Esikeel 10
10
Ubọọñ Abasi Akpọñ Tembịd
1Ami mmaase, ndin mmaakịt mbid ebekpo nsọñudua itiad ke anyọñ a-akedoroke mme serubim ke iwuod. 2Abọọñ amaabo awodeen a-akesịneke afọñ linen ate, “Dʌk kaa ke ufọọd mme wiil a-asịneke ke idak mme serubim. Woppo eboho ikañ ke ufọọd mme serubim nọ uyọhọ ubọk nyʌñ ben ammọ ke suan ke abio.” Nte ami ñkesʌkkọ nse, anye amaadʌk akaa.
3Idahami mme serubim ekeda ke edem usuuk tembịd ini a-awodeen ado akedʌkkọ aka, ndin ntọñanyọñ amaayọhọ ataa esịd-esịd akwere. 4Akem ubọọñ Abọọñ amaadakka ke anyọñ serubim ado akaa inuausʌñ tembịd. Ntọñanyọñ amaayọhọ tembịd, ndin uyamma ubọọñ Abọọñ amaayọhọ akwere. 5Ekeme aditie ke akwere esiin ekop uyio serubim ke anyan usʌñ, nte ekop uyio Abasi Andikponñkan#10:5 Ke usem Hibru Abasi Andikponñkan ado El-Sadai ke ini anye atañña ikọ.
6Ke ini Abọọñ akenọọhọ awodeen a-akesịneke linen do ewʌhọ ate, “Dappa ikañ ke ufọọd mme wiil ado, ke atu mme serubim,” awodeen ado amaadʌk akeda ke ñkañ wiil keed. 7Ndin keed ke atu mme serubim ado amaanyanna ubọk atuuk ikañ a-akebaaha ke atu ammọ. Anye amaasio ubaak ebok ikañ asịn ke ubọk awodeen a-akesịneke afọñ linen, ndin anye amaabọ aben awuọ. 8(Emaekeme adikịt mbid ubọk awo ke idak mba mme serubim ado.)
9Ami mmaase, ndin mmaakịt wiil inaañ ke ñkañ serubim, keed ke ñkañ serubim keedekeed; mme wiil ado ekesem nte itiad topas. 10Amaado naña ammọ ekeba, naña ammọ inaañ ekeba ukem-ukem; ammọ keedekeed ekeba naña wiil akpeba ke ufọọd wiil. 11Nte ammọ ekesañake eka, ammọ emaekeme edika ñkañ keed akeedodo a-mme serubim ado ekewọññọke iso ewọt; mme wiil ado ikiwọññọke naña mme serubim ado esañake eka. Mme serubim ado ekeka ubeñ nte iwuod ammọ akewọt, iwọññọke ke ini ammọ esañake. 12Anyen akeyọọyọhọ afịd idem ammọ, ye edem ammọ, mme ubọk ye mme mba ammọ, kpa naña akeyọhọ wiil ammọ naña inaañ. 13Ami mmaakop naña ekekoot mme wiil ado “mme ukakanna wiil.” 14Mme serubim ado keedekeed ekenieñe iso inaañ: Iso keed akedo iso serub, ayọhọ iso iba akedo iso awo, ayọhọ iso ita ado iso ekpe, ndin ayọhọ iso inaañ ado iso ntrukpuum.
15Akem mme serubim emaedakka edọọk anyọñ. Mbon ami edo mme aduuwem ñkpọ a-ami ñkekịtte ke mben Inyañ Keba. 16Ke ini mme serubim ado ekedakkake isañ, mme wiil ado ke ñkañ ammọ emaenyʌñ edakka isañ; ndin mme serubim eketat mba ammọ adidakka ñkpọñ isọñ, mme wiil ado ikikpọññọ ñkañ ammọ. 17Ke ini mme serubim ado eketuakka eda, ammọ emaenyʌñ etuak eda; ndin ke ini mme serubim ekedakkake edọọk, ammọ emaedakka edọọk ñko ye ammọ, sia sịbidịd mme aduuwem ñkpọ ado mmọdo akeba ammọ ke idem.
18Ndin ubọọñ Abọọñ amaadakka akpọñ inuausʌñ tembịd anyʌñ akeda ke anyọñ mme serubim. 19Nte ami ñkesʌkkọ nse, mme serubim ado emaetat mba ammọ enyʌñ edakka ekpọñ isọñ, ndin nte ammọ ekaaha, mme wiil ado emaekaa ye ammọ. Ammọ emaekeda ke ntondʌk inuaatob ukañ edem usakkautịn ufọk Abọọñ, ndin ubọọñ Abasi Isrel amaaba ke anyọñ ammọ.
20Mbon ami ekedo mme aduuwem ñkpọ a-ami ñkekịtte ke idak Abasi Isrel ke mben Inyañ Keba, ndin ami mmaadiọọñọ mbo ke ammọ edo mme serubim. 21Ammọ keedekeed ekenie iso inaañ ye mba inaañ, ndin mbid ubọk awo aba ke idak mba ammọ. 22Iso ammọ ekeba ukem nte mbon a-ami ñkekịtte ke mben Inyañ Keba. Ammọ keedekeed emaenen iso ammọ esaña nnen-nnen.
Currently Selected:
Esikeel 10: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
