Ẹyano 30

Agbada rẹ Ugboduma

(Ẹyano 37.25-28)

1Wọ me so agbada ra da torhẹ ugboduma; ẹron wo vwo ruo. 2Ugrogro rọye kubit ọvo, ohẹhẹre rọye kubit ọvo; ugrogro vẹ ohẹhẹre rọye me dia abavo, enuẹra rọye me dia kubit ivẹ; ighoro rọye vọye me dia oma ọvo. 3Wọ me rọye oro dẹn vwọ pharọ te enu rọye vẹ oma rọye ejobi yariẹ vẹ ighoro rọye, wọ me rha ma oro yariẹ phihọ. 4Isa rẹ oro ivẹ wo ru phihọ, obotọ rẹ oma na vwẹ ẹbẹre ivẹ ri nẹ ohwohwo na wo ru ayen phihọ, ka sa obọ phihọ re e vwo muo. 5Ẹron ọye e che vwo ru ekpọ na, wọ me vwẹ oro pharo ayen. 6Wo mi muo phihọ obaro rẹ oga rọ asan rẹ ekpeti rẹ iseri na epha na, vwẹ obaro rẹ akpanurhe rẹ arodọvwẹ na ro obenu rẹ ekpeti rẹ iseri na, asan re me vẹ owẹ da cha vwa oma na. 7Erọn kọ torhẹ ugboduma ri gbo ọnrhe ororo vwẹ enu rọye, kirhiọke kirhiọke ọke rọ da rhuẹrẹ irhukpẹ na kọye ọ vwọ torhẹ. 8Erọn da vwẹ irhukpẹ na mu vwẹ ovwonvwọn, ọ me torhẹ, kọ dia ughoduma ri bẹdẹ kẹ Ọrovwohwo vwẹ uvwiẹ wẹn ejobi. 9Wọ torhẹ ugboduma ro jẹfuọn vwẹ enu rọye-e eyẹ izobo rẹ ẹtorhẹ-ẹ, eyẹ ọ rẹ ọka-a, wo ji kuẹ udi kuo-o. 10Erọn kọ gọ ẹgua no oma vwẹ enu rẹ ighoro rọye obọvo ẹgbukpe; ọbara rẹ izobo ra vwo gọ ẹgua rẹ umwemwu na kọye ọ vwọ gọ ẹgua kẹ obọvo ẹgbukpe na vwẹ uvwiẹ wẹn ejobi; ọ rọ ma fon gangan kẹ Ọrovwohwo.

Igho ra vwọ Gọ Ẹgua

11Ọrovwohwo da ta kẹ Mosis, 12Wo de kere ihwo rẹ Izrẹl, ohwo ọvuọvo me tan oma rọye hirhe kẹ Ọrovwohwo, rere emiavwe vwo jẹ phia kẹ ayen wo de kere ayen. 13Ohwo ọvuọvo re keri, kọ vwẹ ọnana kpahe otọ; ubro ri shekẹl kerẹ shekẹl rẹ ẹshẹ rẹ Ọrovwohwo na (shekẹl na gera uje re dia), ubro ri shekẹl e vwo ze izobo kẹ Ọrovwohwo. 14Kohwo kohwo re keri, nẹ ẹgbukpe uje kpenu, ọye vwẹ izobo rẹ Ọrovwohwo na kpahe otọ. 15Ọ rẹ ọdafe buẹnọ ọ rẹ ovwiogbere-e, ọ rẹ ovwiogbere hanvwe nọ ọ rẹ ọdafe-e, nọ ubro rẹ shekẹl na-a, vwẹ ọke wo de ze izobo kẹ Ọrovwohwo vwọ gọ ẹgua kẹ ovwan. 16Wọ me rọye igho ra vwọ gọ ẹgua na mie ihwo rẹ Izrẹl keye e vwo ru iruo rẹ ẹga vwẹ utughẹ ra da vwa oma na, rere ọ vwọ dia ẹkarohọ rẹ ihwo rẹ Izrẹl kẹ Ọrovwohwo, rere a vwọ gọ ẹgua kẹ oma rẹ ovwan.

