Akpa Ñwed Kọrint 7
7
Ke Abaña Ndọ
1Ke abaña se ndufo ekewet ebịp: “A-afọn awodeen aditre inie ewuana ye awonwaan.” 2Ado sia use ye efịbe ekponno eti-eti, yak awodeen keedekeed anie ewuana ye anwaan amọ, awonwaan anyʌñ anie ewuana ye ebe amọ. 3Ebe ana anam ubiọñutom ndọ anọ anwaan amọ, anwaan ñko ana anam kpasʌk ntoro. 4Anwaan inieghe adudu ibaña idem amọ, ado ana ayaak idem amọ anọ ebe amọ. Kpa ke ukem usʌñ ado, ebe inieghe adudu ibaña idem amọ, ado ana ayaak idem amọ anọ anwaan amọ. 5Ikiinyịm emọ-emọ idem ndufo, ibọhọke ado ke unyịmme ndufo, ñko ke etək-etək ini, nọ ndufo ekan eyaak idem ndufo ayọhọ-ayọhọ esịn ke ubọñ akam. Imaikweñe imaana iba keed mbaak Setan adidomo ndufo idomo ato ke unana mfadidem. 6Ntañ ami ke akikere mmi, idooho nte ewʌhọ. 7Ami ñkpaama afịd ideen ekpeba nte ami. Ado awodeen keedekeed a-anie asaña-asaña enọ amọ ato Abasi; awo keed anie enọ anyem, awo mfen anie enọ mfen.
8Yak ami ndọkkọ mbon i-imiidọọhọ ndọ#7:8 Akeme inyʌñ ndo awodeen a-anwaan amọ akpaaha ye mme ebekpa nte ke a-afọn ammọ aditie nte ami, idọọhọ ndọ. 9Ado akpedo ammọ ikanna inie mfadidem, yak ammọ edọ ndọ, sia a-afọn adidọ ndọ akan adikpa iwʌd.
10Mmenọ mbon e-edọọhọ ndọ ewʌhọ ami (idooho ami, ado Abọọñ): Anwaan inaaha adiañña akpọñ ebe amọ. 11Anye akpediañña ndọ, inaaha anye adọ ndọ aba, me idooho ntoro yak anye anam emem ye ebe amọ. Ebe ñko inaaha asio anwaan amọ ndọ.
12Amaado mbon mfen, ami mbo nte (ami, idooho Abọọñ abo): Adieke ayịneka awodeen ke Krais anieghe anwaan i-imiinịmme Abasi ke akpanikọ, ado anwaan ado anyịmme adidʌñ ye anye, inaaha anye asio anye ndọ. 13Awonwaan ñko akpenie ebe i-imiinịmme Abasi ke akpanikọ, ado ebe ado anyịmme adidʌñ ye anye, inaaha anye asio anye ndọ. 14Sia e-enam ebe i-imiinịmme ke akpanikọ asana ato ke anwaan a-anịmme ke akpanikọ, ñko e-enam anwaan i-imiinịmme ke akpanikọ asana ato ke ebe a-anịmme ke akpanikọ. Miikpidooho ntoro, nditọ ndufo ekpedoñño mbubiam, ado naña aba ado, ammọ edoñño edisana.
15Ado adieke anye i-imiinịmme ke akpanikọ awuọhọ ndọ, yak anye anyọñ. Akpetịppe ntoro, mbed ibọppọ nditọeka ke Krais e-enịmme ke akpanikọ sia Abasi abo yak ñnyịn idʌñ ke emem. 16Afo anwaan, anam die adiọọñọ me afo uduunyaaña ebe mfo? Ñko, afo ebe, anam die adiọọñọ me afo uduunyaaña anwaan mfo?
Ke Abaña Ukpəho Ndaha
17Kpayeado, yak awo keedekeed adu uwem nte andinịm ke akpanikọ ke ndaha akeedodo ake Abọọñ anịmme anye akeene naña Abasi akekoot ammọ. Anye ami ado mbed a-ami nnịmme ke afịd ufọkabasi. 18Nte emaefọfọọrọ awodeen edʌd ndin anye abọ ikood? Inaaha anye atịmme akedo afọọrọ edʌd. Nte awodeen akedo afọọrọ edʌd ini anye akebọọhọ ikood? Inaaha anye afọọrọ edʌd. 19Adifọọrọ edʌd me aditre adifọọrọ edʌd idooho ñkpọ ndomokeed. Adinịm mbed Abasi ado akpan ñkpọ. 20Yak awo aba ke ndaha a-anye akebaaha mbemiso anye abọ ikood Abasi.
