Ẹyano 37
37
Obo ra Kanre Ekpeti na Wan
(Ẹyano 25.10-22)
1Bezalẹl da kare ekpeti rẹ ẹrọn; ugrogro rọye kubit ivẹ gbẹ ubro, kubit ọvo gbẹ ubro ke rha ohẹhẹre rọye, kubit ọvo gbẹ ubro ke rha enuẹra rọye. 2O da vwẹ omamọ rẹ oro vwọ pharọ te evun te otafe, ọ da wran oro yariẹ phihọ, 3ọ da rha vwẹ isabọ rẹ oro ẹne phihọ igogo ẹne rọye na, isabọ ivẹ ẹbẹre ọvo, isabọ ivẹ ẹbẹre ọfa. 4Ọ da kare ekpọ rẹ ẹron ọ da vwẹ oro phare ayen, 5o de dje ekpọ na phihọ abọ ra sa phihọ oma rẹ ekpeti na, re vwo mu ekpeti na. 6Ọ da ma akpanurhe rẹ arodọvwẹ rẹ oro ọvo; ugrogro rọye kubit ivẹ gbẹ ubro, kubit ọvo gbẹ ubro ke rha ohẹhẹre rọye. 7Ọ da ma chẹrobim ivẹ ra vwẹ oro duvwu; ọ da ma ayen phihọ oba ivẹ rẹ akpanurhe rẹ arodọvwẹ na. 8Ọvo ọ obo ẹtan ọvo, ọvo ọ obo ẹtan rivẹ; ubro ọvuọvo ọye ọ vwọ ma akpanurhe rẹ arodọvwẹ na vi chẹrobim na ra ma phihọ oba rọye ivẹ na. 9Chẹrobim na da bẹre ibekpe rayen sa obenu, uhoho rẹ ibekpe rọye de rhurhẹ akpanurhe rẹ arodọvwẹ na, ayen de hirhe epharo ku ohwohwo; akpanurhe rẹ arodọvwẹ na kọye epharo ri chẹrobim na nẹ.
Ekanrọ rẹ Imẹjẹ na
(Ẹyano 25.23-30)
10Ọ da je kare imẹjẹ rẹ ẹron; kubit ivẹ ugrogro rọye, kubit ọvo ke rha ohẹhẹre rọye, kubit ọvo gbẹ ubro ke rha enuẹra rọye; 11Ọ da reyọ omamọ rẹ oro vwọ pharọ, ọ da ma oro riariẹ phihọ. 12Etiyin o de phi edọvi phihọ riariẹ, ohẹhẹre rọye kerẹ ohẹhẹre rẹ ehẹrhobọ, ọ da rha wran oro riariẹ edọvi na phihọ. 13O de phi isabọ rẹ oro ẹne phihọ, o de churu abọ na mu igogo ẹne rẹ awọ ẹne rọye na. 14Abọ na de bi kẹrẹ edọvi na, keye a vwọ yọnrọn ekpọ na rere ayen vwo ghwa imẹjẹ na. 15Ọ da kare ekpọ rẹ ẹrọn re vwo mu imẹjẹ na, ọ da vwẹ oro phare ayen. 16Ọ da rha vwẹ omamọ rẹ oro vwo ru ekuakua re cha dia enu rẹ imẹjẹ na, isete rọye vẹ egebule rọye ra vwọ torhẹ insens, iko rọye vẹ ọmọtoto rọye ra vwọ jẹ ame rẹ ẹga na.
Ekanrọ rẹ Ogburhukpẹ na
(Ẹyano 25.31-40)
17O de rhe ji ru ogburhukpẹ rẹ oro ọvo, obotọ vẹ adjugẹ rẹ ogburhukpẹ na e duvwu ayen; iko rọye, iyovwi rọye, vẹ idodo rọye ejobi vọye ọvo. 18Eghọn esan eye nẹ ẹhẹre rọye rhe, eghọn erha rẹ ogburhukpẹ na nẹ ẹbẹre rọye ọvo rhe, eghọn erha rẹ ogburhnkpẹ na de rhe nẹ ẹbẹre rivẹ rọye rhe. 19Iko erha re ruru kerẹ orhomrẹ ọvuọvo vẹ uyovwi vẹ ododo, vwẹ oghọn ọvo, iko erha efa re ruru kerẹ orhomrẹ ọvuọvo vẹ uyovwi vẹ ododo, vwẹ oghọn ọfa–ọtiọye kọye ọ epha kẹ eghọn esan ri nẹ oma rẹ ogbnrhukpẹ na rhe. 20Vwẹ enu rẹ oghurhukpẹ na dẹn iko ẹne re ruru kerẹ orhomrẹ herọ, ayen vẹ iyovwi rayen vẹ idodo, 21uyovwi rẹ ubro ọvuọvo vọye vwẹ obotọ rẹ eghọn ivivẹ ri yoro nẹ eghọn esan na rhe na. 22Te iyovwi rayen vẹ eghọn rayen ejobi ubro ọvuọvo; omamọ rẹ oro e vwo duvwu ayen ejobi ọvuọvo. 23Ọ da vwẹ oro vwo ru irhukpẹ ighwren rọye vẹ akpẹn rọye kugbe ize rọye. 24Ọ da vwẹ talẹnt rẹ omamọ rẹ oro ọvo vwo ruo vẹ ekuakua rọye ejobi.
Obo re ru Agbada rẹ Ogboduma na wan
(Ẹyano 30.1-5)
25Ọ da rha vwẹ ẹron vwo ru agbada rẹ ugboduma; ugrogro rọye kubit ọvo, ohẹhẹre rọye kubit ọvo; ugrogro te ohẹhẹre abavo, enuẹra rọye kubit ivẹ; idjo rọye vọye oma ọvo. 26Ọ da rọye omamọ rẹ oro vwọ pharọ obenu rọye, vẹ oma rọye ejobi, vẹ idjo rọye; ọ da ma oro riariẹ phihọ, 27Ọ da vwẹ isabọ rẹ oro ivẹ phihọ vwẹ otọ rẹ oro ra mare na, vwẹ ẹbẹre rivẹ rọye ri nẹ ohwohwo, re yọnrọn ekpọ na re vwo muo na. 28Ọ da vwẹ ẹron vwo ru ekpọ na, ọ da vwẹ oro vwọ phare ayen.
Obo re ru Evwri rẹ Eghworo na wan kugbe Ugboduma
29O de ji chere ori ọfuanfon re vwo ghworo rhe, omamọ rẹ ugboduma ro gbo ọnrhe ororo, rẹ echeri rẹ a gua kugbe.
Currently Selected:
Ẹyano 37: UBV77
Highlight
Copy
Compare
Share
Want to have your highlights saved across all your devices? Sign up or sign in
Bible in Urhobo © United Bible Societies, 1977.
