Ẹyano 38

Obo re ru Agbada rẹ Izobo Etorhẹ na wan

1Ọ da vwẹ ẹron so agbada re de ze izobo rẹ ẹtorhẹ na: kubit iyori ọye ugrogro rọye, kubit iyori kẹ rha ohẹhẹrẹ rọye; ugrogro vẹ ohẹhẹre rọye abavo, enuẹra rọye kubit erha. 2Ọ da ma ighoro phihọ igogo ẹne rọye, ighoro rọye na vọye oghẹre ọvo, o de ku ẹrovwo rhurho. 3O de duvwu ekuakua rẹ agbada na ejobi, ichẹ, ovwẹvwẹ, ize, isosogho kugbe ẹvwẹrẹ ekuakua rọye ejobi ẹrovwo o vwo ru ayen. 4Ọ da kare uwuye phihọ enu rẹ agbada na, ariri rẹ ẹrovwo, e de kpirho phihọ obotọ rọye, o de she ba ugava. 5Ọ da sa abọ ẹne phihọ igogo ẹne rẹ uwuye rẹ ẹrovwo na re yọnrọn ekpọ na; 6ẹron ọye ọ vwọ kare ekpọ na, ọ da vwẹ ẹrovwo phare ayen. 7O de dje ekpọ na phihọ obọ ra sa phihọ oma rẹ agbada na, rere e vwo muo nene ayen; ọ da rharhe uphrophro phihọ, ephapha e vwo ruo.

Obo re ru Oze na Wan

(Ẹyano 30.18)

8Ọ da rha vwẹ ẹrovwo ru oze na, usikẹ rọye kẹ ẹrovwo nẹ ighegbe rẹ eya re ga ẹga na re ga ẹga vwẹ asan unurhoro rẹ utughẹ ra da vwa oma na.

Ọguan rẹ Ọgarivi na

(Ẹyano 27.9-19)

9Ọ da bọn ọguan na; vwẹ abọ oborhe ọnre rẹ ọguan na a vwẹ osirhere rẹ esada iyoyovwi vwọ ya, kubit ujori; 10ichivwo rayen uje, usikẹ rayen uje, ọ rẹ ẹrovwo ẹkẹvuọvo abọ ra sa phihọ ichivwo na kugbe ejọjọ rayen ke rẹ idọnọ efuanfon. 11Vwẹ abọ rẹ obohwere ọnre kubit ujori, ichivwo rayen uje, usikẹ rayen uje, e rẹ ẹrovwo, ẹkẹvuọvo ighoro rẹ ichivwo na vẹ ejọjọ rayen ke rha idọnọ efuanfon. 12Vwẹ ẹbẹre rẹ obuko ọnre osirhere ro gro te kubit ujuvẹ gbe ihwe, ichivwo rayen ihwe, usikẹ rayen ihwe; ighoro vẹ ejọjọ vẹ ichivwo na da dia idọnọ efuanfon. 13Vwẹ obaro rọye, vwẹ obaro ọnre, kubit ujuvẹ gbe ihwe. 14Osirhere rẹ abọvo rẹ unurhoro na da dia kubit ihwiori, ọ vẹ ichivwo erha vẹ usikẹ erha. 15Ọtiọye je ẹbẹre rivẹ; vwẹ obọ nana vẹ obọ yena vwẹ unurhoro rẹ ọguan na osirhere ri kubit ihwiori herọ, ọ vẹ ichivwo erha kugbe usikẹ erha. 16Osirhere re riariẹ ọguan na phihọ na ejobi esada iyoyovwi e vwo me ayen. 17Usikẹ rẹ ichivwo na da rha da ẹrovwo, ẹkẹvuọvo abọ ra ma phihọ ichivwo na vẹ ejọjọ rayen da rha dia idọnọ efuanfon, urhurho rẹ enu rayen je hẹ idọnọ efuanfon ichivwo rẹ ọguan na ejobi vẹ ejọjọ rẹ ọguan na idọnọ efuanfon. 18Odjiko rẹ ọguan na isara e vwo rhuo vwẹ ọgiọgiọ vẹ orhurhu vẹ ododo kugbe esada ra nabọ me, ugrogro rọye kubit uje, enuẹra rọye kubit iyori vwẹ ohẹhẹre rọye, ọ vẹ osirhere rẹ ọguan na oma ọvo. 19Ichivwo rayen da dia ẹne, usikẹ ẹne rayen na ẹrovwo, abọ rayen idọnọ efuanfon, urhurho rẹ iyovwi rayen vẹ ejọjọ rayen idọnọ efuanfon. 20Esotọ rẹ ọgarivi na vẹ ọguan na riariẹ e rẹ ẹrovwo.

