Esikeel 11
11
Ubiomikpe Abasi ke Abaña Yeruselem
1Akem Sịbidịd amambenne miin ke anyọñ anyʌñ amben akewuọ inuaatob ufọk Abọọñ a-asakkaiso ase usakkautịn. Do ke ntondʌk inuaatob ado ideen edịb mme ition emaeba, ndin ami mmaakịt Yaasania ayịn Asọọ ye Pelatia ayịn Benaiya, mme adadusʌñ ke abio, ke atu ammọ. 2Abọọñ amambo miin ate, “Ayịn awo, mbon ado edo ideen e-eduakka idiọọk ye mbon se inọ idiọọk item ke abio ami. 3Ammọ ebo ete, ‘Nte idooho mmi-mmi ke ekemaana ebọọp mme ufọk ñnyịn? Abio ami ado ako, ñnyịn inyʌñ ido unam ke esịd amọ.’ 4Ke ntoro tañ prọfesi dian ammọ; tañ prọfesi, ayịn awo.”
5Akem Sịbidịd Abọọñ amaandoro miin ke idem, anyʌñ ambo miin yak mbo nte: “Se Abọọñ atañ ado ami: Se ndufo etañ ado ami, ndufo mme adadusʌñ ke Isrel, ado ami mmediọọñọ se isịne ndufo ke esịd. 6Ndufo emewot uwak awo ke abio ami enyʌñ enam mme efaak eyọhọ ye akpo awo.
7“Ke ntoro se Abọọñ Andikara atañ ado ami: Mme akpo awo a-ndufo etoomoke eduọñọ do edo unam ndin abio ami ado ako, ado ami ñyaibịn ndufo nsio ke esịd. 8Ndufo ebaabaak akañkañ, ndin akañkañ ke ami ndiiben ikeene ndufo, ado Abọọñ Andikara atañ. 9Ami ñyaibịn ndufo nsio ke abio ami, ñnyʌñ iyaak ndufo nsịn ke ubọk mme isenawo, ñnyʌñ inọ ndufo ufen. 10Ndufo eyaeduọññọ ke akañkañ, ndin ami ñyaakpe ikpe ndufo ke mme adaña Isrel. Ndin ndufo eyaediọọñọ ke ami ndo Abọọñ. 11Abio ami idiidooho ako inọ ndufo, ndufo ñko idiidooho unam ke esịd amọ; ami ñyaakpe ikpe ndufo ke mme adaña Isrel. 12Ndin ndufo eyaediọọñọ ke ami ndo Abọọñ, sia ndufo ikeeneke mme ewʌhọ mmi inyʌññọ inịm mme mbed mmi, ado enam ñkpọ ekeene ido mme idịd i-ikannake ndufo ekʌk.”
13Idaha a-ami ñkesʌkkọ ntañ prọfesi, Pelatia ayịn Benaiya amaakpa. Ndin ami mmanduọ ñkʌp iso ke isọñ ñnyʌñ ntua ke akpọsọñ uyio nte, “Sai, Abọọñ Andikara! Nte afo ayaasobo ñyọhọnsʌhọ ufọk Isrel?”
Enwọñọ Adiben Isrel Ntịmme Ñnyọñ Ndi
14Ikọ Abọọñ amaadinsịm miin ate: 15“Ayịn awo, mbon Yeruselem etañ ntom ebaña mme emọ-emọ mbon ekebịneke esio ke idʌñ ye afịd nditọ Isrel mfen, ‘Ammọ enyọọñ usʌñ ekpọñ Abọọñ; ekinọ ñnyịn isọñ ami nte unen udeeme ñnyịn.’
16“Ke ntoro bo ate: ‘Se Abọọñ Andikara atañ ado ami: Akpesʌkado a-ami ñkebịnne ammọ ñka anyan usʌñ ke atu mme idịd ñnyʌñ nsuan ammọ ke atu mme abio, ado ke etək ini ami mmedo itie udịbe nnọ ammọ ke mme abio a-ammọ ekaaha.’
17“Ke ntoro bo ate: ‘Se Abọọñ Andikara atañ ado ami: Ami ñyaikoono ndufo ke mme idịd ñnyʌñ iben ndufo ñnyọñ ndi ke mme abio e-ekisuanna ndufo, ndin ami ñyaamaana ñkpọñ isọñ Isrel inọ ndufo.’
18“Ammọ eyaetịmme enyọñ edi do edisịññe afịd ndedeghe mbid ñkpọ ye mme mbubiam ubobodñkpọ. 19Ami ñyaanọ ammọ esịd keed ñnyʌñ nsịn ammọ ufa sịbidịd ke idem; ami ñyaasio ammọ esịd itiad ñnyʌñ nsịn ammọ esịd abʌk. 20Ndin ammọ eyaekeene mme ewʌhọ mmi enyʌñ ekpeme edinịm mme mbed mmi. Ammọ eyaedo ikọd mmi, ami ñyaanyʌñ ndo Abasi ammọ. 21Ado amaado mbon esịnne esịd ammọ ke ndedeghe mbid ñkpọ ye mme mbubiam ubobodñkpọ ammọ, ami ñyaaben se ammọ enam ndot ammọ ke iwuod, Abọọñ Andikara atañ.”
22Ndin mme serubim, ye mme wiil ke ñkañ ammọ, emaetat mba ammọ, ndin ubọọñ Abasi Isrel amaadoro ke anyọñ ammọ. 23Ubọọñ Abọọñ amaadakka ke esịd abio aketuak ada ke anyọñ ekamba abod a-abaaha ke edem usakkautịn abio. 24Sịbidịd amandịppe miin aben akesuuk anọ mbon eketañña esio ke idʌñ ekoono ekaa Babilọn ke ñkukịd a-Sịbidịd Abasi akenọọhọ.
Akem ñkukịd a-ami ñkekịtte amañkpọñ miin, 25ndin ami mmaadọkkọ mbon eketañña esio ke idʌñ afịd ñkpọ se Abọọñ akeñwọt miin.
Currently Selected:
Esikeel 11: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
