Akpa Ñwed Kọrint 6
6
Ikpe ke Atu Nditọ Abasi
1Adieke keed ke atu ndufo anieghe utọk ye emọ-emọ, nte a-anen adiben mfịna ado ñkaa ikpe ke esob mbon i-imiidiọọñọke Abasi, utu ke eben eka iso ikọd Abasi? 2Ado nte ndufo idiọọñọke ke ikọd Abasi ediikpe ikpe ederimbod? Ndin akpedo ndufo ediikpe ikpe ederimbod, ado nte ndufo ikanna ikpe ntək ikpe? 3Ndufo idiọọñọke ke ñnyịn idiikpe ikpe inọ mme enyere? Nwaanwa dise mme ñkpọ uwem ederimbod ami! 4Ke ntoro, adieke ndufo enieghe ntuaha ke mme ñkpọ ntom, nte a-anen adiben ikpe mbịne mbon e-eduuwem ammọ adooho ñkpọ nsaha ke esịd ufọkabasi? 5Ntañ ami nọ abuud imʌm ndufo. Ado nte ibaaha awo ke atu ndufo a-anieghe aniọñ akem se akpe ikpe ke atu mme andinịm Abasi ke akpanikọ? 6Utu ke ado, ayịneka aben ayịneka akaa ikpe ke esob, kpa ke iso mbon i-imiinịmme Abasi ke akpanikọ!
7Ikpe adibaaba ke atu ndufo awọt ke ndufo ibaaha ufọn ndomokeed. Ntak afo umuuyakka nọ awo udue fiin-e? Ntak a-afo umuuyakka nọ awo utʌk fiin-e? 8Utu ke ado, ndufo ke idem-idem ndufo emetʌk enyʌñ edue awo, enyʌñ enam ami ye nditọeka ndufo ke Krais. 9Nte ndufo idiọọñọke ke mme anam idiọọk ndomokeed idiidʌkkọ abioubọọñ Abasi? Ikiiyak awo ibiaña ndufo: Mme anam use, ye mme akpono ndem, ye mme asịn efịbe, ye ideen e-enieghe ewuana ye emọ-emọ ideen, 10mme inọ, ye mme akpammịn, ye mme abiambia, ye mbon ñwo idiinieghe udeeme ke abioubọọñ Abasi. 11Se usʌk ndufo ekedo adodo. Ado emaiyet ndufo, enam esana, enyʌñ inọ unen ato ke anyịñ Abọọñ ñnyịn Yisọs Krais ye ke Sịbidịd Abasi ñnyịn.
Use ye Efịbe
12Afo abo, “Mmenie unen adinam ñkpọ akeedodo,” ado idooho afịd ñkpọ afọn. “Mmenie unen adinam ñkpọ akeedodo,” ado ndiidʌkkọ afʌn nnọ ñkpọ ndomokeed. 13Afo abo “Ndidia ana anọ idịb, idịb ñko ana anọ ndidia, ado Abasi ayaasobo naña mmọ mba.” Ikpọkidem inaaha inọ use ye efịbe, ado ikpọkidem anie Abọọñ, ñko Abọọñ anie ikpọkidem. 14Ke adudu amọ Abasi amaanam Abọọñ aset ke ñkpa. Anye ayaanam ñnyịn ñko iset ke ñkpa. 15Nte ndufo idiọọñọke ke idem ndufo edoñño mme ñkek idem Krais? Nte ana ami mben mme ñkek idem Krais ñkedian ye mme akpara? Nwaaña nsa-o! 16Nte ndufo idiọọñọke ke awo a-anieghe ewuana ye akpara akappa ado keed ye anye ke ikpọkidem? Sia e-ewet ete: “Iba eyaekappa edo abʌk keed.” 17Ado awo a-adianna idem ye Abasi ado keed ye anye ke sịbidịd.
18Feghe kpọñ use ye efịbe. Afịd ndiọiñkpọ mfen se awo anam, inamma ituuk idem amọ, ado awo a-anamma use ye efịbe a-anam idiọọkñkpọ a-atuuhọ idem amọ. 19Nte ndufo idiọọñọke ke idem ndufo edo tembịd Adisana Sịbidịd i-isịneke ndufo ke idem, a-ndufo ekebọọhọ eto Abasi? Idooho ndufo enie idem ndufo; 20ekidep ndufo ke ekọmudua. Ke ntoro, ikama idem ndufo inọ Abasi ukpono.
Currently Selected:
Akpa Ñwed Kọrint 6: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