21Nte afo akedo afʌn idaha a-akebọọhọ ikood? Kuuyak ado ufịna fiin, ado adieke akanna awuọ ke ufʌn, nam ntoro. 22Sia awo a-akedooho afʌn idaha a-anye akebọọhọ ikood ke Abọọñ, awuọ ke ufʌn ke ntak Abasi. Ke ukem usʌñ ado, awo a-akedooho amanaisọñ ke ini anye akebọọhọ ikood, ado afʌn Krais. 23Ekidep ndufo ke ekọmudua; ikiido ifʌn inọọ mme awo. 24Nditọeka ke Krais, yak awo keedekeed a-abọọrọke ikood Abasi, aba ke ndaha a-anye akebaaha ke ini Abasi akekootto anye.
Ke Abaña Mbon I-imiidọọhọ Ndọ
25Ke abaña ndisịre ubọikpa, ami mbọọhọ ewʌhọ nto Abasi, ado mmenọ akikere mmi nte awo e-edatta nte anam akpanikọ ke mbọm Abasi. 26Ke ntak mfịna se iba idahami, ami ñkere ke a-afọn ndufo aditie naña ndufo etie ado. 27Nte amedọ ndọ? Kuuyem adiwuọ ke ndọ. Nte udọọhọ ndọ? Kuuyem anwaan. 28Ado adieke adọọhọ ndọ, afo unamma idiọọkñkpọ; adieke abọikpa adọọhọ ndọ, anye inamma idiọọkñkpọ. Ado mme adọ ndọ eyaenie uwak mfịna ke uwem ami, ndin ñyemme ndufo enie utọ mme mfịna ado.
29Nditọete, se ñnwana aditañ ado, ke ini anekke aməho. Tọọñọ ke ami, yak mbon se inie ibaan ndọ edu uwem nte mbon i-imiinieghe; 30mbon se ifʌhọ, nte mbon i-imiifʌhọke, mbon se idaara, nte mbon i-imiidaarake; mbon e-edeppe ñkpọ, nte idooho ammọ enie ñkpọ ado; 31mbon e-ekamake ñkpọ ederimbod enam ñkpọ, nte mbon i-imiibenne ukpọñ ammọ ikọọñ ke mme ñkpọ ado. Sia naña aba ami ederimbod ami asʌk aboiyo afep.
32Ami ñkpaama ndufo etre adiba ke ayeemensia. Awodeen i-imiidọọhọ anwaan asịn akikere amọ ke ñkpọ Abọọñ, naña anye akpekan anem Abọọñ esịd. 33Ado awodeen a-adọọhọ anwaan, asịn akikere amọ ke ñkpọ ederimbod, naña anye akpekan anem anwaan amọ esịd, 34ndin akikere amọ awawak afañ. Awonwaan i-imiidọọhọ ebe, me adisịre abọikpa, asịn akikere amọ ke ñkpọ Abọọñ. Anye ayem adiwa idem nnọọ Abọọñ ke ikpọkidem ye ke sịbidịd. Ado anwaan ndọ asịn akikere amọ ke ñkpọ ederimbod, naña anye akpekan anem ebe amọ esịd. 35Ntañ ami ke ufọn ndufo, idooho adibọbọp ndufo, ado nọ edu uwem ke eti usʌñ, inieghe ubakka ke esịd ke adinam ñkpọ nnọọ Abọọñ.
36Adieke awo ndomokeed akereke ke imọ idiikanna idu uwem a-adotto ye abọikpa a-anye ayemme idọ, ndin adieke iwʌd amọ anekkeke akpon, ndin anye akere ke akpena imọ idọ ndọ, yak anye anam ntoro. Anye inamma idiọọkñkpọ. Yak ammọ edudọiyọ. 37Ado adieke awo anamma ñkpembiere ke esịd amọ, awo ndomokeed imiinyʌññọ inyenyịk anye, ado anie iwuuk anyʌñ abiide ke imọ ibooho idọ abọikpa i-imiidiọọñọke awodeen akpa, awodeen ado ñko anam eti ñkpọ. 38Ke ntoro, andidọ abọikpa i-imiidiọọñọke awodeen akpa anam nnen-nnen ñkpọ, ado anye i-imiidọọhọ akap afọfọn akan.
39Awonwaan adiana ye ebe amọ adaña nte anye aduuho uwem. Ado adieke ebe amọ akpaaha, anye a-anie unen adidọ awo mfen a-anye amaaha, ado ana awo ado ado awo Abasi. 40Ke akikere mmi, anye ayaakop inemesịd akan, anye akpetre adidọ ndọ, anyʌñ atie naña anye aba. Mmekere ke ami ñko mmenie Sịbidịd Abasi.
Currently Selected:
Akpa Ñwed Kọrint 7: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
