Ẹyano 29

Eruofuọn rẹ Erọn kugbe Emọ Rọye

1Asakiephana ọnana kọye obo ri wo ru vwo ru ayen fon, rere ayen vwọ ga vwẹ kerẹ irherẹn. Reyọ upene rẹ erhuẹn ọvo vẹ egbo ivẹ ri vwo upe-e, 2vẹ ikara ro jephuo, ikara ro jephuo ra vwẹ evwri gbe, vẹ ikara pẹpẹghẹ ra vwẹ evwri ghworo. Ọka ra nọre vworovworo wo vwo ru ayen. 3Wo mi phi ayen phihọ obere ọvo, obere yena kọye wo vwo mu ayen rhe, wọ me reyọ erhuẹn na vẹ egbo ivẹ na rhe. 4Wọ me reyọ Erọn vẹ emeshare rọye rhe anurhoro rẹ utughẹ ra da vwa oma na, wọ me vwẹ ame hworhẹ ayen. 5Ku wọ reyọ iwun na, ku wo ku ikotu na kugbe adagba rẹ ibuluku na phihọ Erọn, kugbe ibuluku na, kugbe ekpoudu na, ọ me vwẹ umuehu rẹ ibuluku ra nabo rhuo vwo muo; 6wọ me vwẹ erhu na tughẹ uyovwi, wọ me vwẹ erhu rẹ uvie ọfuanfon na vwọ kpahe enu rẹ erhu na. 7Wọ me reyọ ori re vwo ghworo na vwo ghworo uyovwi. 8Rere wọ ke reyọ emeshare rọye rhe rere wo ku ikoto na phihọ ayen; 9wọ me vwẹ umuehu na mu ayen wo mi churu erhu na si ayen; orherẹn na kọ dia iji rayen bẹvwẹdẹ. Enẹ kọye wọ vwẹ Erọn vẹ emọ rọye vwo mu.

10Etiyin wọ ke reyọ erhuẹn na rhe anurhoro rẹ utughẹ ra da vwa oma na. Erọn vẹ emọ rọye ke ghwẹ abọ rayen kpahe uyovwi rẹ erhuẹn na, 11ku wo hwe erhuẹn na vwẹ obaro rẹ Ọrovwohwo, vwẹ oma rẹ anurhoro rẹ utughẹ ra da vwa oma na, 12wọ me rọye ọbara rẹ erhuẹn na, wọ me vwẹ urhiabọ te vwo ghworo ighoro rẹ agbada na, ọbara ro chekọ kọye wo rhe ku phihọ otọ rẹ agbada na. 13Wọ me rọye ivwri ri rhurhu ivun rọye ejobi, vẹ e rẹ tamu irhue rọye, vẹ ibiehu ivẹ na vẹ ivwri re tamu ayen, wọ me torhẹ ayen vwẹ enu rẹ agbada na. 14Ẹkẹvuọvo uvwo rẹ erhuẹn na, vẹ ohọrọ rọye, vẹ isọn rọye, kọye wọ vwẹ erhanre torhẹ vwẹ otafe rẹ erhọn na; ọye izobo rẹ umwemwu.

15Wọ me rọye egbo na ọvo; Erọn vẹ emeshare rọye me ghwẹ abọ rayen kpahe uyovwi rẹ egbo na, 16wo mi hwe egbo na, wọ me kpare ọbara rọye ku kuẹ agbada na yariẹ. 17Wọ me nyavwe egbo na ibribro, wọ me hworhẹ ivun rọye vẹ awọ rọye, wọ mi ku ayen kugbe ibro rọye na vẹ uyovwi rọye, 18wọ me torhẹ egbo na ejobi vwẹ enu rẹ agbada na; ọnana izobo rẹ ẹtorhẹ kẹ Ọrovwohwo; ọnana ọnrhe ororo, izobo rẹ erhanre kẹ Ọrovwohwo.

