Ñwed Mbon Kolosi 4
4
Mme Ikọitem Mfen
1Mme eteufọk, inọ nditọufọk ndufo se ifọn inyʌñ idod, sia ndufo emediọọñọ ke ndufo ñko emenie Eteufọk ke hefịn.
2Iyaak idem ndufo isịn ke adibọñ akam, itịñ anyen, inyʌñ iba ke ekọọm. 3Ibọñ akam inọ ñnyịn ñko nọ Abasi akʌkkọ usʌñ anọ eti etob ñnyịn, nọ ato do ñnyịn ikeme adisuan mme ndedịbe ñkpọ Krais, a-adooho ntak a-ami nsịneke ke ñkpakọb. 4Ibọñ akam nọ ami ñkan nsuan eti etob anwa-anwa, naña akpena ami nnam. 5Inie aniọñ ibaña naña ndufo enam ñkpọ ye mbon i-imiisịneke ke atu ndufo; inekke idat afịd ufañ se enie inam ñkpọ. 6Iyak nneme ndufo afịd ini ayọhọ ye mfọn, a-asịneke inem, nọ ato do ndufo ediọọñọ naña ekpebọọrọ afịd awo mbuume.
Akpatre Ekọọm
7Tikikọs ayaidọkkọ ndufo afịd mbʌk ambañake miin. Anye ado ataa adima ayịneka ke Krais, anam utom Abasi ke akpanikọ ke mbuọdidem anyʌñ ado awo nsaña utom ke Abọọñ. 8Ataa akpan ntak a-ami ndọññọ anye ibịne ndufo ado nọ ndufo ediọọñọ naña ñkpọ aba ye ñnyịn, ñko nọ ato do anye idọñ ndufo esịd. 9Anye asʌk adi ye Onesimọs, awo mbuọdidem ye adima ayịneka ñnyịn ke Krais, a-adooho keed ke atu ndufo. Ammọ eyaetañ afịd ñkpọ se iba inọ ndufo.
10Aristakus, emọ-emọ awo ñkpakọb ye ami, a-adọñ ekọọm inọ ndufo, kpa naña Maak, ayịn ayịneka Banabas adọñ. (Ndufo emebọ item se ediinam ibaña anye; anye amaadi ibịne ndufo, idaara anye.)
11Yisọs, e-ekoodo Yọstus, a-adọñ ekọọm ñko. Mbon ami edoñño ukweeñe mme Yuu ke atu mbon e-enamma utom ye ami enọ abioubọọñ Abasi, ndin ammọ ñko edoñño idọñesịd ennọ miin.
12Ebafras, a-adooho keed ke atu ndufo ye ayịnufọk Krais Yisọs, a-adọñ ekọọm. Anye anwana afịd ini ke akam inọ ndufo, ate ndufo ekap esọọñọ eda ke afịd uduak Abasi, ekọt mfọn-mfọn, enyʌñ enie mbuọdidem ayọhọ-ayọhọ. 13Ami mmedo ntiense nnọ anye nte ke anye asʌk anam utom akpọsọñ-akpọsọñ inọ ndufo ye mbon e-ebaaha ke Laodisia ye Herabolis.
14Adima ufan ñnyịn Luk, abiaibọk, ye Demas e-edọñ ekọọm.
15Inam ekọọm mmi asịm nditọeka ñnyịn ke Krais e-ebaaha ke Laodisia ye Nimfa ye ufọkabasi a-abaaha ke ufọk amọ.
16Emaekekoot ñwedetob ami ema inọ ndufo, ikịt ibo ke e-ekoot anye ke ufọkabasi ke Laodisia ndin ndufo ñko enyʌñ ekoot ñwedetob a-atooho Laodisia.
17Dọkkọ Akipus: “Kịt bo ke amenam utom a-afo akebọọhọ ke Abọọñ ama.”
18Ami Pọọl, ñwet ekọọm ami ke ubọk mmi. Itoiyo ñkpọnọ mmi. Mfọn aba ye ndufo.
Currently Selected:
Ñwed Mbon Kolosi 4: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
