Ẹyano 25

Izrẹl vwẹ Ekpẹvwẹ rhe

(Ẹyano 35.4-9)

1Ọrovwohwo da ta kẹ Mosis, 2Ta kẹ ihwo rẹ Izrẹl, rere ayen rọye izobo vwo rhe vwe; kohwo kohwo rẹ udu rọye rhọvwere ọye wo mie izobo rọye vwo rhe vwe. 3Ọnana izobo ru wo che mie ayen rhe vwe. Oro, idọnọ ọfuanfon vẹ odje, 4ọgiọgiọ vẹ orhurhu, isene vẹ esada ra nabọ me, ẹton rẹ ẹvwe, 5ophiẹn rẹ egbo re cheri, ophiẹn rẹ ẹvwe, ẹrọn, 6evwri rẹ irhukpẹ, egẹn re phihọ udẹ vwo ghworo vẹ ugboduma ri gbo ọnrhe ororo. 7Eragha eghaghare vẹ eragha rẹ ebabọn, vẹ ibuluku vẹ adja. 8Gbe jẹn ayen bọn ẹshẹ kẹ vwẹ, rere me dia uherevie rayen. 9Kirobo ri mi dje kẹ wẹ kpahe obo rẹ ọgarivi na cha dia, kugbe ekuakua ra vwọ rhuẹrẹ ejobi, ọtiọye wo che ruo.

Ekpeti rẹ Iseri na

(Ẹyano 37.1-9)

10Kẹ ayen kare ekpeti rẹ ẹrọn; kubit ivẹ gbẹ ubro vwẹ ugrogro, kubit ọvo gbẹ ubro ohẹhẹre, kubit ọvo gbẹ ubro kpenu. 11Ku wo vwẹ omamọ rẹ oro pharọ vwẹ evun te uphephẹ, ku wọ ma emama rẹ oro riariẹ phihọ. 12Wo mi duvwu isa rẹ oro ẹne phihọ re wo phi ayen phihọ awọ rọye ẹne na, isa ivẹ ẹbẹre ọvo rọye, isa ivẹ ẹbẹre rivẹ rọye. 13Wọ me kare ekpọ rẹ ẹrọn. Wọ me vwẹ oro phare ayen. 14Wọ me chọrọ ekpọ na phihọ uphrophro rẹ isa na re oma rẹ ekpeti na, keye e vwo mu ekpeti na. 15Ekpọ na ke dia evun rẹ isa rẹ ekpeti na, we siẹ ayen no-o. 16Wo mi phi phihọ evun rẹ ekpeti na iseri na ejobi re me cha vwọ kẹ wẹ na. 17Wọ me ma akpanurhe rẹ arodọvwe rẹ omamọ rẹ oro, ugrogro rọye kubit ivẹ gbẹ ubro, ohẹhẹre rọye kubit ọvo gbẹ ubro. 18Wọ me ma ehẹrobim ivẹ rẹ oro; a me nabọ duvwu ayen, vwẹ enyẹ ivẹ rẹ akpanurhe rẹ arodọvwe na. 19Ma chẹrobim ọvo phihọ ubienyẹ ọvo, wọ me rha ma ọvo phihọ ubienyẹ rivẹ; wo mi ru chẹrobim ivẹ na rẹ hẹ ẹnyẹ ivẹ na abavo phihọ akpanurhe rẹ arodọvwe na. 20Chẹrobim na ke riẹn ibekpe rayen phihọ obenu, ayen me vwẹ ibekpe rayen rhurhu akpanurhe rẹ arodọvwe na, ayen mi hirhe opharo ku ohwohwo; epharo ri chẹrobim na ivivẹ na ki ni akpanurhe re arodọvwe na. 21Wo mi mu akpanurhe rẹ arodọvwe na phihọ enu rẹ ekpeti na; wo mi rhe phi iseri na re me cha vwọ kẹ wẹn na phihọ evun rẹ ekpeti na. 22Etiyin kọye me vẹ owẹ da vwa oma, nẹ obenu rẹ akpanurhe rẹ arodọvwe na, nẹ uvwre ri chẹrobim ivẹ na re hẹ enu rẹ ekpeti rẹ iseri na, kẹ etiyin mi de nene uwe ta ota rẹ iji mẹ na ejobi re me vwọ kẹ ihwo rẹ Izrẹl na.

