Akpa Ñwed Kọrint 9
9
Mme Unen Pọọl nte Abọsịd
1Nte ami ndooho amanaisọñ? Nte ami ndooho abọsịd? Nte ami ñkikịtte Yisọs Abọọñ ñnyịn? Nte idooho ndufo edo mfịd utom mmi ke Abọọñ? 2Akpesʌkado mmeñkpedooho abọsịd nnọ mbon mfen, mmenịm ke mmedo inọ ndufo! Sia ndufo edo ufiikñkpọ abọsịd mmi ke Abọọñ.
3Ibọọrọ se nnie nnọ mbon e-etieghe ke adimbiom miin ikpe ado ami. 4Ado nte ñnyịn inieghe unen adidia ñnyʌñ ñnwọñ ñkpọ? 5Ado nte ñnyịn inieghe unen adiben anwaan a-anịmme Abasi ke akpanikọ nsaña nnam utom, kpa naña mbed mbon ako ye nditọeka Abọọñ ye Kefas enañña? 6Ado nte ami ye Banabas ikpọọñ imiinieghe unen aditre unam utom nọ idia ñkpọ?
7Anie awo ikpe idem amọ akʌk inwana ekọñ? Anie awo akeme itọ inwañ ado idiaha utịb inwañ ado? Anie awo akpeme ufene ado inwọññọ mmọọñeba ufene ado? 8Ado nte ami ntañ ami ke adudu abʌkidem? Nte Mbed itañña ukem ami? 9Sia e-ewet ke Ñwed Mbed Moses ete: “Kuubọp abaakenañ inua ke ini anye akịmme isọñ utọ abakpa.” Ado nte abaakenañ ke Abasi akere ñkpọ abaña? 10Ke akpanikọ anye atañ ami ibaña ñnyịn. Ii, anye atañ ibaña ñnyịn, sia andikịm isọñ amaakịm, andinuak isọñ anyʌñ anuak, enam ke idodanyen ke mmimọ iyaiwuana ke idọk ado. 11Adieke adooho ñnyịn imitọ ñkpasi sịbidịd ke atu ndufo, nte anekke akpon abọhọ ñnyịn adidọk ñkpọ ikpọkidem ito ndufo? 12Adieke mbon mfen enieghe unen adibọ utọ unwam ami ito ndufo, nte ñnyịn ikpikappa inekke inie unen adibọ unwam ami ikan ammọ? Ado ñnyịn ikikeeneke unen ami.
Utu ke ado, ñnyịn ikaakappa iyọ se adodo mbaak idibiọọñọ eti etob Krais.
13Nte ndufo idiọọñọke ke mbon e-enamma utom tembịd edia eto tembịd, ñko ke mbon e-enamma utom ke itie uwa ekeene ewuana ke ndidia uwa? 14Kpa ke ukem usʌñ ado, Abọọñ anọ mbed ate mbon e-ekwọrọke eti etob ana edia ñkpọ eto eti etop.
15Ado ami ndatta unen ami ndomokeed nnam ñkpọ. Ñnyʌññọ ñwet ewʌhọ ami nọ ato do ndufo enam mme ñkpọ ami ennọ miin. Sia ami mmenyịmme adikpikpa utu ke awo ndomokeed ambọọ miin unen adikpọ inua mbaña ñkpọ ami. 16Ado ami ñkemeke adikpọ inua, ke ini ami ñkwọrọke eti etob Abasi, sia ana ami ñkwọrọ ikọ Abasi. Adọdiọọk annọ miin adieke ami mmiikwọrọke eti etob Abasi! 17Adieke ami ñkwọrọke ke ini awo imiñnyịkkenyịk, mmenie ñkpọ ayịnutom, ado ekpeñnyenyịk atie nte nnam ubiọñutom a-anaaha nnam. 18Nsoo ndin ido udodo mmi? Ukweeñe ado ke adikwọrọ eti etob Abasi mmekeme inam ado ke mfọn, ndin ñyịreke ke ayọhọ unen mmi nte akwọrọikọ Abasi.
Se Pọọl Akekama Ubọkkọ Amọ Anam
19Akpesʌkado ami mmendooho afʌn, ñnyʌññọ ndo inie awo ndomokeed, mmekappa nnam idem mmi afʌn nnọ afịd awo nọ ato do ñkọ uwak-uwak awo naña ñkpekakan nnọ Krais. 20Mmeforo Yuu nnọ mme Yuu nọ ato do ñkọ mme Yuu. Mbon e-ebaaha ke idak mbed mmenyʌñ ñkappa ndo awo a-abaaha ke idak mbed (akpesʌkado a-ami mmembaaha ke idak mbed), nọ ato do ñkọ ukpọñ mbon e-ebaaha ke idak mbed. 21Ami mmenyʌñ ñkappa ntie nte awo i-imiinieghe mbed nnọ mbon i-imiinieghe mbed (akpesʌkado ami mmembọkkọke mbed Abasi ado ami mba ke idak mbed Krais) nọ ato do ñkọ mbon i-miinieghe mbed. 22Mmekappa ndo awo mmemidem nnọ mbon mmemidem, nọ ñkọ mbon mmemidem. Ami mmekappa ndo afịd ñkpọ nnọ afịd awo, nọ ato do ke usʌñ akeedodo ami ñnyaaña usʌk. 23Ami nnam afịd ami ke ntak eti etob Abasi, nọ ato do ami ñkeene ñwana ke mme adidiọñ ami.
Adinie Mfarakeidem
24Nte ndufo idiọọñọke ke nduba, afịd awo emia nduba, ado awo keed kpọd asibọ utịb? Ifeghe nọ ato do ebọ utịb. 25Afịd awo se ika nduba ana enam ataa mbeeñeidem. Ammọ enam ami nọ ato do ebọ anyanya i-imiidiibaaha ke nsi-nsi; ado ñnyịn inam ami nọ ato do ibọ anyanya a-adiiba ke nsi-nsi nsi-nsi. 26Ke ntoro, ami mfegheke itọk nte awo i-imiinieghe iwuuk; ñnwanake anwan nte awo a-aduọọñọke aduọọñọ eta amọ. 27Iyoo, ami ntọ idem mmi eta, ñnyʌñ nnam anye ado afʌn mmi; nọ ato do ke ami mmaakwọrọ nnọ mbon mfen, ami ke idem mmi nsịneke ke atu mbon imiidiidotto adibọ utịb ado.
Currently Selected:
Akpa Ñwed Kọrint 9: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
