Akpa Ñwed Kọrint 4
4
Eduuwem mme Nti Abọsịd
1Ke ntoro, akpena ndufo idat ñnyịn nte mme nditọufọk Krais ye mbon e-enọọhọ adudu ete ediọọñọ mme ndedịbe ñkpọ Abasi. 2Ndin ana mbon e-eyaaha akpan utom esịn ke ubọk enam akpanikọ. 3Ami ñkereke me ndufo me esob awo keed akeedodo ebiere ikpe ennọ miin; ke akpanikọ ami ke idem mmi mbiereke ikpe nnọ idem mmi. 4Esịd mmi ana inwañ-inwañ, ado ado inamma nọ ikpe antoppo miin. Abọọñ ado abiideikpe mmi. 5Ke ntak ado, kuubiere ikpe ubaña ñkpọ ndomokeed mbemiso ini e-ekenịmme akem; bet tutu Abọọñ adi. Anye ayaadiyaara anwa-anwa se idịbe ke ekịm anyʌñ ayaara akikere esịd mme awo. Ini ado amaakem, awo keedekeed ayaabọ itooro ato Abasi.
6Idahami, nditọeka ke Krais, mmeben mme ñkpọ ami nnam udomoñkpọ ke idem mmi ye Apọlọs ke ufọn ndufo, nọ ato do ndufo ekpeep ito ñnyịn se ikọ ami awuọñọ: “Kuubọhọ adaña ñkpọ se ekewet.” Ke ntoro, ndufo idiiwọttọ idem ibaña adido andikeene awo ñnyịn keed me awo mfen. 7Sia anie anam nọ afo akpəho ye awo mfen? Nsoo ke anie a-afo umuukubọọhọbọ? Ndin adieke adooho akebọọbọ, ntak akpọọhọ inua nte ñkpọ a-afo umuukubọọhọbọ-ọ?
8Ñkọ ndufo emenie afịd se eyeyem! Ñkọ ndufo emekappa emọmọinyọ! Ndufo emetọọñọ adido mme andikaara, ndin ndufo ikarake ye ñnyịn! Ubaha nte adooho ke ndufo emaetọtọọñọ edo mme andikaara nọ ato do ñnyịn ñko ikeene ndufo ikaara! 9Sia antie miin nte Abasi i-iben ñnyịn mme abọsịd anịm ke edem udịm, nte mbon e-ebiereke ikpe ñkpa ebo ewot ke anwa. Inịm ñnyịn nte ñkpọ ñyọọ enọ afịd ederimbod, enọ mme enyere enyʌñ ye mme awo ñko. 10Ñnyịn idoñño ndisịme inọ Krais, ado ndufo emenekke enie aniọñ ke Krais! Ñnyịn imikop mmemidem, ado ndufo emekop uko! Ndufo emebọ ukpono, ado ñnyịn imibọ asuenne! 11Tutu asịm idahami, ñnyịn imikop abiọọñ ye nsaditọñ, ñnyịn isịne ntaaha afọñ, ikama ñnyịn ke ukuud, ñnyịn inieghe itie idʌñ. 12Ñnyịn iminam akpọsọñ utom ke idem ñnyịn. Ke ini isueñesueñ ñnyịn, ñnyịn idọọdiọñ; ke ini ekọbọkekọbọ ñnyịn, ñnyịn iyọọyọ; 13ke ini etañña abʌd-abʌd ikọ idian ñnyịn, ñnyịn ibọọrọ ke ifuuro-ifuuro usʌñ. Tutu asịm ini ami, ñnyịn imikappa ido nseseppe ñkpọ a-mbon ederimbod miiyemme aba.
Ebeeñe ye Ndʌdutọñ Pọọl
14Ami ñwette ñkpọ ami mbo abuud imʌm ndufo, ado ñwet adidʌt ndufo utọñ nte mme ndima nditọ mmi. 15Akpekọm ndufo ekenie andikpeme tọsịn duob ke Krais, ndufo inieghe mme uwak ete, sia ke Krais Yisọs ami mmaakappa ndo ete ndufo ato ke eti etob. 16Ke ntoro, ami mmikpeiye ndufo nte yak eñkpebe miin. 17Ntak ado anam ami ndọñ Timoti inọ ndufo, adima ayịn mmi a-anamma akpanikọ ke Abọọñ, nte ibịne ndufo. Anye ayaitoiyo ndufo eduuwem mmi ke Krais Yisọs, a-asañake akekem ke se ami ñkpeep ke afịd itie ke afịd ufọkabasi.
18Usʌk ndufo emedikokko idem, nte ñkpọ e-ebooho ke ami ndiidiighe ibịne ndufo. 19Ado ke mfọn Abasi, ami ñyaasọsọp ndisoobo ye ndufo, ndin ami ñyaaduuñọ ndiọọñọ se mbon ñkokkoidem ami etaañ ye utọ adudu se ammọ enieghe. 20Sia abioubọọñ Abasi idooho akpọsọñ utañ ikọ, ado ado adudu. 21Nsoo ke ndufo ekpema? Ekpema ndi ye ikpa ntʌnọ me ke ima ye ifuuro-ifuuro sịbidịd?
Currently Selected:
Akpa Ñwed Kọrint 4: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