Imẹjẹ rẹ Ikara rẹ Opharo na

(Ẹyano 37.10-16)

23Wọ me vwẹ ẹrọn na kare imẹjẹ; ugrogro rọye kubit ivẹ, ohẹhẹre rọye kubit ọvo, enuẹra rọye kubit ọvo gbẹ ubro. 24Wọ me vwẹ omamọ rẹ oro vwọ pharọ, wọ me ma emama rẹ oro yariẹ. 25Wo mi hwe omophapha tẹrẹ yariẹ wọ me rha ma emama rẹ oro yariẹ ophapha na. 26Wo mi duvwu isa rẹ oro ẹne kẹ, wọ gba isa na phihọ akakọ ẹne rẹ awọ rọye ẹne na. 27Isa na mi bi kẹrẹ omophapha na, keye e che ku phihọ ekpọ na re che vwo mu imẹjẹ na. 28Wọ me vwẹ ẹrọn kare ekpọ na, wọ me vwẹ oro phare ayen, ena kọye e vwo mu imẹjẹ na. 29Wo mi ru isete vẹ idjikpo ra vwọ yọnrọn insens, vẹ ichago vẹ iko re vwo ku idi; omamọ rẹ oro wo vwo ru ayen. 30Ku wo phi ikara rẹ obaro phihọ enu rẹ imẹjẹ na kẹ vwẹ vwẹ ọke ejobi.

Ogburhukpẹ rẹ Oro na

(Ẹyano 37.17-24)

31Wọ me kare ogburhukpẹ rẹ oro. Te obotọ te ẹgbẹn rẹ obenu rẹ urhukpe na a me nabọ duvwo; iko rọye, vẹ ẹrhẹgbẹ rọye, idodo rọye e me dia oka ọvuọvo; 32eghọn esan ri nẹ oma rọye rhe, eghọn erha rẹ ogburhukpẹ na me tan nẹ ẹbẹre ọvo rhe; eghọn erha efa me rha tan nẹ abọ rivẹ rẹ ogburhukpẹ na rhe. 33Iko erha re ruru kerẹ orhomrẹ, ọvuọvo vẹ ẹrhẹghẹ vẹ idodo, vwẹ oghọn ọvo, vẹ iko erha re ruru kerẹ orhomrẹ ọvuọvo vẹ ẹrhẹghẹ vẹ idodo vwẹ eghọn rẹ ivẹ etiọye kọye eghọn esan na ri nẹ ogburhukpẹ na rhe epha; 34vwẹ enu rẹ ogburhukpẹ na hẹ iko ẹne rẹ ruru kerẹ almond herọ, vẹ ẹrhẹghẹ re ayen vẹ idodo, 35ẹrhẹghẹ na ẹbẹre ọvo vẹ ọye vwẹ otọ rẹ ivivẹ rẹ eghọn esan ri nẹ ẹdia rẹ ogburhukpẹ na rhe. 36Ẹrhẹghẹ rayen vẹ eghọn rayen vẹ ọye me dia abọvo, ejobi me dia ẹbẹre ọvo ra nabọ vwẹ omamọ rẹ oro duvwu. 37Wo mi rhe ru irhukpẹ ighwrẹn vwọ kẹ; a me vwẹ irhukpẹ na kpenu rere e vwọ sa la mu uphephẹ rẹ obaro rọye. 38Ahwa rọye vẹ etẹtẹ rọye me dia omamọ rẹ oro. 39Talent rẹ oro e vwo ruo, ọ vẹ ekuakua rọye ejobi. 40Wo mi ru ayen kirobo rẹ ayen epha, kirobo re djere kẹ wẹ vwẹ enu rẹ ugbenu na.

Currently Selected:

Ẹyano 25: UBV77

Highlight

Copy

Compare