Oze

17Ọrovwohwo da ta kẹ Mosis, 18Wọ me ma oze rẹ ẹrovwo rẹ omaephorho, obotọ rọye me dia ẹrovwo, rẹ ẹhworhẹ, wo mi phio phihọ uvwre rẹ utughẹ ra da vwa oma na vẹ agbada na, wo mi ku ame phihọ, 19ọ rẹ Erọn vẹ emọ rọye vwọ hworhẹ abọ rayen vẹ awọ rayen. 20Ọke rẹ ayen de kpo utughẹ ra da vwa oma na, eyẹ ọke rẹ ayen de bi kẹrẹ agbada na ra ga ẹga, re ayen da torhẹ izobo kẹ Ọrovwohwo, ayen me vwẹ ame họ, eyẹ ayen de rhe ghwu. 21Kẹ ayen hworhẹ abọ rayen vẹ awọ rayen, ọ dia ọtiọye-e ayen ki ghwu: ọnana kọ dia iji rẹ e rara kẹ ayen, jẹ vwọ kẹ ekpuyovwi rọye vẹ ekru rayen.

Evwri rẹ Eghworo kugbe Ugboduma

22Ọrọ marho, Ọrovwohwo da je rhoma ta kẹ Mosis, 23reyọ irienrien ri me yovwi: ọ rẹ ame rẹ adjija shekẹl ujori iyori ọ rẹ egẹn ro gbo ọnrhe ororo ujori ivẹ gbẹ ujuvẹ gbẹ ihwe, kugbe awọ rẹ erhẹvwo ujori ivẹ gbẹ ujuvẹ gbẹ ihwe, 24ọ rẹ ẹron ujori iyori, kerẹ shekẹl rẹ ẹshẹ rẹ Ọrovwohwo na, ọfigbo rẹ oliv ukoko ọvo; 25ku wọ vwẹ enana ru ori ọfuanfon ra gua kugbe: ori ọfuanfon kọye ọ dia. 26Wo mi vwo ghworo utughẹ ra da vwa oma na kugbe ekpeti rẹ iseri na, 27te imẹjẹ na vẹ ekuakua rọye ejobi te ogburhukpẹ vẹ ekuakua rọye, vẹ agbada rẹ ugboduma. 28Agbada rẹ izobo rẹ ẹtorhẹ vẹ ekuakua rọye vẹ oze rẹ ẹrovwo kugbe obotọ rọye 29wo mi ru ayen fon, rere e vwọ dia obo re ma fon, obo ro te ayen ejobi kọ dia fuanfon. 30Wọ me vwẹ ori ghworo Erọn vẹ emọ rọye, rere wo ru ayen fon, rere ayen ga vwẹ kerẹ irherẹn. 31Ku wọ ta kẹ ihwo rẹ Izrẹl nẹ, ọnana kọ cha dia ori ọfuanfon mẹ vwẹ uvwiẹ rẹ ovwan ejobi. 32E kuo ku oma rẹ ihwo ghevweghe-e, wo ji ru ọfa rọ họhọ-ọ; ọfuanfon ọ epha, ọ je fon kẹ ovwan. 33Kohwo kohwo ro ru ọvo kerẹ ọye yerẹ kohwo kohwo ro kuro ku ohwo ghevweghe ke sio nẹ ohri re ihwo rọye. 34Ọrovwohwo da ta kẹ Mosis, reyọ irienrien, ishasha evẹvwe, vẹ irhe, irienrien ri gbo vwevwerhe vẹ adjija (ọ dia abavo). 35Wo mi gbe insens na kugbe kerẹ ishani, re tuẹ ughweraka họ, fuanfon yoyovwi. 36Wo mi duvwu evo rọye vworovworo, wo mi phi ẹbẹre ọvo rọye phihọ ekpeti rẹ iseri na vwẹ evun rẹ utughẹ ra da vwa oma na, asan re me vẹ ovwan da vwa oma na; kọ dia emu rọ ma fon kẹ ovwan. 37Insens ri wọ cha vwẹ ekuakua na ruẹ na, wo ruo kẹ oma wẹ-ẹn, ọ me dia emu ọfuanfon vwẹ obọ wẹn kẹ Ọrovwohwo. 38Kohwo kohwo ro ru ishani ọtiọna ro da họhọ kẹ oma rọye ka djẹ nẹ ohri rẹ ihwo rọye.

Currently Selected:

Ẹyano 30: UBV77

Highlight

Copy

Compare