Erovwo rẹ Asan Eshẹ na

21Ọnana unu rẹ emu ra vwọ bọn ọgarivi na, ọgarivi rẹ iseri, kirobo ri Mosis tare nẹ ekere ayen, vwọ kẹ iruo rẹ ihwo ri Livae rẹ Itamar ọmọ rẹ Erọn rẹ orherẹn na djeri. 22Bezalẹl ọmọ rẹ Uri, ọmọ ri Họ, ọ rẹ orua ri Juda, o de ru emu ejobi rẹ Ọrovwohwo ta kẹ Mosis. 23Ọ vẹ Oholiab ọmọ rẹ Abisamak, ọ rẹ orua ri Dan, ọwena ro brena phihọ emwa vwẹ ọgiọgiọ vẹ orhurhu vẹ ododo vẹ esada ra nabọ me.

24Oro ejobi re vwo ru iruo na, ra vwọ bọn uwevwi ọfuanfon na, oro ra vwọ kpẹvwẹ, e da dia talẹnt uje gbẹ irhiri kugbe shekẹl ujori ighwrẹn gbẹ ọghan, vwẹ ovwanvwọn ri shekẹl rẹ ẹshẹ na. 25Idọnọ efuanfon ri nẹ obọ rẹ ukoko na rhe re keri da dia talent ujori ighwrẹn kugbe shekẹl uriori kugbe ujori ighwrẹn kugbe ujorha gbẹ ihwiori, vwi shekẹl rẹ ẹshẹ; 26ohwo ọvo beka ọvo (kọye ubro ri shekẹl, shekẹl rẹ ẹshẹ na), kidie kohwo kohwo re keri ejobi, nẹ ikpe uje kpenu, vwọ kẹ ihwo odu esan gbe erha, ujori iyori kugbe ujuvẹ gbẹ ihwe. 27Talẹnt ujori rẹ idọnọ efuanfon na, eye e vwo duvwu usikẹ rẹ ẹshẹ na, kugbe usikẹ rẹ oga na; usikẹ ujori vwọ kẹ talẹnt ujori na, talẹnt ọvo usikẹ ọvo. 28Vwọ kẹ shekẹl uriori kugbe ujori ighwrẹn kugbe ujorha gbẹ ihwiori na, o de duvwu ighoro phihọ ichivwo na, ọ da nabọ phare iyovwi vẹ ejọjọ rayen. 29Ẹrovwo re tori da dia talẹnt ujorha gbe ihwe, kugbe shekẹl uriori ivẹ gbe ujori ẹne; 30enana kọye o vwo ru usikẹ rẹ ẹchẹ rẹ utughẹ ra da vwa oma na, agbada rẹ ẹrovwo kugbe uwuye rẹ ẹrovwo vwọ kẹ kugbe ekuakua rẹ agbada na, 31usikẹ rọ riariẹ obotọ rẹ ọguan na phihọ vẹ usikẹ rẹ unurhoro rẹ ọguan na, esotọ rẹ ọgarivi na, kugbe esotọ re riariẹ ọguan na.

Currently Selected:

Ẹyano 38: UBV77

Highlight

Copy

Compare