Ẹyano 39

Irueru rẹ Iwun rẹ Irherẹn na

(Ẹyano 28.1-43)

1Ayen de ko iwun iyoyovwi rẹ ọgiọgiọ vẹ orhurhu vẹ ododo, re a vwo ga ẹga vwẹ asan ọfuanfon na; ayen de ko iwun efuanfon na kẹ Ẹrọn; kirobo rẹ Ọrovwohwo ta kẹ Mosis. 2Ọ da vwẹ oro ko ibuluku na, ọgiọgiọ vẹ orhurhu vẹ isene na; kugbe esada ra nabọ me na re bru ona phihọ. 3E de duvwu oro pẹpẹghẹ kerẹ ọbe a da biẹn krẹkrẹ kerẹ oruru e de we phihọ urhiẹ rẹ ọgiọgiọ vẹ orhurhu kugbe isene, kugbe esada ra nabọ me na, re bru ona phihọ. 4Ayen de ko amwa rhurhu igabọ rẹ adagba na, a da rhuọn kugbe vwẹ igogo ivẹ na. 5Yẹ umuehu ra nabọ rhuo na hẹ enu rọye, oghẹre rẹ ekuakua ọvuọvo na e vwo ruo vẹ ona ọvuọvo na, ọ rẹ oro, ọgiọgiọ vẹ orhurhu vẹ ododo, vẹ esada ra nabọ me kirobo rẹ Ọrovwohwo ta kẹ Mosis. 6A da rhuẹrẹ eragha na e de ku oga rẹ oro rhurhu ayen e de bru ena phihọ kerẹ ena rẹ oka, kerẹ edẹ rẹ emọ rẹ Izrẹl. 7Ẹtiyin o de phi ayen phihọ enu rẹ ibuluku na, rere ayen vwọ dia eragha rẹ ẹkarohọ kẹ emọ rẹ Izrẹl; kirobo rẹ Ọrovwohwo ta kẹ Mosis.

8O de ko adja na re bru omamọ rẹ ona phihọ na, kerẹ ibuluku na, vwẹ oro, ọgiọgiọ vẹ orhurhu vẹ ododo vẹ esada ra nabọ me. 9Igogo rọye ẹne na ejobi ukuku; adja na e de kpirho ibro ivẹ ugrogro rọye esabọ ọvo ohẹhẹre rọye je hẹ esabọ ọvo e de phio rhurhu. 10E de ru irhiẹ rẹ eragha ẹne phihọ. Urhiẹ ri sardius, topaz, vọ rẹ kabukol ọye orẹsosuọ; 11urhiẹ rivẹ, ọ rẹ emerad, saphire, kugbe diamond; 12urhiẹ rerha ọ ri jacinth, agate, kugbe ametyst; 13urhiẹ rẹne, ọ ri beryl, onyz, kugbe jasper, ada rọye oro vwọ pharẹ ayen. 14Eragha ihwivẹ re herọ vẹ ẹdẹ rayen kerẹ edẹ rẹ emọ rẹ Izrẹl; ayen da dia kerẹ oka, ra tuọn odẹ ọvuọvo phihọ, vwọ kẹ orua ihwivẹ na. 15Etiyin ayen de duvwu ọjọnrọn phihọ adja na; ọjọnrọn ra vwẹ omamọ rẹ oro duvwu; 16ayen de duvwu egba rẹ oro ivẹ kugbe isa rẹ oro ivẹ, ayen de phi isa na ive phihọ akakọ ivẹ rẹ adja na, 17ayen da wọn ifi rẹ oro ivẹ na phihọ isa na ivẹ na rẹ orhọn rẹ adja na. 18Oba rẹ ifi na ivẹ na e de churu ayen mu egba ivẹ na; etiọna kọye e churu ayen mu obaro rẹ igabọ rẹ ibuluku na. 19Etiyin ayen de duvwu isa rẹ oro ivẹ, ayen de phi ayen phihọ ẹtan ivẹ rẹ adja na, vwẹ akakọ rẹ evun rọye kẹrẹ ibuluku na. 20Ayen de duvwu isa rẹ oro ivẹ, ayen de churu ayen mu obotọ vwẹ obaro rẹ ibuluku na vwẹ asan igabọ rọye, vwẹ asan re de kuogbe vwẹ obenu rẹ ibuluku na. 21Ayen da rọye ufi rẹ ọgiọgiọ vwo churu isa rẹ adja na si isa rẹ ibuluku na, rere o vwo she kpahe enu rẹ ufi rẹ ibuluku ra nabọ rhuo na, rere adja na vwo jẹ ibuluku na esheno, kirobo rẹ Ọrovwohwo ta kẹ Mosis.