19Wọ me rha rọye egbo rivẹ; Erọn vẹ emeshare rọye me ghwẹ abọ rayen kpahe uyovwi rẹ egbo na, 20wo mi hwe egbo na, wọ me rọye emerha rẹ ọbara rọye na vwo te akakọ rẹ orhọn rẹ obọrhe rẹ Erọn vẹ akakọ rẹ orhọn rẹ obọrhe rẹ emeshare rọye, vẹ urhiabọ rode rẹ obọrhe rayen, vẹ urhiawọ rode rẹ owọrhe rayen, ọbara ro chekọ wo mi kuo yariẹ agbada na phihọ. 21Wọ me rọye emerha rẹ ọbara na rọ hẹ agbada na, kugbe ori ọfuafon na, wo mi miro ku Erọn vẹ iwun rọye, kugbe emọ rọye vẹ iwun rẹ emọ rọye, te ekpuyovwi rọye vẹ iwun rọye te emọ rọye kugbe iwun rẹ emọ rọye ke fon.

22Ku wọ je rọye ivwri rẹ egbo na vẹ urhuvwu orhuarho na, vẹ ivwri ri rhurhu ivun na, vẹ ekuakua re tamu irhue na, vẹ ibiehu ivẹ na kugbe ivwri re ayen, kugbe ekpoghowọ rẹ obọrhe rọye (kidie ọye egbo rẹ evwomwuo), 23kugbe ikara ọvo, kugbe okuọka ra vwẹ evwri gbe, kugbe ikara pẹpẹghẹ ọvo, ra rọye nẹ evun rẹ obere rẹ ikara ro jephuo rẹ obaro rẹ Ọrovwohwo na rhe, 24wo mi phiẹ enana ejobi phihọ abọ rẹ Erọn vẹ abọ rẹ emeshare rọye, rere wo kpogho ayen re dia izobo rẹ ekpogho kẹ Ọrovwohwo. 25Ku wọ rọye ayen miẹ ayen, wọ me torhẹ ayen vwẹ enu rẹ agbada kugbe izobo rẹ ẹtorhẹ na, re o gbo ọnrhe ororo kẹ Ọrovwohwo; ọye izobo rẹ erhanre kẹ Ọrovwohwo na. 26Wọ me rọye udu rẹ egbo re evwomuo rẹ Erọn na wo mi kpogho rọ dia izobo rẹ ekpogho kẹ Ọrovwohwo, kọye cha dia ute wẹn; 27wo mi rhe ru udu rẹ izobo rẹ ekpogho na fon, vẹ ekpoghowọ rẹ ute rẹ irherẹn na, e re kpoghori na, rẹ e sinu egbo rẹ evwomuo na rhe na, rọ dia ọ rẹ Erọn vẹ ọ rẹ emọ rọye. 28Ọnana kọ dia ute rẹ bẹdẹ kẹ Erọn vẹ emọ rọye rẹ ihwo rẹ Izrẹl vwọ kẹ ayen, kidie ọye na ute rẹ Izrẹl che ze vwẹ usun rẹ izobo rẹ ufuoma rayen; ọye na izobo rayen kẹ Ọrovwohwo.

29Iwun efuanfon rẹ Erọn ke cha dia e rẹ emọ rọye re cha vwẹ obuko rọye, a me vwẹ ori ghworo ayen vwẹ evun rayen, a me je vwẹ ayen vwo mu vwẹ evun rẹ ayen rhe. 30Ọmọ rọ dia orherẹn vwẹ ẹdia rọye kọ ghwa ayen ẹdẹ ighwrẹn, vwẹ ọke rọ da rhe utughẹ ra da vwa oma na rọ da cha ẹga vwẹ asan ọfuanfon na.

