Eseeme 5
5
1 Abọọñ, toiyo, se ikitịppe inọọ ñnyịn;
nekke se, nyʌñ kịt asuenne ñnyịn.
2E-ekappa udeeme ñnyịn eyaak enọ mme isenawo,
e-enọ mbon asen idịd mme ufọk idʌñ ñnyịn.
3Ñnyịn imikappa idoñño nditọakpa,
mme eka ñnyịn edoñño mme ebekpa.
4Ana ñnyịn idep mmọọñ a-ñnyịn inwọññọ;
ekeme adinie ifia ñnyịn ke ekọmudua kpọd.
5Mbon i-ibịneke ñnyịn imʌm ñnyịn ke itịghitịghi;
ñnyịn imikpa mba inyʌññọ inie nduọkadudu.
6Ñnyịn imaisuuk iwuod inọ Iyib ye Asiria
nọ inie uyo se ikem ñnyịn.
7Mme eteete ñnyịn e-ekenamma idiọọkñkpọ ibaaha aba,
ndin ñnyịn ibọ ufen ammọ.
8Mme ifʌn eyikaara ñnyịn,
ndin ibaaha awo se inyaaña ñnyịn isio ke ubọk ammọ.
9Ñnyịn ikereke ibaña uwem ñnyịn, nọ inie uyo
ke ntak akañkañ abaaha ke akpautatan.
10Ikpaidem ñnyịn afiop nte ebohoikañ,
ufiobidem i-imʌm ñnyịn akeene abiọọñ.
11Emaesappa ibaan ke Saiyọn,
ye ñkpʌk ibaan ke mme abio Yuda.
12E-ebọp mme akpanabọọñ ubọk eyịt ke anyọñ;
awo ikponoke mme ñkpisọñ.
13Ñkparawa e-ebọ ufen ke afe ukọkñkpọ;
nditọ ideen eduọññọ anọ udob ifia.
14Mme ñkpisọñ ibaaha aba ke inuaatob abio;
ñkparawa etre mbiiñe ammọ.
15Idaara awuọ akpọñ esịd ñnyịn;
unek ñnyịn akappa ado mfʌhọ.
16Anyanya ayaara ke iwuod ñnyịn aduọ.
Adọdiọọk inọ ñnyịn, sia ñnyịn iminam idiọọkñkpọ!
17Ke ntak ami esịd ñnyịn akpa mba,
ke ntak mme ñkpọ ami anyen ikịm ñnyịn,
18ke ntak Abod Saiyọn, a-anaaha ke nsobo,
mme ewaikọd esaña ke anyọñ amọ.
19Afo, Abọọñ, akara ke nsi-nsi;
ebekpo mfo asọọñọ ada ke afịd emana.
20Nsoo inam afo asʌk asifre ñnyịn anyen?
Nsoo inam afo isịn ñnyịn nọ akpeene ntom?
21 Abọọñ, dat ñnyịn tịmme nọ idem mfo, yak ñnyịn idiitịmme inyọñọ;
nam mme usen ñnyịn ekappa edo ufa naña akedo ke esed,
22ibọhọke afo amaitop ñnyịn aduọọk afịd-afịd,
a-anyʌñ ayat esịd ye ñnyịn abọhọ adaña.
Currently Selected:
Eseeme 5: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