22O de ji ko ibuluku na ra vwẹ ọgiọgiọ vwo rhuo na 23unu re bruphihọ adagba na da họhọ unu rẹ ewun diodi, e de ko amwa riariẹ ohọre rọye, ro vwo jẹ ẹbẹre. 24Vwẹ orhọn rẹ adagba na ayen de ko pomegranate rẹ ọgiọgiọ vẹ orhurhu vẹ ododo vẹ esada ra nabọ me. 25Ayen de ji duvwu igogo rẹ omamọ rẹ oro ayen de phi igogo na phihọ ohri rẹ pomegranate na vwẹ enu rẹ orhọn rẹ adagba na riariẹ, vwẹ ohri rẹ ejọjọ na; 26agogo vẹ pomegranate, agogo vẹ pomegranate riariẹ akakọ rẹ adagba na rere a vwọ ga ẹga; kirobo rẹ Ọrovwohwo ta kẹ Mosis. 27Ayen ji ko ikotu, ra vwẹ esada rhuo vwọ kẹ Erọn vẹ emọ rọye. 28Erhu rẹ esada yoyovwi, kugbe erhuẹrevwe rẹ esada yoyovwi, kugbe ewun rẹ awọ ra vwẹ esada ra nabọ me rhuo na, 29kugbe umuehu ra vwẹ omamọ rẹ esada ra nabọ me ọ rẹ ọgiọgiọ vẹ orhurhu vẹ ododo ra vwẹ ukoti ko; kirobo rẹ Ọrovwohwo ta kẹ Mosis. 30Ayen da vwẹ oro duvwu erhu ọfuanfon na e de si eravwọ phihọ, kerẹ obo re kuru ra vwọ tamu emu, ọfuanfon kẹ Ọrovwohwo. 31Ayen de churu ejọjọ rẹ ọgiọgiọ muo rere e vwo churo mu obenu rẹ erhu na, kirobo rẹ Ọrovwohwo ta kẹ Mosis.

Ekuakua rẹ ọgarivi na Gbare

32Enẹ kọye iruo rẹ ebabọn rẹ ọgarivi rẹ utughẹ ra da vwa oma na ru re; ihwo rẹ Izrẹl de ru kirobo rẹ Ọrovwohwo ta kẹ Mosis; ọtiọye kọye ayen ruru. 33Ayen de mu ọgarivi na rhe Mosis, utughẹ na vẹ ekuakua rọye ejobi, abọ rọye, edọvi rọye, egbẹn rọye; ichivwo rọye, vẹ usikẹ rọye, 34urhurho rẹ ophiẹn rẹ egbo re cheri vẹ ophiẹn rẹ ẹvwe, kugbe oga re churu sio; 35ekpeti rẹ iseri na vẹ ekpọ rọye vẹ akpanurhe rẹ arodọvwẹ na, 36imẹjẹ na vẹ ekuakua rọye ejobi kugbe ikara rẹ Obaro na; 37ogburhukpẹ rẹ omamọ rẹ oro na ọ vẹ irhukpẹ rọye ra rhuẹrẹ phihọ kugbe ekuakua rọye ejobi, kugbe evwri rẹ urhukpẹ na; 38agbada rẹ oro na, ori re vwo ghworo vẹ ugboduma ro gbo ọnrhe ororo kugbe odjiko re vwo huhu utughẹ na; 39agbada rẹ ẹrovwo na, vẹ uwuye rẹ ẹrovwo ekpọ rọye, vẹ ekuakua rọye ejobi; oze na vẹ usikẹ rọye; 40osirhere rẹ ọguan na, ichivwo rọye, usikẹ rọye kugbe odjiko rẹ unurhoro rẹ Ọguan na, ifi rọye, vẹ esotọ rọye; kugbe ekuakua rẹ ẹga rẹ ọgarivi na ejobi, vwẹ utughẹ ra da vwa oma na; 41iwun ra nabọ rhuo fiki rẹ ẹga vwẹ asan ọfuanfon na, iwun efuanfon na vwọ kẹ Erọn rẹ orherẹn na, kugbe iwun rẹ emọ rọye re ayen vwo ru iruo rẹ irherẹn. 42Kirobo rẹ Ọrovwohwo ta kẹ Mosis ejobi eye emọ rẹ Izrẹl ruru. 43Etiyin Mosis da mrẹ iruo na ejobi, nighe, ayen ruro nure; kirobo rẹ Ọrovwohwo tare, ọtiọye ayen ruro. Etiyin Mosis da nẹ ẹrhovwo kẹ ayen.

Currently Selected:

Ẹyano 39: UBV77

Highlight

Copy

Compare