Esikeel 22
22
Ubiereikpe ke Abaña Ndiọiñkpọ Yeruselem
1Ikọ Abọọñ amaadinsịm miin ate:
2“Ayịn awo, afo ayaakpe ikpe amọ? Nte afo ayaakpe ikpe abio uduọk iyiib ami? Akpedo ntoro, ben afịd mbubiam adinam amọ wọt anye 3nyʌñ bo ate: ‘Se Abọọñ Andikara atañ ado ami: Afo abio a-abenne nsobo anọọ idem mfo ke adiduọk iyiib ke esịd mfo ñnyʌñ nsappa idem ke adibot mme ubobodñkpọ, 4afo amedue ke ntak iyiib a-afo aduọkkọ; ñko amenyʌñ akappa ado se emaesappa ke ntak mme ubobodñkpọ a-afo abotto. Afo amenam usen mfo aməho, ndin utịd mme isua mfo adiwuọ. Ke ntoro ami ñyaanam afo ado ñkpọ asuenne ke iso mme idịd anyʌñ ado ñkpọ nsaha ke iso afịd mme abio. 5Mbon se ikpere ye mbon se iba ke anyan usʌñ eyauduọi fiin, afo idiọọk abio ami, a-ayọhọke ye ndutịme.
6“ ‘Se naña nditọ ideen abọọñ keedekeed ke Isrel e-ebaaha ke ufọọd mfo ekama adudu ammọ eduọk iyiib. 7Ammọ emiom ete ye eka ke ufọọd mfo; ammọ efiik asenawo enyʌñ etʌkkọ ayịnakpa ye ebekpa ke ufọọd mfo. 8Afo amesịn mme ndisana ñkpọ mmi ke ndek anyʌñ asappa mme Sabad mmi. 9Mbon se ibia mbia nọ ato do eduọk iyiib mmọ eba ke ufọọd mfo; mbon se idia ñkpọ ke mme ñwommo anyọñ abod inyʌñ inañña mbubiam ido mmọ eba ke ufọọd mfo. 10Mbon se isuenne ñkpana nnaa ete ammọ mmọ eba ke ufọọd mfo; mbon se isappa ibaan idaha ebaaha ke itieisọñ ke ini ammọ imiisanake mmọ eba ke ufọọd mfo. 11Awodeen keed asappa anwaan mbọhọidʌñ amọ, mfen asappa anwaan ayịn amọ ikoppo abuud, mfen anyʌñ asappa ayịneka amọ awonwaan, ataa ayịn e-ete amọ abonno, mmọdo eba kpa ke ufọọd mfo. 12Mbon se ibọ ubọkedem nọ ato do eduọk iyiib mmọ ke ufọọd mfo; afo abọ uweene udod. Afo adia idiọọk udod ato mbọhọidʌñ mfo. Ndin afo amemfre miin, Abọọñ Andikara atañ.
13“ ‘Ke akpanikọ ñyaamia ubọk mmi mbaña idiọọk udod a-afo adiaha ye iyiib a-afo aduọkkọ ke ufọọd mfo. 14Nte afo ayaasọñ esịd me ubọk mfo ayaasọọñọ ke usen a-ami nduunam fiin ñkpọ? Ami Abọọñ mmetañ, ndin ñyaanyʌñ nnam. 15Ami ñyausuan fiin ke atu mme idịd ñnyʌñ usuan ndọñ ke mme abio; ñnyʌñ nnam ndek mfo atre. 16Ke ini emausappa fiin ema ke anyen mme idịd, afo ayaadiọọñọ ke ami ndo Abọọñ.’ ”
17Ndin ikọ Abọọñ amaadinsịm miin ate: 18“Ayịn awo, ufọk Isrel ibaaha ufọn aba innọ miin; afịd ammọ edo kọpa, ye tian, ye ukwak ye leed e-eyaaha esịn ke esịd ñkpọdiọhọ ikañ. Ammọ edo nduwai silfa. 19Ke ntoro, se Abọọñ Andikara atañ ado ami: ‘Sia afịd ndufo emaekappa nduwai, ami ñyaitañ ndufo mbok ke Yeruselem. 20Kpa naña etañ silfa, kọpa, ukwak, leed ye tian edọñ ke ikañ nọ ammọ etara akeene akpọsọñ ufiob, kpa ntoro ke ami ndiikoono ndufo ke iyadesịd ye ifiobesịd mmi ndọñ ke esịd abio ñnyʌñ nnam ndufo etara. 21Ami ñyaikoono ndufo mbok ñnyʌñ ifuut ndufo ke ikañ ifiobesịd mmi, ndin ndufo eyaetara ke esịd amọ. 22Kpa naña silfa atara ke ikañ, ntoro ke ndufo ediitara ke esịd amọ, ndin ndufo eyaediọọñọ ke ami Abọọñ mmenwañña ifiobesịd mmi ifʌk ndufo.’ ”
23Ikọ Abọọñ amaamaana adinsịm miin ate: 24“Ayịn awo, dọkkọ isọñ bo ate, ‘Afo ado isọñ a-awo imiinamma asana, edịm inyʌññọ idep iduọkkọ ke usen ifiobesịd.’ 25Nditọ ideen abọọñ#22:25 Septuakin; ke Hibru mme aku, mme adaiwuod amọ, edʌk adu ke esịd amọ nte ekpe akuun ke ini awaiya se anye amʌm; ammọ eta mme awo, ekoono inie ye ñkpọuto enyʌñ enam mme ebekpa ewak ke esịd amọ. 26Mme aku amọ ebiat mbed mmi enyʌñ esappa mme ndisana ñkpọ mmi; ammọ ikịtte ukpʌhọde ke ufọọd adisana ñkpọ ye ñkaña ñkpọ; ammọ ekpeep mme awo ebo ke ukpʌhọde ibaaha ke ufọọd se isana ye se imiisanake; ndin ammọ enyʌñ ebọọp anyen ebaña mme Sabad mmi, anam ammọ ensịn miin ke ndek ke atu ammọ. 27Mme ikpọawo amọ eba nte mme ewaikọd ewai unam; ammọ eduọk iyiib enyʌñ ewot mme awo nọ ato do edia idiọọk udod. 28Mme prọfed amọ ekama nsu-nsu ñkukịd ye idiọñ abiaña efʌk mme adinam ami. Ammọ ebo ete, ‘Se Abọọñ Andikara atañ ado ami’ ke ini Abọọñ imiitañña. 29Mbon isọñ ado ewo ñwo enyʌñ eyịp inọ; ammọ efiik mme uweene ye mbon unana enyʌñ ediọọk mme isenawo ukama, inọọhọ ammọ unen ammọ.
30“Ami mmaayem awo ke atu ammọ se ikeme adibọp akọ inyʌñ ida ke iwuod isọñ ado ke iso mmi ke itie nte awuudo mbaak ami ndisobo anye, ado ami ñkekịtte awo ndomokeed. 31Ke ntoro ami ñyaanwañña ifiobesịd mmi mfʌk ammọ ñnyʌñ nsobo ammọ ke ikañ iyadesịd mmi, ñnyʌñ mben afịd se ammọ ekenam ndot ammọ ke iwuod, Abọọñ Andikara atañ.”
Currently Selected:
Esikeel 22: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
