Ẹyano 40

Ebabọn kugbe Orufuọn rẹ Ọgarivi na

1Ọrovwohwo da ta kẹ Mosis, 2Vwẹ ẹdẹ rẹsosuọ rẹ emeranvwe rẹsosuọ wo mi mu ọgarivi rẹ utughẹ ra da vwa oma vi. 3Wo mi mu ekpeti rẹ iseri na phihọ evun rọye wọ me vwẹ oga vwọ tan. 4Wo mi mu imẹjẹ na phihọ evun rọye, wọ me rhuẹrẹ obo re herọ phihọ; wo mi rhe mu ogburhukpẹ na rhe, wọ me vwẹ irhukpẹ rọye rhu. 5Wo mi mu agbada rẹ oro rẹ ugboduma na phihọ obaro rẹ ekpeti rẹ iseri na, wọ me vwẹ odjiko tan unurhoro rẹ ọgarivi na. 6Wo mi phi agbada rẹ izobo rẹ ẹtorhẹ phihọ obaro rẹ anurhoro rẹ ọgarivi rẹ utughẹ ra da vwa oma na. 7Wo mi phi oze na phihọ uvwre rẹ utughẹ ra da vwa oma na vẹ agbada na, wo mi ku ame phihọ. 8Wọ me vwẹ oguan na vi riariẹ, wọ me vwẹ odjiko rẹ unurhoro rẹ ọguan na tan. 9Etiyin wọ me rọye ori re vwo ghworo na, wo mi vwo ghworo ọgarivi na vẹ obo re herọ ejobi, wo mi ruo vẹ ekuakua rọye ejobi fon; ke cha fon. 10Ku wọ je vwẹ ori ghworo agbada ra da torhẹ izobo na, vẹ ekuakua rọye ejobi, wo mi ji ru agbada na fon; agbada na kọ cha dia ọ rọ ma fon gangan. 11Wọ me je vwẹ ori ghworo oze na vẹ usikẹ rọye, wo mi ruo fon. 12Kẹ wọ rọye Erọn vẹ emọ rọye rhe unurhoro rẹ utughẹ ra da vwa oma na, ke wọ vwẹ ame hworhẹ ayen, 13wo mi ku iwun efuanfon na phihọ Erọn, ku wọ vwẹ ori ghworo wo mi ruo fon, rere ọ ga vwẹ kerẹ orherẹn. 14Wọ me je rọye emọ rọye rhe wọ ku ikotu phihọ ayen, 15vwẹ ori ghworo ayen, kirobo wọ vwẹ ori ghworo ọsẹ rayen, rere ayen ga vwẹ kerẹ irherẹn; orievwoghworo rayen na kọ vwẹ ayen ru irherẹn bẹdẹ vwẹ uvwiẹ rayen ejobi.

16Enẹ kọye Mosis ruru; kirobo rẹ Ọrovwohwo ta kẹ, ọtiọye oruru. 17Vwẹ emeranvwe rẹsosuọ vwẹ ukpe rivẹ, vwẹ ẹdẹ rẹsosuo rẹ emeranvwe na, e de mu ọgarivi na mudia. 18Mosis bọn ọgarivi na; ọ da bọn usikẹ rọye ejobi, o de rhe mu edọvi rọye mudia, o de phi ekpọ rọye phihọ, o de mu ichivwo rọye mudia; 19a da bọn utughẹ na rhurhu enu rẹ ọgarivi na, o de phi urhurho rẹ utughẹ na rhurhu enu rọye, kirobo rẹ Ọrovwohwo ta kẹ Mosis. 20Ọ da rọye iseri na o de phio phihọ evun rẹ ekpeti na, o de phi ekpọ na phihọ ekpeti na, ọ da rhuẹrẹ akpanurhe rẹ arodọvwẹ na phihọ enu rẹ ekpeti na; 21etiyin o de mu ekpeti na rhe evun rẹ ọgarivi na ọ da vwẹ oga na vwọ tan, ọ da vwọ ghare ekpeti rẹ iseri na; kirobo rẹ Ọrovwohwo ta kẹ Mosis. 22Etiyin o de mu imẹjẹ na phihọ utughẹ ra da vwa oma na, vwẹ obuko rẹ ọgarivi na, vwẹ obo uphẹphẹ rẹ oga na; 23Ọ da nabọ vwẹ ikara na kpahe obaro rẹ Ọrovwohwo na edjẹdje, kirobo rẹ Ọrovwohwo ta kẹ Mosis. 24Ọ de phi ogburhukpẹ na phihọ utughẹ ra da vwa oma na, o hirhe aro ku imẹjẹ na vwẹ obọrhe rẹ ọgarivi na, 25Ọ da vwẹ irhukpẹ na rhu vwẹ obaro rẹ Ọrovwohwo: kirobo rẹ Ọrovwohwo ta kẹ Mosis. 26O de mu agbada rẹ oro na phihọ utughẹ ra da vwa oma na vwẹ obaro rẹ oga na. 27Ọ da torhẹ ugboduma ro gbo ọnrhe ororo vwẹ enu rọye, kirobo rẹ Ọrovwohwo ta kẹ Mosis. 28Ọ da vwẹ odjiko na tan unurhoro rẹ ọgarivi na. 29O de phi agbada rẹ izobo ẹtorhẹ na phihọ unurhoro rẹ ọgarivi na, vwẹ utughẹ ra da vwa oma na, o de ze izobo rẹ ẹtorhẹ vwẹ enu rọye kugbe izobo rẹ ọka, kirobo rẹ Ọrovwohwo ta kẹ Mosis. 30Ọ de phi oze na phihọ uvwre rẹ utughẹ ra da vwa oma na vẹ agbada na, o de ku ame phihọ evun rọye ra vwọ họ, 31kọye Mosis vẹ Erọn vẹ emọ rẹ Erọn vwọ hworhẹ abọ rayen kugbe awọ rayen; 32Ọke rẹ ayen de kpo evun rẹ utughẹ ra da vwa oma na, kugbe ọke rẹ ayen de bi kẹrẹ agbada na, ayen me họ kirobo rẹ Ọrovwohwo ta kẹ Mosis. 33Etiyin ọ da bọn ọguan na riariẹ ọgarivi na kugbe agbada na, o de mu odjiko rẹ unurhoro rẹ ọguan na mudia. Ọtioye na Mosis de ru iruo na re.

Egho Rhurhu Ogarivi na

(Ukeri 9.15-23)

34Etiyin egho na de rhi rhurhu utughẹ ra da vwa oma na, urinrin rẹ Ọrovwohwo da vọn ọgarivi na. 35Mosis gbe sa ro utughẹ ra da vwa oma na-a, fikiridie egho na mudje enu rọye, urinrin rẹ Ọrovwohwo vọn ọgarivi na. 36Vwẹ oyan rayen na ejobi, ọke rẹ egho na de kpenu nẹ ọgarivi na, ihwo rẹ Izrẹl me yan obaro; 37ẹkẹvuọvo egho na gbi kpenu-u, ayen gbe yan obaro bẹsiẹn ro vwo kpenu. 38Vwẹ oyan rayen ejobi egho rẹ Ọrovwohwo na da enu rẹ ọgarivi na vwẹ uvo, erhanre vwẹ enu rọye vwẹ ason, vwẹ obaro rẹ uwevwi rẹ Izrẹl ejobi.

Currently Selected:

Ẹyano 40: UBV77

Highlight

Copy

Compare