Ẹyano 26

Ogarivi na

(Ẹyano 36.8-38)

1Ọ rọ marho, wọ me bọn ọgarivi wọ vwẹ emwa ihwe ra vwẹ omamọ rẹ esada ra nabọ me, ọgiọgiọ vẹ orhurhu vẹ ododo vwo ru, ra nabọ rhuo chẹrobim phihọ, ọye wo vwo ru ayen. 2Ugrogro rẹ amwa na ọvuọvo me dia kubit uje gbe ẹrenren, ohẹhẹre re amwa ọvuọvo me rha dia kubit ẹne, emwa na ejobi me dia ukuku. 3A me tan emwa iyori kugbe; iyori ri chekọ a me rha tan ayen kugbe. 4Wọ jẹ ugodo rẹ ọgiọgiọ phihọ egbẹn rọye rọ ka uphẹphẹ vwẹ obenu; ọtiọye rhe wọ je jẹ ugodo phihọ e re ka uphephe vwẹ abọ rivẹ rọye: 5igodo ujuvẹ gbẹ ihwe wọ jẹ phihọ amwa na vwẹ abọ rivẹ rọ ka enu, igodo na mi hirhe aro ku ohwohwo. 6Wo mi rue ahwa rẹ oro ujuvẹ gbẹ ihwe, wọ me vwẹ ahwa na vwọ tan emwa na ivẹ na kugbe rere ọgarivi na vwọ dia ọvuọvo.

7Wọ me rha rọye ẹto rẹ ẹvwe vwo ru amwa na rere e sio rhurhu ọgarivi na; emwa na uhwọvo ọye wo ru. 8Ugrogro rẹ amwa na ọvuọvo me dia kubit ujorha gbẹ ihwiori, ohẹhẹre rẹ amwa na ọvuọvo me dia kubit ẹne, emwa na uhwọvo na me dia ẹrhẹrhẹre. 9Wọ me tan emwa na iyori kugbe, wọ me rha tan esan ri chekọ kugbe, ọ resan kọye wo kpirhi ibrivẹ vwẹ obaro rẹ utughẹ na. 10Wo mi churu igodo ujuvẹ gbẹ ihwe phihọ urhie rẹ amwa na rọ ka uphẹphẹ vwẹ ẹko ọvo, igodo ujuvẹ gbe ihwe ọfa wo rhe churu phihọ urhiẹ rivẹ rọ ka uphẹphẹ vwẹ ẹko rivẹ. 11Wo mi ru ahwa rẹ ẹrovwo ujuvẹ gbe ihwe wo mi phi ahwa na phihọ igodo na, rere wo ku utughẹ na gbe rọ dia ọvuọvo. 12Ẹbẹre ro chekọ vwẹ amwa rẹ utughẹ na, ubro rẹ amwa na ro chekọ, ko phi rhurhu obuko rẹ ọgarivi na. 13Kubit rọ ẹbẹre ọvo, vẹ kubit rọ hẹ ẹbẹre rivẹ, ọ ro chekọ vwẹ ugrogro rẹ amwa rẹ utughẹ na ke phio rhurhu akakọ rẹ ọgarivi na vwẹ abọ nana vẹ abọ yena, rere orhurho. 14Wọ me vwẹ ophiẹn rẹ egbo vẹ ọ rẹ ẹvwe re cheri vwo rhurhu utughẹ na.

