Ẹyano 36

1Bezalẹl vẹ Oholiab vẹ ohwo kohwo rẹ Ọrovwohwo vwẹ ogangan vẹ ọhọ ra vwọ riẹn obo re ruẹ koka koka rẹ iruo vwẹ ebabọn rẹ ẹshẹ na ko ru iruo kirobo rẹ Ọrovwohwo tare.

Ihwo na vwẹ Okẹ Buebu rhe

2Etiyin Mosis de se Bezalẹl vẹ Oholiab vi kohwo kohwo rẹ Ọrovwohwo phi ogangan phihọ udu rọye, kohwo kohwo rẹ udu rọye muro vwo ru iruo na; 3ayen da reyọ emu ejobi rẹ ihwo rẹ Izrẹl phihọ otọ fiki rẹ ẹshẹ na mie Mosis. Ayen je ghwa ẹga rhe kirhiọke kirhiọke 4fiki rẹ ọtiọye na ihwo ri vwo ogangan ejobi ri ruẹ okoka rẹ iruo ọvo vwẹ ẹshẹ na da rhe, ohwo ọvuọvo oka re iruo ro de ruẹ, 5ayen da ta kẹ Mosis, Ihwo na vwọ rhe vrẹn obo rẹ Ọrovwohwo guọnọre nẹ avwanre vwo ru iruo na. 6Ọtiọye na Mosis de ji urhi, e de ghwoghwo ota na vwẹ obo otafe rẹ erhọn na ejobi we jẹn ọshare yẹrẹ aye ghwẹ ẹga ọfa cha fiki rẹ ẹshẹ na-a. Ọtiọye na a da da ihwo na ji nẹ ayen gbe ghwa ekuakua cha-a; 7kidie ekuakua rẹ ayen ghwa rhe ite vwo ru iruo na chekọ.

Ebabọn rẹ Ọgarivi na

(Ẹyano 26.1-37)

8Ihwo ri vwo ogangan vwẹ ohri re ihwo ri ru iruo na da reyọ emwa ihwe vwo ru ọgarivi na, emamọ rẹ esada ra nabọ me eye e vwo ru ayen vẹ ọgiọgiọ vẹ orhurhu vẹ ododo, ọ vẹ chẹrobim re bru ona họ, 9ugrogro rẹ amwa ọvuọvo kubit uje gbẹ ẹrenren, ohẹhẹre rọye kubit ẹne; emwa na ejobi ukuku.

10O de ku emwa na iyori kugbe, iyori ri chekọ o de rhe ku ayen kugbe. 11O de ru igodo rẹ ọgiọgiọ vwẹ orhọn rẹ amwa rọ uphephẹ rẹ amwa rẹ ẹsosuọ na, etiọye o ji ru phihọ orhọ rẹ uphephẹ rẹ amwa rivẹ na; 12o de churu igodo ujuvẹ gbẹ ihwe phihọ amwa ọvo, o de rhe churu igodo ujuvẹ gbẹ ihwe vwẹ orhọn rẹ amwa rẹ ẹko rivẹ, igodo na inẹ ohwohwo. 13Etiyin o de ru ahwa ujuvẹ gbẹ ihwe rẹ oro, ọ da vwẹ ayen hwa emwa na mu, fiki rẹ ọtiọye na ọgarivi na ejobi kọ vuọvo. 14O de ji phi emwa rẹ ẹton rẹ ẹvwe rhurhu utughẹ na vwẹ enu rẹ ọgarivi na; o de ru emwa ihwe gbe ọvo. 15Ugrogro rẹ amwa ọvuọvo kubit ọgban ohẹhẹre rẹ amwa ọvuọvo da rha dia kubit ẹne, emwa ihwe gbe ọvo na abavo. 16O de ku emwa iyori na gbe, o de ku esan gbe. 17O de churu igodo ujuvẹ gbe ihwe phihọ orhọn rẹ amwa rọ uphephẹ rọ rẹ ẹsosuọ vẹ, igodo ujuvẹ gbe ihwe vwẹ orhọn rẹ amwa rọ tan ayen kugbe na.

