Ñwed Mbon Kolosi 3

Adidu Uwem nte Mbon Krais

1Sia emaekenam ndufo eset ye Krais, ikọọñ esịd ndufo ke ñkpọ anyọñ, ke itie a-Krais atieghe ke ubọk nnasia Abasi. 2Ikọọñ akikere ndufo ke ñkpọ anyọñ, ikiikọọñ ke ñkpọ isọñ, 3Sia adooho ndufo emaekpa, ndin idahami e-edịp uwem ndufo ye Krais ke Abasi. 4Ke ini Krais, a-adooho uwem ndufo, amaawuọ iwọt idem, ndufo ñko eyaewuọ ewọt idem ye anye ke ubọọñ.

5Ke ntoro, iwot afịd ñkpọ ederimbod se ito abʌkidem: Usaña esiin, abʌd-abʌd uwem, ndedeghe ido, idiọọkitọñ abʌkidem, ndiọi udọñ ye udọrọ itọñ, a-adooho ukpono ndem. 6Ke ntak mme ñkpọ ami ifiobesịd Abasi asʌk adi. 7Ndufo emaesisaña ke mme utọ usʌñ ami, ke uwem a-ndufo ekeduuho akpa. 8Ado idahami, ana ndufo esiooño idem ndufo ekpọñ afịd mme utọ ñkpọ ami: Iyadesịd, ifiobesịd, udu, ubiad awo anyịñ ye mbubiam ikọ inua. 9Ikiisʌhọ nsu inọọ emọ-emọ, sia ndufo emaekesịññe ñkaan idem ndufo me utọ edu unam ñkpọ ammọ ifep, 10ndin edisịne ufa idem, e-enamma nọ ademme ado ufa ke ifiọk ye mbid Andibod amọ. 11Gentile me Yuu, afọọrọ edʌd me anye i-imiifọọrọke, mbon afai, mbon Siktia, asenawo, afʌn me amanaisọñ ibaaha aba, ado Krais ado afịd, anyʌñ aba ke afịd.

12Ke ntoro, nte mbon A-Abasi amekke anọ idem amọ, ndisana ye ataa ndima, iben mbọm, mfọnido, ye nsuukidem isịne ke idem, ye ifuuro-ifuuro ido ye ime. 13Iyọ ye emọ-emọ inyʌñ ifeen inọ emọ-emọ adieke awo ndufo ndomokeed anieghe mfịna ye awo mfen. Ifeen inọ awo kpa naña Abọọñ akefeen inọọ ndufo. 14Ndin ke akanna afịd mme nti ido ami, isịne ima, a-abọppọ afịd ammọ adian keed ke usʌñ a-afọnnọ ama.

15Yak emem Krais akara ke esịd ndufo, sia nte mbaak idem ke idem keed ekikoot ndufo enọ emem. Ndin inie esịd ekọọm. 16Yak ikọ Krais adʌñ ke idem ndufo mfọn-mfọn nte ndufo ekpeebe enyʌñ enọọ emọ-emọ item ye afịd aniọñ ke adikwọ mme saam, mme ikwọ Abasi ye mme ikwọ Sịbidịd ke esịd ekọọm a-ndufo enọọhọ Abasi. 17Ndin se adodo a-ndufo enamma, me ke ikọ inua me ke adinam, inam afịd ke anyịñ Abọọñ Yisọs, inọ Abasi Ete ekọọm ato ke anye.

Ikọitem A-anieghe Ubon Krais

18Ibaan ndọ, isuuk iwuod inọ mme ebe ndufo naña adot ke Abọọñ.

19Mme ebe, ima ibaan ndufo ikiinyʌñ isọñ ido ye ammọ.

20Nditọ, ikop item inọ mme ete ye mme eka ndufo ke afịd ñkpọ, sia ami anem Abọọñ esịd.

21Mme ete, ikiinam uwem adooro nditọ ndufo, miidooho ntoro ammọ eyaeduọọk idodanyen.

22Mme ifʌn, ikop item mme eteufọk ndufo ke isọñ ke afịd ñkpọ, ndin inam ado, idooho adinam utom anyen awo ke idaha ammọ eseeghe nọ ndufo ebọ mfọn eto ammọ, ado inam ke esịd akpanikọ ye ukpono Abọọñ. 23Se adodo a-ndufo enamma, inam anye ke afịd esịd ndufo nte enam enọ Abọọñ, idooho nte enam enọ awo, 24sia ndufo emediọọñọ ke eyaebọ udeeme ñkpọ akpa eto Abọọñ nte utịb. Ado Abọọñ Krais ke ndufo enam ñkpọ enọọ. 25Awo keed akeedodo a-anamma ndudue eyaekpe ammọ utịb ndudue ammọ, adusad ndomokeed ibaaha.

Currently Selected:

Ñwed Mbon Kolosi 3: ICB

Highlight

Copy

Compare