Esikeel 21
21
Babilọn nte Akañkañ Ubiereikpe Abasi
# 21: Ke mme ikpañwed Hibru ewet Esi 21:1-32 nte Esi 21:6-37. 1Ikọ Abọọñ amaadinsịm miin ate: 2“Ayịn awo, wuuk iso mfo se Yeruselem nyʌñ kwọrọ ikọ dian adisana itie. Tañ prọfesi dian isọñ Isrel 3nyʌñ bo isọñ Isrel ate: ‘Se Abọọñ atañ ado ami: Ami ndaaha ye afo. Ami ñyaadʌt akañkañ mmi nsio ke efọk ñnyʌñ ñkpok ndinen awo ye mbon ibak nsio ke ufọọd mfo. 4Sia adooho ñyaakpok ndinen awo ye mbon ibak, akañkañ mmi ayaawuọ ke efọk adiana afịd awo tọọñọ ke usuuk tutu asịm adoro. 5Ndin afịd awo eyaediọọñọ ke ami Abọọñ mmesio akañkañ mmi ke efọk; anye idiitịmmeke idʌk aba.’
6“Ke ntoro, ayịn awo, mịm mmịm! Mịm ke iso ammọ ye ibʌññọ esịd ye adiyịk-adiyịk mfʌhọ. 7Ndin ammọ emaubịp fiin ibo, ‘Nsoo ido nọ afo amịm mmịm?’ afo ayaabo ammọ ate, ‘Ke ntak etob a-adiighe. Afịd esịd ayaayeeme ye ndịk, afịd ubọk ayaanyʌñ atọ atekke, ikịm ayaanyʌñ awaaña awo adiaat ke afịd ukod.’ Asʌk adi! Ke akpanikọ ayaatịppe, Abọọñ Andikara abo.”
8Ikọ Abọọñ amaadinsịm miin ate: 9“Ayịn awo, tañ prọfesi nyʌñ bo ate, ‘Se Abọọñ atañ ado ami:
“ ‘Akañkañ, akañkañ,
emaeban, emaenyʌñ etʌk,
10emaeban anye ebeeñe enịm enọ uwot awo,
emaetʌk anye nọ asem nte akebkeb!
“ ‘Nte ana ñnyịn idaara ke esañubọọñ ayịn ubọọñ mmi? Akañkañ asasua afịd utọ eto ado.
11“ ‘Akena nte etọtʌk akañkañ,
nọ ato do emọmʌm anye ke ubọk;
ebaban enyʌñ etọtʌk anye,
nọ ato do eben anye esịn ke ubọk awodawo.
12Ayịn awo tua, bọñ ñkpo nyʌñ seeme,
sia adiidoro ikọd mmi ke idem;
adiidoro afịd nditọ ideen abọọñ Isrel ke idem.
Etop ammọ eyak enọ akañkañ
ye ikọd mmi ñko.
Ke ntoro, mia esịd mfo.
13“ ‘Idomo idiitreketre adidi. Ndin nsoo idiido adieke esañubọọñ a-akañkañ imiimaaha imiikaaha iso? Abọọñ Andikara atañ.’
14“Ke ntoro, ayịn awo, tañ prọfesi,
nyʌñ mia ubọk mfo iba.
Yak akañkañ asobo akañ iba,
akpekọm akañ ita.
Ado akañkañ uwot awo,
akañkañ akwa uwot awo,
anye akanna ammọ akʌk.
15Nọ ato do esịd aduọ mme awo,
ñkpañña enyʌñ ewak,
ami mmenịm akañkañ nnọ uwodawo
ke afịd inuaatob ammọ.
Se! E-enam anye akeppe nte akebkeb,
e-eben anye ekama nọ ewot awo.
16Afo akañkañ, kpịkke nọ nnasia,
ndin kpịkke nọ ufiin,
nte adodo i-iso ikwa mfo awọññọke aka.
17Ami ñko ñyaamia ubọk mmi iba,
ndin ifiobesịd mmi ayaasuuhọ.