18O de ru ahwa rẹ ẹrovwo ujuvẹ gbe ihwe ra vwọ gba utughẹ na kugbe rere ọ vwọ dia ọvuọvo. 19O de ko urhurho rẹ ophiẹn rẹ ẹvwe kugbe egbo re cheri re vwo rhurhu utughẹ na.

20Ọ da reyọ ẹron vwo ru edọvi rẹ ọgarivi na. 21Ugrogro rẹ edọvi ọvo kubit ihwe, ọvo gbẹ ubro kọye rha obẹhẹre rẹ edọvi ọvuọvo. 22Edọvi ọvuọvo vwo abọ ivẹ, rere a vwọ gba kugbe, o de ru enana phihọ edọvi rẹ ọgarivi na ejobi tototo. 23Kenẹ o ru edọvi rẹ ọgarive na: edọvi uje vwẹ abọ rẹ obaro ọnre, 24ọ da wran idọnọ phihọ obotọ rẹ edọvi uje na, usikẹ ivẹ vwẹ otọ rẹ edọvi ọvo fiki rẹ abọ ra sa phihọ na, usikẹ ivẹ efa vwẹ otọ rẹ edovi ọfa fiki rẹ abọ ra sa phihọ na. 25Vwọ kẹ ẹbẹre rivẹ re ọgarivi na, vwẹ obuko rọye. O de rhe ru edọvi uje phihọ 26vẹ usikẹ rẹ idọnọ ujuvẹ, usikẹ ivivẹ vwẹ otọ rẹ edọvi ọvo, usikẹ ivẹ vwẹ otọ rẹ edọvi ọfa.

27Vwẹ obuko rẹ ọgarivi na vwẹ obuko ọnre o de phi edọvi esan phihọ. 28Ọ de phi edọvi ivẹ phihọ akako rẹ ọgarivi na vwẹ obuko. 29A da hẹriẹ ayen nẹ ohwohwo vwẹ obotọ, ẹkẹvuọvo ayen kugbe vwẹ obenu, vwẹ asan ra da sa obo rẹ ẹsosuọ phihọ na; o de ru ayen ivẹ ọtiọna, vwẹ akakọ ivẹ na. 30Edọvi ẹrenren vẹ usikẹ rẹ idọnọ rayen, usikẹ ihwe gbe esan, vwẹ obotọ rẹ edọvi ọvo usikẹ ivẹ.

31O de ru ogbẹn rẹ ẹrọn edọvi iyori vwẹ ẹbẹre rẹ ọgarivi na ọvo, 32egbẹn iyori rẹ edọvi rẹ ọgarivi na vwẹ abọ rive, kugbe egbẹn iyori vwọ kẹ edọvi rẹ ogarivi na vwẹ obuko ọnre. 33O de phi ogbẹn phihọ uberevie rọye nẹ obotọ re duvwu enu rẹ edọvi na. 34Ọ da vwẹ oro phare edọvi na, ọ da vwẹ oro sa obọ phihọ ra vwọ sa yọnre egbẹn na, ọ da vwẹ oro phare egbẹn na.

35Ọ da vwẹ ọgiọgiọ, vẹ orhurhu vẹ ododo vẹ esada ra nabọ me vwo ru oga re phi rhurho, kugbe chẹrobim re bru ona phihọ ọye o ru phihọ. 36Ọ da tọn ichivwo ẹne rẹ ẹron phihọ kẹ, ọ da vwẹ oro phare ayen, a da vwẹ oro vwo ru ada phihọ, ọ da wọn usikẹ rẹ idọnọ phihọ otọ rayen. 37O de churu odjiko si ẹchẹ rẹ utughẹ na, ọ rẹ ọgiọgiọ vẹ orhurhu vẹ ododo vẹ esada ra nabọ me, ra vwẹ ukoti rhuo; 38ichivwo rọye iyori na vẹ ada rayen. Ọ de rhurhu uyovwi rayen ifi rayen da dia oro, ẹkẹvuọvo usikẹ rayen kẹ ẹrovwo.

Currently Selected:

Ẹyano 36: UBV77

Highlight

Copy

Compare