Akpa Ñwed Tesalonia 3
3
Etob Nsọọñọnda
1Ndin sia ñnyịn imiikanna iyọ aba, ñnyịn imaikere ke a-afọn ñnyịn adiba ke idem ñnyịn ke Aten. 2Ñnyịn imaidọñ Timoti, a-adooho ayịneka ñnyịn ke Krais ye anam utom Abasi ke adisuan eti etob Krais, adisọọñọ anyʌñ idọñ ndufo esịd ke mbuọdidem ndufo, 3mbaak awo ndufo ndomokeed adiduọ ke mme idomo ami. Sia ndufo emenekke ediọọñọ ke emainịm ñnyịn enọ mme ñkpọ ami. 4Ke akpanikọ, ke ini ñnyịn ikibaaha ye ndufo, ñnyịn imaikaiso aditañ inọọ ndufo ke eyaitʌkkọ ñnyịn. Ndin amaatịppe ñko, kpa nte ndufo etʌmmọ ediọọñọ. 5Ke ntak ami, ke ini ami mmiikikanna mme aba, mmaadọñ nte ebịp ebaña mbuọdidem ndufo. Ami mmaakop ndịk nte ke akeme ido andidomo idomo amaadidomo ndufo ke usʌñ akeedodo utom a-ñnyịn ikinamma akeme ikappa ndo utak-utak.
Etob Idọñesịd Timoti
6Ado Timoti a-ato ukañ ndufo adisịm ñnyịn, ndin anye a-adat eti etob adi abaña mbuọdidem ye ima ndufo. Anye a-atañ inọ ñnyịn ate ke afịd ini ndufo emenie ntiñkpọ se etoiyo ibaña ñnyịn ndin ndufo emeyem adikịt ñnyịn kpa naña ñnyịn ñko iyem adikịt ndufo. 7Ke ami, nditọeka ke Krais, ke afịd nnananyen ye ndutʌhọ ñnyịn iminie idọñesịd ke ndufo ke ntak mbuọdidem ndufo. 8Idahami, ñnyịn iminie ataa uwem, sia ndufo etʌmmọ enie iwuuk ke Abọọñ. 9Die ke ñnyịn ikan adikọọm Abọọñ nọ akekem ke usiene idaara a-ñnyịn inieghe ke iso Abasi ke ntak ndufo? 10Akonayio ye uweemeayio ñnyịn itʌm isịn ifịk ibọñ akam ite ñnyịn ikpikap ikịt ndufo akañ mfen nọ ato do ñnyịn isịn iyọhọ se inana ke mbuọdidem ndufo.
11Ke ami, yak Abasi Ete ke idem amọ ye Abọọñ ñnyịn Yisọs anam usʌñ anwaña inọ ñnyịn adidi ibịne ndufo. 12Yak Abasi anam ima ndufo aka iso atọt anyʌñ ayọhọ aduọi anọ emọ-emọ ye afịd mbon mfen ñko, kpa naña ñnyịn inie ima inọọ ndufo. 13Yak anye isọọñọ ndufo esịd nọ ndufo enana ndudue, ndin esana ke iso Abasi Ete ke ini Abọọñ ñnyịn Yisọs adiidi ye afịd mme ndisana awo amọ.
Currently Selected:
Akpa Ñwed Tesalonia 3: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
