Ẹyano 31

Ese rẹ Bezalẹl kugbe Oholiab

(Ẹyano 35.30–36.1)

1Ọrovwohwo da ta kẹ Mosis, 2Nighe, Mi se Bezalẹl ọmọ rẹ Uri ọmọ ri Họ, ọ rẹ orua ri Juda: 3me da vwẹ Erhi rẹ Ọghẹnẹ vwọ vọn, ọ vẹ ogangan vẹ ọhọ vẹ erianriẹn vẹ ona ejobi, 4rere o vwo bru ona, ro vwo duvwu oro, idọnọ efuanfon, kugbe ẹrovwo, 5ro vwo bru ona phihọ oragha, rere ọ rha kare irhe, rere o vwo ru ona kona. 6Nighe, Me je vwẹ Oholiab ọmọ rẹ Ahisamak vwo mu, ọ rẹ orua ri Dan; me je vwẹ ogangan kẹ ihwo re sa wian owian ejobi, rere ayen vwo ru obo re me ta kẹ wẹ na ejobi: 7Utughẹ ra da vwa oma na vẹ ekpeti rẹ iseri na vẹ akpanurhe rẹ arodọvwe, vẹ ekuakua ra vwo rhuẹrẹ utughẹ na ejobi, 8imẹjẹ na vẹ ekuakua rọye ejobi, vẹ omamọ rẹ ogburhukpẹ na vẹ ekuakua rọye, kugbe agbada rẹ ugboduma na, 9kugbe agbada rẹ izobo rẹ ẹtorhẹ vẹ ekuakua rọye, vẹ oze kugbe otọ rọye, 10kugbe iwun ra nabọ ko, iwun efuanfon vwọ kẹ Erọn rẹ orherẹn na kugbe iwun rẹ emọ rọye vwọ gọ ẹga rẹ irherẹn, 11ori re vwo ghworo na vẹ insens ro gbo ọnrhe ororo na kọ rha dia asan ọfuanfon na. Obo re me ta kẹ wẹ ejobi ọye ayen ru.

Ẹdidjala na kerẹ Oka

12Ọrovwohwo da ta kẹ Mosis, 13Ta kẹ ihwo rẹ Izrẹl nẹ, Wa me yọnrọn ẹdidjala mẹ, kidie ọnana cha dia oka vwẹ uvwre mẹ vẹ ovwan ra ro uvwiẹ wẹn ejobi, rere wọ vwọ riẹn nẹ Mẹvwẹ, rẹ Ọrovwohwo, ri ru we fon. 14Wọ me yọnrọn ẹdidjala na kidie ọfuanfon kẹ wẹ; ohwo ro miovwiro ke hwe ghwu, kohwo kohwo ro ru iruo vwẹ evun rọye, erhi yena ku wo sionẹ ohri rẹ ihwo rọye. 15Ẹdẹ esan ọye we vwo ru iruo, ẹkẹvuọvo ẹdẹ righwrẹ na ọye hẹ ẹdidjala rẹ omaerovwo dẹn rọ fonro kẹ Ọrovwohwo, ohwo ro ru iruo vwẹ ẹdidjala na ke hwe ghwu. 16Fiki rẹ ọtiọye na ihwo rẹ Izrẹl ke yọnrọn ẹdidjala na ra ro uvwiẹ rayen ejobi, rọ dia ọphọ re rara. 17Ọyena kọ dia oka ri bẹdẹ rọ hẹ uvwre mẹ vẹ ihwo rẹ Izrẹl na tanẹ ẹdẹ esan ọye Ọrovwohwo vwọ ma odjuvwu vẹ akpọ, ẹdẹ rẹ ighwrẹn o de rovwoma, oma rọye da sasa.

Upene rẹ Erhuẹn rẹ Oro

(Urhi Rivẹ 9.6-29)

18Ọ da vwẹ ephapha rẹ iseri ivẹ na vwọ kẹ Mosis, ọke rẹ ọ vẹ ọye vwo ta ota vwẹ enu rẹ Ugbenu ri Sinae nu, ephapha rẹ oragha rẹ Ọghẹnẹ vwẹ urhiabọ rọye si.

Currently Selected:

Ẹyano 31: UBV77

Highlight

Copy

Compare