Akpa Ñwed Kọrint 8
8
Ke Abaña Ndidia e-Ewaaha Enọ Ndem
1Ke abaña ndidia e-ewaaha enọ mme ndem, ñnyịn imidiọọñọ ke afịd ñnyịn iminie ifiọk. Ndin ifiọk asaña ye ntañidem, ado ima abọbọp. 2Awo a-akereke ke imọ imidiọọñọ ñkpọ, idiọọñọke ikikem naña anye akpediọọñọ. 3Ado Abasi a-adiọọñọ awo a-amaaha anye.
4Ke ntoro, ke abaña adidia ndidia e-ewaaha enọ mme ndem, ñnyịn imidiọọñọ “Ke ndem idooho ñkpọ ndomokeed ke ederimbod” ñko “Ke Abasi keed kpọd aba.” 5Akpedodo mme “abasi” mfen ebañña, me ke anyọñ me ke ederimbod (kpa naña uwak mme “abasi” ye uwak “mbọọñ” ebañña), 6ñnyịn inie Abasi keed kpọd, a-adooho Ete, a-afịd ñkpọ aketooho anye, a-ñnyịn inyʌññọ idu uwem inọọ. Ñko Abọọñ keed aba, kpa Yisọs Krais, a-afịd ñkpọ aketooho ke anye, a-ñnyịn inyʌññọ idu uwem ito kpa anye.
7Ado idooho afịd awo ediọọñọ ami. Uwa ndem ameghe ubaak awo tutu ayedo ammọ emaedia ndidia uwa, ammọ edikere ke ado ndidia e-ekewaaha enọ ndem, ndin sia esịd ammọ adooho mmem-mmem, ndidia ado akappa ado ndubiam anọ ammọ. 8Ado idooho ndidia anam nọ ñnyịn ikpere Abasi. Idiọọhọdiọọk ye ñnyịn adieke idiaaha, inyʌññọ ifọfọn ye ñnyịn ke ikpitre adidia.
9Ado kpeme, mbaak mme unen mfo adido ñkpọiduọ anọọ awo mmemidem. 10Sia awo mmem-mmem esịd akpekịt nte afo awo ifiọk adia ndidia ke itie ukpono ndem, nte ado ikemeke isọọñọ anye idem adidia ñkpọ e-ewaaha enọ ndem? 11Ndin ayịneka ke Krais a-abaaha ke mmemidem, a-Krais akekpaaha anọ, akịt nsobo ato ke ifiọk mfo. 12Afo umaunam nditọete e-enieghe mmem-mmem esịd edue ke utọ usʌñ ami, afo ñko amedue Krais. 13Ke ntoro, adieke se ami ndia anamma nọ ayịneka mmi ke Krais anam idiọkñkpọ, ami ndiidiaha utọ ndidia ado aba tutu amama, mbaak ami ndinam ammọ eduọ.
Currently Selected:
Akpa Ñwed Kọrint 8: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