15Wọ me kare edọvi rẹ ẹrọn phihọ ọgarivi na. 16Kubit ihwe edọvi na kpenu te, kubit ọvo gbẹ ubro kọye ọ rha hẹre te. 17Wọ me san ako phihọ edọvi ọvuọvo, kọye e vwo ku ayen kugbe, kẹ ọtiọye wo ru phihọ edọvi rẹ ọgarivi na ejobi. 18Ku wo bru inurhoro phihọ ọgarivi na; edọvi uje wo phi phihọ obọrhe ọnre rọye; 19wo mi rhe phi usikẹ rẹ idọnọ ọfuanfon ujuvẹ phihọ. Obotọ rẹ edọvi uje na, usikẹ ivivẹ vwẹ otọ rẹ edọvi ọvuọvo, usikẹ ivivẹ ọfa vwẹ otọ rẹ edọvi ọvuọvo vẹ ako rọye. 20Vwẹ ẹbẹre rọ chekọ vwẹ ọgarivi na, vwẹ ẹbẹre rẹ obohwẹre ọnre, edọvi uje, 21usikẹ rẹ idọnọ efuanfon rayen ujuvẹ, usikẹ ivivẹ vwẹ edọvi ọvo, kugbe usikẹ ivivẹ vwẹ edọvi ọfa; 22vwẹ ubuko rẹ ọgarivi na, vwẹ obuko ọnre, ku wo ru edọvi esan phihọ. 23Wọ me kare edọvi rẹ oro ive phihọ akakọ rẹ ọgarivi na vwẹ obuko; 24wọ me hẹriẹ ayen vwe obotọ, imi rhe kugbe vwẹ obenu, vwẹ asan ugodo rẹ ẹsosuọ, etiọna kọye ayen ivivẹ na cha dia, akakọ ivẹ na. 25Edọvi ẹrenren ke cha dia, vẹ usikẹ rẹ idọnọ efuanfon rayen, usikẹ ihwe gbe esan; usikẹ ivẹ vwẹ obotọ rẹ edọvi ọvo, usikẹ ivẹ vwẹ obotọ rẹ edọvi ọfa.

26Ku wọ vwẹ ẹrọn bẹre egbẹn, 27iyori kẹ edọvi re ẹbẹre ọvo rẹ ọgarivi na, egbẹn iyori efa vwọ kẹ edọvi rẹ ẹbẹre rivẹ rẹ ọgarivi na, egbẹn iyori kẹ edọvi ri obuko rẹ ọgarivi na vwẹ obuko ọnre. 28Ogbẹn rọ uherevie vwẹ ugava rẹ edọvi na, ka rharhọ fi nẹ oba re te oba. 29Ku wọ vwẹ oro phare edọvi na riariẹ, wo mi churu adjugẹn rẹ oro mu egbẹn na rere a vwọ yọnrọn; wọ me vwẹ oro phare idjugẹn na. 30Wọ me bọn ọgarivi na kirobo re djere kẹ wẹ vwẹ enu rẹ ugbenu na.

31Wo mi ru oga rẹ ọgiọgiọ vẹ urhurhu vẹ ododo vẹ esada ra nabọ me, ra nabọ ru, ọ vi chẹrobim, 32wọ me vwọ ya ichivwo rẹ ẹrọn ẹne rẹ a vwẹ oro phare na, vẹ obọ rẹ oro ra sa phihọ e mi muo phihọ usikẹ ẹne ra vwẹ idọnọ efuanfon ru na. 33Wọ me vwẹ oga na ya ahwa na, wo mi mu ekpeti rẹ iseri na rọ evun re oga na rhe; oga na kọye hẹriẹ asan ọfuanfon na nẹ asan rọ ma fon na. 34Wo mi mu akpanurhe rẹ arodọvwe na phihọ enu rẹ ekpeti rẹ iseri na vwẹ asan rẹ ma fon na. 35Wọ me tan imẹjẹ na phihọ otafe rẹ oga na, e mi rhe mu ogburhukpẹ na phihọ obọrhe ọnre rẹ ọgarivi na ro hirhe aro ku imẹjẹ na; wo mu imẹjẹ na phihọ obọhwẹre ọnre. 36Wo me kare ọdjevwẹ phihọ anurhoro rẹ utughẹ na, ra vwẹ ọgiọgiọ vẹ orhurhu vẹ ododo vẹ esada ra nabọ me, ra vwẹ oruru rhuo. 37Wọ me kare ichivwo rẹ ẹrọn iyori, wọ me vwẹ oro phare ayen; wọ me san ako rẹ oro phihọ ayen, wo mi ru usikẹ rẹ ẹrovwo iyori kẹ ayen.

Currently Selected:

Ẹyano 26: UBV77

Highlight

Copy

Compare