Ẹyano 28

Iwun rẹ Irherẹn na

(Ẹyano 39.1-3)

1Wọ me reyọ Erọn rẹ oniọvo wẹn, vẹ emọ rọye, nẹ ohri rẹ ihwo rẹ Izrẹl na, vwo te oma, rere ayen ga vwẹ kerẹ irherẹn. Erọn vẹ emọ rọye, Nadab vẹ Abihu, Eleaza vẹ Itama. 2Wo mi ko iwun efuanfon kẹ Erọn rẹ oniọvo wẹn na, rọ dia urinrin vẹ erhuvwu. 3Wọ me ta kẹ ihwo ri vwo ẹgba ejobi, ihwo re me vwẹ erhi rẹ iruo eruo kẹ, rere ayen ko iwun rẹ Erọn na re vwo ruo fon kẹ ẹdia rẹ orherẹn mẹ. 4Enana keye iwun rẹ ayen che ko, adja, ibuluku, adagba, ikoto ro kerẹ ipe, erhu, kugbe umuehu; ke ko iwun efuanfon vwọ kẹ Erọn rẹ oniọvo wẹn vẹ emọ rọye rere ayen ga vwẹ kerẹ irherẹn.

5Ayen me reyọ oro, ọgiọgiọ vẹ orhurhu vẹ ododo, vẹ esada ra nabọ me. 6Ayen me reyọ ibuluku rẹ oro, ọgiọgiọ vẹ orhurhu, vẹ ododo, kugbe esada ra nabọ me re bru ona phihọ. 7O mi vwo ẹbẹre ivẹ ra sa vwra orhọn rayen ivẹ, rere e se vwo rhuo ayen kugbe. 8Ufi ra nabọ rhuo phihọ na, re vwo churo na, ọ me je dia ekuakua ọvuọvo na e vwo ruo, ọ rẹ oro, ọgiọgiọ vẹ orhurhu vẹ ododo, kugbe esada ra nabọ me. 9Wọ me reyọ oragha ivẹ wo mi si edẹ rẹ emọ rẹ Izrẹl phihọ ayen, 10edẹ rayen esan vwọ oragha ọvo, edẹ esan ri chekọ vwọ oragha rivẹ, kirobo re vwiẹ ayen wan. 11Kirobo rẹ ohwo ro rue ivie bru ona phihọ na, ọtiọye wo che bru ona phihọ eragha na ivẹ wo mi bru edẹ rẹ emọ rẹ Izrẹl na phihọ; wo mi ku oga rẹ oro rhurhu ayen. 12Wo mi mu eragha na ivẹ na kpahe enu vwẹ igabọ rẹ ibuluku na, ro dia eragha rẹ ẹkarohọ kẹ emọ rẹ Izrẹl; Erọn ko mu edẹ rayen kpahe igabọ rọye vwo rhe Ọrovwohwo rọ vwọ dia ẹkarohọ. 13Wo mi ru oga rẹ oro ọvo, 14ojọnrọn rẹ oro ivẹ, ra chahere kerẹ eme; wo mi churu eme na mu oga na.

15Wo mi rhe ru adja rẹ ẹdjọeguo re bru ona phihọ; kerẹ ona re bru phihọ ibuluku na ọye wo ruo, oro, ọgiọgiọ vẹ orhurhu vẹ ododo, vẹ esada ra nabọ me. 16Igogo ẹne rọye me dia abavo ọ me je dia ivẹ, ugrogro rọye esabọ ọvo, ohẹhẹre rọye esabọ ọvo. 17Irhiẹ rẹ eragha ẹne wo mu phihọ. Urhiẹ ri sadiọs, topaz, vẹ carbunkol, ọye cha dia urhiẹ rẹsosuọ; 18urhiẹ rivẹ me rha dia ọ rẹ emerald, safirẹ, kugbe diamond, 19urhiẹ rerha me dia jacinth, agate, vẹ ametyst, 20urhiẹ rẹne me dia beryl, onyz, vẹ jaspa, e mi phi ayen phihọ oga rẹ oro na. 21Eragha ihwivẹ re cha dia dohwo dodẹ rọye, kerẹ unu rẹ emọ rẹ Izrẹl; ke cha dia kerẹ oka, ọvuọvo vẹ odẹ rọye, kirobo rẹ inurhoro ihwivẹ na epha. 22Wo mi duvwu ojọnrọn re meri kerẹ e me phihọ adja na, ọ rẹ oro dẹn; 23wo mi rhe duvwi isa ivẹ phihọ adja na, wo mi phi isa ivẹ rẹ oro phihọ akakọ ivẹ rẹ adja na. 24Wo mi rhe phi eme ivẹ rẹ oro na phihọ evun rẹ isa na vwẹ akakọ rẹ adja na; 25oba rẹ eme ivẹ na wo mi churu ayen mu awọ ivẹ rẹ oga na, ọtiọye na wọ me vwọ ya igabọ vwẹ obaro rẹ ibuluku na. 26Wo mi duvwu isa rẹ oro ivẹ, wo mi phi ayen phihọ akakọ ivẹ rẹ adja na, vwẹ akakọ vwẹ obo evun rẹ ibuluku na. 27Wo mi duvwu isa rẹ oro ivẹ, wọ me vwẹ ayen mu obotọ vwẹ obaro rẹ igabọ rẹ ewun rẹ udu na vwẹ asan orhuọn rẹ ejọjọ rẹ ibuluku na. 28Ayen mi churu isa rẹ adja na mu isa rẹ ibuluku na ufi ọgiọgiọ ọye e vwo churo, rere o she kpahe enu rẹ eme rẹ ibuluku na ra nabọ rhuo na, kugbe adja ro phieghe vwẹ enu rẹ ibuluku na. 29Ọtiọye na Erọn kọ cha ghwa edẹ rẹ emeshare rẹ Izrẹl vwẹ adja rẹ ẹdjeguo vwẹ udu rọye, vwẹ ọke ro de kpo ẹdia ọfuanfon na, rere ọ vwọ dia ẹkarohọ kẹ Ọrovwohwo kọke kọke. 30Vwẹ evun rẹ adja rẹ ẹdjeguo na wo mi phi Utẹ vẹ Agbragha phihọ, ke dia evun rẹ udu rẹ Erọn, vwẹ ọke ro de kpo obaro rẹ Ọrovwohwo; enẹ kọye Erọn ghwa ẹdjeguo rẹ ihwo rẹ Izrẹl vwẹ udu rọye vwẹ obaro rẹ Ọrovwohwo vwẹ ọke ejobi.

