Akpa Ñwed Tesalonia 2
2
Utom Abasi a-Pọọl Anamma ke Tesalonia
1Ndufo emediọọñọ, nditọeka ke Krais, ke adidi ñnyịn ndise ndufo ikidooho utak-utak. 2Ñnyịn imaibọ ufen ye usọñanyen ke Filipai, naña ndufo imaidiọọñọ, ado ke unwam Abasi, ñnyịn imainie uko adisuan eti etob ikọ Abasi ikereke akpọsọñ ubiọọñọ. 3Sia ebeeñe a-ñnyịn inamma itooho ke ndudue me ke idiọọk akikere, inyʌññọ ido nte ñnyịn iyem adibabiaña ndufo. 4Utu ke ado, ñnyịn itañ ikọ nte mbon A-Abasi amaakenyịmme adiyaak eti etob Abasi nsịn ke ubọk. Ñnyịn inwanake adinem awo esịd, ado inwana adinem Abasi a-adomoke esịd ñnyịn ase. 5Abasi ado ntiense ke ndufo emediọọñọ ke akenaanam ñnyịn ikamake nnem inua, inyʌñọ ifʌhọ ñkpọ ke iso iben mfʌk idiọọk itọñ ñnyịn. 6Ñnyịn ikiyemme itooro ito awo, ikiyemme ito ndufo me awo mfen ndomokeed, akpesʌkado nte mme abọsịd Krais, ñnyịn ikpaikiwọt adudu ñnyịn. 7Ado ñnyịn ikiba nte ntəkayịn ke atu ndufo.
Kpa naña eka nditọ ase ntəkayịn amọ. 8Ñnyịn imaima ndufo eti-eti, anam ñnyịn ima inem esịd adiwuana ye ndufo, idooho eti etob Abasi ikpọọñ, ado uwem ñnyịn ñko. 9Ke akpanikọ ndufo emetoiyo, nditọeka ke Krais, akpọsọñ utom ye ufen ñnyịn. Ñnyịn ikinam utom akonayio ye uweemeayio mbaak ñnyịn idido mbiomo inọọ awo ndomokeed ke idaha a-ñnyịn ikwọrọke eti etob Abasi inọọ ndufo. 10Ndufo edoñño ntiense, ntoro ke Abasi ado ñko, ke naña ñnyịn ikisana, inen, inyʌñ inana ndo ke atu ndufo e-ekenịmme ke akpanikọ. 11Sia ndufo emediọọñọ ke ñnyịn ikinam ñkpọ ye ndufo keedekeed nte ete anam ñkpọ ye nditọ amọ, 12ke adisọọñọ ndufo idem, inọọ ndufo ndọñesịd inyʌñ ikpeiye ndufo adidu uwem a-asañake akekem ke se Abasi ayem, anye i-ikoodo ndufo asịn ke abio ubọọñ ye itooro amọ.
13Ndin ñnyịn isʌk ikaaka iso ikọọm Abasi ye ntak, sia ke ini ndufo ekebọọhọ ikọ Abasi, a-ndufo ekekoppo ito ñnyịn, ndufo ikibọọhọ nte ikọ awo, ado ekebọ nte ikọ Abasi, a-anamma utom ke atu ndufo e-enịmme ke akpanikọ. 14Sia ndufo, nditọeka ke Krais, emaekappa edoñño mme andikpebe mme ufọkabasi ke Yudia, e-ebaaha ke Krais Yisọs. Ndufo emaebọ ufen eto ubọk mbon abio ndufo, ukem ufen se mme ufọkabasi ekebọọ eto mme Yuu, 15e-ekewotto Abọọñ Yisọs ye mme prọfed enyʌñ ibịn ñnyịn esioñño. Ammọ inemme Abasi esịd, enyʌñ eba utọk-utọk ye afịd awo 16ke ammọ aditre ñnyịn aditañ ikọ nnọọ mme Gentile nọ ato do ammọ enie adinyaaña. Ke usʌñ ntom ke ammọ enam mme idiọọkñkpọ akaaka iso atọt. Ifiobesịd Abasi adisịm ammọ ke akpatre.
Udọñ Pọọl Adikise Mbon Tesalonia
17Nditọeka ke Krais, ke ini ekibakkake ñnyịn esio ikpọñ ndufo ke etək ibio ini (ke abʌkidem, idooho ke akikere), ñnyịn imainie ataa ekamba udọñ inyʌñ idomo afịd ukeme adikịt ndufo. 18Sia ñnyịn imaiyem adidi ibịne ndufo. Ke akpanikọ, ami Pọọl, mmaayem adinam ntoro uwak ini, ado Setan amaabiọọñọ usʌñ ñnyịn. 19Sia nsoo ido idodanyen ñnyịn, idadesịd ñnyịn, me anyanya a-ñnyịn idiibọ ubọọñ ke iso Abọọñ ñnyịn Yisọs Krais ke anye amaadi? Nte idooho ndufo? 20Ke akpanikọ ndufo edo ubọọñ ye idaara ñnyịn.
Currently Selected:
Akpa Ñwed Tesalonia 2: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
