñwaebek, idiinyʌññọ idia ndidia mbon esitieghe ikpo. 23Ndufo eyaekaa iso eyara tọban ndufo ke iwuod enyʌñ esịne ikpaukod ndufo ke ukod. Ndufo idiifʌhọke, idiinyʌññọ itua, ado ndufo eyaeyeet ke ntak ndiọiñkpọ ndufo enyʌñ eseeme ke atu ndufo. 24Esikeel adiido idiọọñọ inọ ndufo; ndufo eyaenam ukem-ukem se anye anam. Ñkpọ ami amaatịppe, ndufo eyaediọọñọ ke ami ndo Abọọñ Andikara.’
25“Ndin afo, ayịn awo, ke usen se ami ndiibọ ammọ itie udịbe ammọ, inemesịd ye ubọọñ ammọ, ñkpọ anọọhọ anyen ammọ inemesịd, udọñ esịd ammọ, ye nditọ ideen ye ibaan ammọ ñko, 26usen ado awo a-abọkkọke ayaadi adunọ fiin mbʌk. 27Ke ini ado inua mfo ayaatara; afo ayaatañ ikọ ye anye, ndin uduudoppo uyio aba. Ke ntoro afo ayaado ñkpọ idiọọñọ anọ ammọ, ndin ammọ eyaediọọñọ ke ami ndo Abọọñ.”
Currently Selected:
Esikeel 24: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