31Amwa rẹ ibuluku na ejobi me dia ọgiọgiọ. 32O mi vwo uphrophro rẹ vwo kuo phihọ uyovwi; a me nabọ gbẹvwẹ uphrophro na riariẹ phihọ, kerẹ asan ro rhie phihọ vwẹ adagba na, rere o vwo jẹ bẹrẹ. 33Vwẹ orhoma rọye na wo mi rhuo pomegranate rẹ ọgiọgiọ vẹ orhurhu vẹ ododo phihọ, wọ me gba igege rẹ oro phihọ akakọ rọye riariẹ; 34agogo rẹ oro vẹ pomegranate, agogo rẹ oro vẹ pomegranate yariẹ orhọn rẹ adagba na. 35Ọyena kọ dia oma rẹ Erọn siẹ ro de gbe odibo ke nyo edo rọye vwẹ asan ọfuanfon na siẹ ro de kpo obaro rẹ Ọrovwohwo na, vẹ asan rọ da yan phia, ọ dia ọtiọye-e o de rhe ghwu. 36Wọ me vwẹ omamọ rẹ oro vwo ru ọsete, wo mi bru ona phihọ, kerẹ oka ra vwọ tamu oravwọ, ọfuanfon kẹ Ọrovwohwo, 37wọ me reyọ ufi rẹ ọgiọgiọ vwo churo mu erhu na; ọ me dia obaro rẹ erhu na. 38Ọ me dia arhare rẹ Erọn, Erọn kọ ghwa abe ro nẹ evun rẹ izobo ọfuanfon rẹ ihwo rẹ Izrẹl na ru fon na kọ dia okẹ ọfuanfon; kọ dia arhare rọye kọke kọke, rere Ọrovwohwo vwọ sa reyọ ayen. 39Ko wo rhuo ewun rẹ esada ro kerẹ ipe, wo mi rhe ko erhu rẹ esada yoyovwi, wo mi rhe rhuo umuehu re bru ona phihọ.

40Wo mi rhe ko ewun vẹ umuehu vẹ erhu kẹ emọ rẹ Erọn; wo mi ru ayen ri mu urinrin ri ji vwo erhuvwu. 41Wo mi ku ayen phihọ Erọn rẹ ọniọvo wẹn, ọ vẹ emeshare rọye re vẹ ọye gba herọ, wọ me vwẹ ori ghworo ayen wo mu obọ kpahe ayen ru wo ru ayen fon, rere ayen ga vwẹ kerẹ irherẹn. 42Wo mi rhe ko ewun rẹ agada rẹ esada re vwo rhurhu ẹba rayen; o mi she nẹ ehun rẹ te ivuawọ; 43ke dia oma rẹ Erọn, vẹ emọ rọye, vwẹ ọke ro de kpo utughẹ ra da vwa oma na, eyẹ ọke rẹ ayen de che sikẹrẹ agbada na rhi gbe odibo vwẹ ẹdia ọfuanfon na; ọ rha dia ọtiọye-e ayen da rha ghwẹ abe phihọ oma rayen ayen de rhe ghwu. Ọnana kọ dia iji rhiri bẹdẹ vwọ kẹ vẹ ikrun rọye re cha vwẹ obuko rọye.

Currently Selected:

Ẹyano 28: UBV77

Highlight

Copy

Compare