Akpa Ñwed Kọrint 3
3
Ufọkabasi ye mme Adaiwuod
1Nditọeka ke Krais, ami ñdikanna mbo ke ndufo edo mbon eduuho uwem ke Sịbidịd, sia ndufo edo mbon abʌkidem, mme ataa ntəkayịn ke Krais. 2Ami ñkinọ ndufo mmọọñeba, ñkinọọhọ ataa ndidia, sia ndufo ikibeeñeke idem adidia ataa ndidia. Ke akpanikọ, ndufo isʌkkọ ibebeeñe idem. 3Ndufo esʌk edo mbon ederimbod. Nte ufịb ye utọk ebaaha ke ufọọd ndufo inamma ndufo edo mbon ederimbod? Nte ndufo inamma ñkpọ nte mme ñkaña awo? 4Ke ini awo keed abooho, “Ami ñkeene Pọọl,” awo mfen ate, “Ami ñkeene Apọlọs,” nte ndufo idoññoke kpa ñkaña awo?
5Nsoo ke Apọlọs ado? Nsoo ñko ke Pọọl ado? Mbon ami edoñño mme isʌñutom a-atooho ke ammọ ndufo ekenịm Krais ke akpanikọ, kpa nte Abọọñ anọọhọ awo keedekeed ubiọñutom amọ. 6Ami ñketọ ñkpasi, Apọlọs aduọk mmọọñ, ado Abasi ado andinam nọ akọt. 7Ke ntak ado, anditọ ye andiduọk mmọọñ idooho ñkpọ ndomokeed, Abasi ikpọọñ ado andinam ñkpọ akọt. 8Anditọ ye andiduọk mmọọñ enie utom keed, eyaenyʌñ enọ ammọ keedekeed utịb a-akemme ye ubọkutom ammọ. 9Sia ñnyịn idoñño mme anam utom Abasi; ndufo edoñño inwañ Abasi, ufọk Abasi.
10Ke mfọn A-Abasi annọọhọ miin, ami mmaasịn itiad idakisọñ nte ata abọbufọk ndin awo mfen adibọp. Ado yak awo keedekeed atịñ anyen naña anye abọp. 11Sia awo ndomokeed ikemeke isịn itiad idakisọñ mfen ikan se emaekesesịn, a-adooho Yisọs Krais. 12Adieke awo akamake kold, me silfa me nsọñudua itiad, me eto, me mbid, me ndak abọp adot ke itiad idakisọñ ami, 13utom amọ ayaawuọ ada, sia usiere ayaayaara ubọkutom. Eyaeyaara ke ikañ, ndin ikañ ayaadomo ubọkutom awo keedekeed. 14Ñkpọ se anye abọp akpesọñ ada, andibọp ayaabọ utịb. 15Ado ikañ akpeta, ayaatak anye; anye ke idem amọ ayaabọkkọ, ado kpa nte awo a-abọkkọke awuọ ke edemeikañ.
16Nte ndufo idiọọñọke ke ndufo ke idem ndufo edo tembịd Abasi ndin ke Sịbidịd Abasi mmọdo adʌñ ke idem ndufo? 17Awo akeedodo a-asoboke tembịd Abasi, Abasi ayaasobo awo ado; sia tembịd Abasi ado adisana, ndin afịd ndufo edo tembịd ado.
18Ikiibiaña idem ndufo. Awo ndufo ndomokeed akpekere ke iminie aniọñ ayio idahami, ana anye akappa ado akọi nọ ato do anye anie aniọñ. 19Sia aniọñ ederimbod ami ado ndisịme ke iso Abasi. Kpa naña ewet: “Anye amʌm mbon aniọñ ke ñkara ammọ.” 20Emaana ebo, “Abọọñ adiọọñọ ke akikere awo aniọñ ado ikpu-ikpu.” 21Ke ntoro, yak awo akuukpọọ inua aba abaña mme ñkaña awo e-edooho mme adadusʌñ! Afịdñkpọ edo ake ndufo, 22me Pọọl, me Apọlọs, me Kefas,#3:22 Kefas ado Pita me ederimbod, me uwem, me ñkpa, me ayio mfịn, me ini iso, afịd inie ndufo, 23ndin ndufo edo ake Krais, ndin Krais ado ake Abasi.
Currently Selected:
Akpa Ñwed Kọrint 3: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
