Esikeel 1
1
Ntọọñọ Ñkukịd Esikeel
1Ke ayọhọ isua edịb mme duob mmi, ke ayọhọ usen ition ke ayọhọ afiọñ inaañ, ke ini ami ñkebaaha ye mbon ekebịneke esio ke idʌñ Isrel ke mben Inyañ Keba, mme hefịn emaebeere ndin ami mmaakịt mme ñkukịd e-etooho Abasi.
2Ke ayọhọ usen ition ke afiọñ ado, akedo ayọhọ isua ition tọọñọ nte ekeben Adidem Yehoiyakịn esio ke idʌñ, 3uyio Abọọñ amaadisịm aku Esikeel, ayịn Busi, ke mben Inyañ Keba ke isọñ Babilọn. Do ubọk Abọọñ amaadoro anye ke idem.
4Ami mmaase, ndin ami mmaakịt ayobio naña ato adoro asọiyọ adi, ekandịk ntọñanyọñ ye amịneñmịneñ akebkeb, ñyayamma unwana anyʌñ akanna anye akʌk. Ufọọd ikañ ado akeba nte nsem-nsem ukwak, 5ndin se ikiba nte aduuwem ñkpọ inaañ ekesịne ke esịd ikañ ado. Ke ndañkịd ammọ ekebit awo, 6ado ammọ keedekeed emaenie iso inaañ ye mba inaañ. 7Ukod ammọ ekedo nnen-nnen; ñkpad ammọ ekeba nte ake ñyịn enañ ndin ammọ emaesem nte brọns e-etʌkkọtʌk. 8Ammọ emaenie ubọk awo ke idak mba ammọ ke naña ñkañ ammọ inaañ. Afịd ammọ inaañ emaenie iso ye mba, 9ndin mba keed amaatuuk emọ-emọ mba. Ammọ keedekeed ekesaña nnen-nnen; ikiwọññọke iso ke ini ammọ esañake.
10Iso ammọ ekeba ntom: Ammọ naña inaañ ekenie iso awo, ndin ke ñkañ ubọk nnasia ammọ keedekeed emaenie iso ekpe, ndin ke ufiin ammọ ekenie iso abaakenañ; ammọ keedekeed emaenyʌñ enie iso ntrukpuum. 11Naña iso ammọ ekeba adodo. Ammọ keedekeed emaenie mba se ikitara ika anyọñ, etuuk mba emọ-emọ ke naña ñkañ iba; ndin ammọ keedekeed emaenie mba iba mfen se ikifʌk ammọ idem. 12Ammọ keedekeed ekeneenen iso esaña. Itie akeedodo a-sịbidịd akpekekaaha, ammọ ekeka kpa do, iwọññọke iso ndomokeed. 13Mme aduuwem ñkpọ ami ekeba nte mme ukañ e-esakka ikañ me nte mme ikañ emuum. Ikañ ado amaasak adọọk anyʌñ asak asọiyọ ke ufọọd mme aduuwem ñkpọ ado; anye amaayamma, ndin akebkeb amaakeppe awuọ ke esịd ikañ ado. 14Mme aduuwem ñkpọ ado ekedo efeeñe eka iso efeeñe eka edem nte akebkeb amịneñ.
15Naña ami ñkesʌkkọ nse mme aduuwem ñkpọ ado, ami mmaakịt wiil ke isọñ nte ana ke ñkañ mme aduuwem ñkpọ ami keedekeed, ammọ keedekeed emaenieñe iso inaañ. 16Mme wiil ado ekeba ntom: Ammọ ekesem nte topas, ndin afịd ammọ inaañ ekeba ukem-ukem. Ammọ keedekeed ekeba nte wiil e-enamma esịn ke ufọọd wiil mfen. 17Nte mme wiil ado ekesañake, ammọ ekekeene usʌñ keed ke atu mfọk inaañ se mme aduuwem ñkpọ ado ekesak iso ese; mme wiil ado ikikappake idʌk usʌñ mfen nte mme aduuwem ñkpọ ado ekesañake. 18Mme rim ammọ emaekoñ enyʌñ enie uteeñe, ndin afịd rim inaañ ado emaenie anyen ekanna ekʌk.
19Ke ini mme aduuwem ñkpọ ado ekesañake, mme wiil ado emaesaña ammọ ke ñkañ; ndin mme aduuwem ñkpọ ado emaedakka ekpọñ isọñ, mme wiil ado ñko emaenyʌñ edakka ekpọñ isọñ. 20Itie keed akeedodo a-sịbidịd akekaha, ammọ emaekaa do, ndin mme wiil ado emaenyʌñ esaña edọọk ye ammọ, sia sịbidịd mme aduuwem ñkpọ ado mmọ akesịne ke mme wiil ado. 21Ke ini mme aduuwem ñkpọ ado ekedakkake isañ, ammọ ñko emaenyʌñ edakka isañ; mme aduuwem ñkpọ ado emaeketuak eda, ammọ ñko emaenyʌñ etuak eda; ndin mme aduuwem ñkpọ ado emaedakka ke isọñ, mme wiil ado ñko emaenyʌñ edakka ke isọñ ye ammọ, sia sịbidịd mme aduuwem ñkpọ ado mmọdo akesịne ke mme wiil ado.
22Ñkpọ a-abaaha nte ntotəño ñkpọ, asem nte kristal, amaatara akwe mme aduuwem ñkpọ ami, anyʌñ anie uteeñe. 23Ke idak ntotəño abaitiad ado ammọ emaetat mba ammọ nọ enen eketuuk emọ-emọ, ndin ammọ keedekeed emaenie mba iba-iba e-ekefʌkkọ ammọ idem. 24Ke ini mme aduuwem ñkpọ ado emaekedakka isañ, ami mmaakop uyom mba ammọ, afịt nte uyom mmọọñ a-afeghekefeghe, nte uyio Andikponñkan#1:24 Ke Hibru ado Sadai, nte aditịm udịmekọñ. Ke ammọ emaeketuak eda, ammọ emaesuuk mba ammọ ke isọñ.
25Ndin uyio amaawuọ ato anyọñ ntotəño ñkpọ ado ke anyọñ iwuod ammọ naña ammọ edaaha esuuk mba ammọ. 26Ke anyọñ akọm ado ke anyọñ iwuod ammọ, ñkpọ amaaba nte ebekpo e-ekedatta nsọñudua itiad a-asịneke bru ke esịd enam, ndin ke anyọñ ebekpo ado ñkpọ a-abaaha nte awo amaadoro. 27Ami mmaakịt ke tọọñọ ke itie a-abaaha nte isịn amọ dọọk ke anye akeba nte ukwak e-efọppọ ke ikañ, nte akpedo ikañ ayọhọ ke esịd, ndin ke tọọñọ do suuhọ anye akeba nte ikañ; ñyayamma ikañ amaanyʌñ akanna anye akʌk. 28Kpa naña adʌkabasi awuọ ada ke abubịd anyọñ ke usen edịm, kpa ntoro ke uyamma a-akekannake anye akʌk akeba.
Ami akedo mbid ubọọñ Abọọñ. Ke ini ami ñkekịtte anye, ami mmaaduọ ñkʌp iso ke isọñ, ndin ami mmaakop uyio awo nte atañ ikọ.
Currently Selected:
Esikeel 1: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