31Wọ me rọye egbo rẹ evwomuo na; wo mi chere uvwo rọye vwẹ asan ọfuanfon na. 32Erọn vẹ emọ rọye ke re uvwo rẹ egbo na vẹ ikara re hẹ obere na, vwẹ anurhoro rẹ utughẹ ra da vwa oma na. 33Kẹ ayen re imu yena ra vwọ gọ egua no oma na, ra vwọ vwẹ ayen mu na re vwo ru ayen fon, ẹkẹvuọvo ohwo rẹ otafe sa re aye-en, kidie ayen pha fuanfon. 34Ọ da dianẹ uvwo re vwo muo na, eyẹ ikara na e hrọke, re te irhiọke, wọ me vwẹ erhanre torhẹ i ri chekọ na; a riọ-ọ fikiridie ọfuanfon.

35Enẹ kọye wo ru kẹ Erọn vẹ emọ rọye; kirobo re me ta kẹ wẹ ejobi; ẹdẹ ighwrẹn soso wọ vwẹ ayen mu, 36Kẹdẹ kẹdẹ kọye wọ vwọ vwẹ erhuẹn ze izobo rẹ umwemwu ra vwọ gọ ẹgua. Wo mi ji ze izobo rẹ umwemwu kẹ agbada na, vwẹ ọke wọ da gọ ẹgua no oma re wọ vwẹ ori ghworo; re vwo ruo fon. 37Ẹdẹ ighwrẹn wọ gọ ẹgua no oma kẹ agbada na, wo mi ruo fon, agbada na me dia obo re ma fon; kemu kemu ro te agbada na jọ fonro.

Ekpẹvwẹ re Kẹdẹ Kẹdẹ

(Ukeri 28.1-8)

38Asakiephana ọnana kọye obo ru wo ze vwẹ enu rẹ agbada na: upene rẹ ogodẹ ivẹ rẹ ẹgbukpe ọvo kẹdẹ kẹdẹ. 39Wọ me vwẹ upene rẹ ogodẹ ọvo ze vwẹ irhiọke, upene rẹ ogodẹ rivẹ kọye wo rhe vwo ze vwẹ ovwọnvwọn; 40wọ me rọye obere ihwe rẹ ọka ra nọre kugbe abọvo rẹ ukoko rẹ evwri re gberi vwọ ba omogodẹ rẹ ẹsosuọ na, kugbe ẹkẹn ẹne re ukoko rẹ udi ra jẹ kuotọ. 41Omogodẹ rivẹ na kọye wo rhe vwo ze vwẹ ovwọnvwọn, wọ me vwẹ izobo rẹ oka vẹ orẹ udi ra jẹ kuotọ vwọ ba, kerẹ ọ rẹ irhiọke ye, rọ gbo ọnrhe ororo rọ dia izobo rẹ erhanre kẹ Ọrovwohwo. 42Ọnana kọ dia izobo rẹ ẹtorhẹ kọke kọke vwẹ uvwiẹ wẹn vwẹ anurhoro rẹ utughẹ ra da vwa oma na vwẹ obaro rẹ Ọrovwohwo, asan re me vẹ owẹ da cha vwa oma, re me da ta ota kẹ wẹ. 43Etiyin Ma da cha vwa ihwo rẹ Izrẹl, ka cha vwẹ urinrin mẹ ruo fon; 44ki mi ru utughẹ ra da vwa oma na kugbe agbada na fon; Erọn vẹ emọ rọye ki mi ji ru ayen fon, rere ayen ga vwẹ kerẹ irherẹn. 45Ke me cha dia ohri rẹ ihwo rẹ Izrẹl, ke me dia Ọghẹnẹ rayen. 46Kẹ ayen cha riẹn nẹ Mẹvwẹ Ọrovwohwo Ọghẹnẹ rayen, rọ rọye ayen nẹ otọ rẹ Ijipt rhe rere mi vwo nene ayen dia; Mẹvwẹ Ọrovwohwo Ọghẹnẹ rayen.

Currently Selected:

Ẹyano 29: UBV77

Highlight

Copy

Compare