Ami Abọọñ ntañ.”
18Uyio Abọọñ amaadinsịm miin ate: 19“Ayịn awo, siak akpọusʌñ iba nọ akañkañ adidem Babilọn asaña, naña ammọ mba etọọñọ ke ukem idịd. Nam idiọọñọ nịm ke itie nte usʌñ ado awakka adʌk abio. 20Siak usʌñ keed nọ akañkañ aka Raba mbon Amọn, ye keed mfen nọ aka Yuda ye Yeruselem akpọsọñ abio. 21Sia adidem Babilọn ayaasọñọ ada ke ñwaaña usʌñ ado, ke iwuod akpọusʌñ iba ado, adibre idiọñ nọ adiọọñọ se idiitịppe ke ini iso. Anye ayaakama mme idañ asịn afia, anye ayaakaa nduuñọ ke atu mme ubobodñkpọ amọ, anye ayaaduuño ati. 22Afia ayaasio Yeruselem ke ubọk nnasia amọ, do ke anye adiinịm ñkpọ uwuut ndibene, itie se ediinọ uyio ibo ewot awo, adisio ñkpo ekọñ, adinịm ñkpọ uwuut ndibene mbaha mme inuaatob, adibọp usʌñ ñnyʌñ ndaaha nnaekọñ. 23Anye adiiba nte nsu-nsu idiọọñọ anọ mbon se ikikaaña akaaña ye anye, ado anye ayaatoiyo ammọ mme ndudue ammọ anyʌñ adat ado asịn ammọ ukad.
24“Ke ntoro se Abọọñ Andikara atañ ado ami: ‘Sia ndufo emenam awo atoiyo mme ndudue ndufo ato ke nsọñiwuod ndufo, ndufo eyaara mme idiọọkñkpọ ndufo ke afịd se ndufo enam; sia ndufo emenam ami, eyaisịn ndufo ukad.
25“ ‘Afo idiọọk ye ibak akpanabọọñ Isrel, u-usen mfo amaadikem, i-ini ufen mfo amaadiyọhọ iduọiyọ, 26se Abọọñ Andikara atañ ado ami: Yaara tọban, yaara anyanya. Idiidooho naña akesido aba. Eyaebenne mbon usuuhọ itie enyʌñ esuuhọ mbon se ikiba ke ñkoñ-ñkoñ itie. 27Nsobo! Nsobo! Ami ñyaanam anye ado nsobo! Anyanya idiibaaha aba tutu ataa andinie amọ adi; anye ke ndiiyaak nnọ.’
28“Ndin afo, ayịn awo, tañ prọfesi nyʌñ bo ate, ‘Se Abọọñ Andikara atañ ado ami ke abaña nditọ Amọn ye mme usọñanyen ammọ:
“ ‘Akañkañ, akañkañ,
e-esiooho ebo awot awo,
e-etʌkkọ anye nọ adia awo
anyʌñ amịneñ nte akebkeb!
29Kpa ye nsu-nsu ñkukịd e-ekịtte ubaña fiin
ye abiaña idiọñ e-ebreke ubaña fiin,
ediiben anye idot ke mme itọñ
mbon ibak e-eyemme ediwot,
a-adooho usen ammọ adikem,
a-adooho ini ufen ammọ amaayọhọ aduọi.
30“ ‘Yak akañkañ atịmme anyọñ efọk amọ.
Ke itie e-ekubotto fiin,
ke isọñ emana mfo,
ami ñyaakpe ikpe mfo.
31Ami ñyaanwañña ifiobesịd mmi ufʌk fiin
ñnyʌñ mfuud ikañ iyadesịd mmi uduọk fiin;
ami ñyauyaak fiin nsịn ke ubọk mbon afai,
mbon e-enieghe ifiọk ebaña nsobo.
32Afo ayaado ifia anọ ikañ,
eyaeduọk iyiib mfo ke isọñ emana mfo,
awo iduutoiyoke fiin aba;
sia ami Abọọñ mmetañ.’ ”
Currently Selected:
Esikeel 21: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
