Ẹyano 23

Ọsoso kugbe Abavo

1Wọ nẹ iyẹnrẹn rẹ efa-an. Wọ vẹ ohwo umwemwu dia obọ, rere wo se iseri rẹ eku-u. 2Wọ vwẹ ẹro kerẹ otu ri ruẹ imwemwu-u; eyẹ wo se iseri rẹ eku vwẹ ẹdjọ-ọ, wọ vwẹ ẹro kerẹ otu, rere wo ku ẹdjọ rhẹriẹ-ẹ, 3wọ ghwẹ oma abọvo rere wo guẹdjọ rhurhu ovwiogbere-e.

4Wọ da mrẹ erhuẹn rẹ ovweghrẹ wẹn yẹrẹ ekẹtẹkẹtẹ rọye ro ghwrẹ, reyọ rhivwi rhe. 5Wọ da mrẹ ekẹtẹkẹtẹ rẹ ohwo rẹ ivun wẹn miovwẹ rẹ oghwa rọye shenyẹ, wọ yan jovwo-o, wọ me cha uko vwọ kparọ vrẹn.

6Wọ rhẹriẹ orhiẹn rẹ ovwiogbere siẹ re de guẹdjọ-ọ. 7Tephe kẹ ẹdjọ rẹ eku, wo hwe ohwo ro rease vẹ ọvwata-a, kidie mi che siobọ nẹ ohwo umwemwu-u. 8Wọ ria udi-i, kidie udi rhuẹ ohwo ẹro, o mi rhe ku orhiẹn rẹ ọvwata rhẹriẹ. 9Wo shenyẹ ọrhorha-a; wọ riẹn udu rẹ ọrhorha, fikiridie ovwan je dia erhorha vwẹ otọ rẹ Ijipt: dẹvure.

Edidjala rẹ Egbukpe kugbe Edidjala dẹn

10Ikpe esan wọ vwọ kọn otọ wẹn wo mi rhe vun obo re djẹ norhe; 11ẹkẹvuọvo ukpe righwrẹn ye wo mi gbe ukpe phihọ, rere ivwiogbere rẹ otọ na vwọ mrẹ re; obo rẹ ayen re chekọ eranvwe rẹ aghwa rha mrẹ re. Ọtiọye wo ji ru kẹ ogba ri vain wẹn, kugbe ogba rẹ oliv wẹn.

12Ẹdẹ esan wo vwo ru iruo wẹn, ẹkẹvuọvo ẹdẹ righwrẹn ku wo rovwo oma; rere erhuẹn wẹn vẹ ekẹtẹkẹtẹ wẹn vwo rovwo oma, rere ọmọshare rẹ ọviẹn aye wẹn, vẹ ọrhorha wẹn vwọ mrẹ asan de ku ẹnwẹ. 13Kerhọ rẹ obo rẹ me ta kẹ wẹ na ejobi; wo se odẹ rẹ edjọ efa kaka-a yẹrẹ wo je nyo ọtiọye na vwẹ unu wẹ-ẹn.

Orẹ Erha re vwo Mu

(Ẹyano 34.18-26; Urhi Rivẹ 16.1-17)

14Asiarha ẹgbukpe wa re orẹ kẹ vwẹ. 15Wa re orẹ rẹ ikara ro jephuo; kirobo ri mi ji urhi kẹ wẹ na, wọ re ikara ro jephuo ẹdẹ ighwrẹn vwẹ ọke re bru phihọ na vwẹ emeranvwe rẹ Abib, kidie vwẹ evun rọye wo vwo nẹ Ijipt rhe. Ohwo ọvuọvo cha vwẹ oma phia kẹ vwẹ ababọ-ọ. 16Wọ me re orẹ rẹ orhọ, orẹ rẹ emamọ rẹ ẹsosuọ rẹ owian wẹn, ọ rẹ emu ru wọ kọn phihọ udju. Wọ me rha rẹ orẹ rẹ ọke ra da ghwẹ emu kpo erhu vwẹ oba rẹ ukpe vwẹ ọke ru wọ da ghwẹ emamọ rẹ owian wẹn koko nẹ evun rẹ aghwa rhe. 17Asiarha ẹgbukpe ọye eshare wẹn ejobi vwẹ oma phia kẹ Ọrovwohwo Ọghẹnẹ.

18Wọ vwẹ ikara ro phuru ba ọbara rẹ izobo mẹ-ẹ, eyẹ wo jẹ ivwri rẹ orẹ mẹ phrọke-e. 19Omamọ rẹ ẹsosuọ rẹ otọ wẹn na wọ me rọye vwọ rhe uwevwi rẹ Ọrovwohwo rẹ Ọghẹnẹ wẹn. Wọ vwẹ ame rivie rẹ oniẹvwe vwo chere ọmọ rọye-e.

E ji Amakashe rẹ Ọrovwohwo nẹ o rhi Sun Izrẹl

20Nighe, Mi jẹ amakashe ka obaro kẹ wẹ, ro sun we vwẹ idjerhe na rọ rọye owẹ te asan re me rhuẹrẹ kẹ wẹ. 21Kerhọ rọye wo de nyo urhuru rọye, wo muẹ kpahọ-ọ, kidie ọ cha vwẹ oruchọ wẹn ghovwo uwe-e; kidie odẹ mẹ evun rọye. 22Ẹkẹvuọvo wọ da vwẹ oma kpotọ wo de ru obo re me tare ejobi, ke me dia ovweghrẹ kẹ lvwighrẹ wẹn ukọn vwọ kẹ ihwo ri mu kpahe owẹ.

23Ọke rẹ amakashe mẹ da ka obaro kẹ wẹ, rọ da rọye owẹ rhe vwa ihwo rẹ Amọr vi Het, vi Pẹriz, vi Kenan, vi Hiv, vi Jebus, ri mi de phoro odẹ rayen nu, 24wo rhe shiguẹ kẹ edjọ raye-en, eyẹ wọ ga aye-en, eyẹ wo ru kirobo rẹ ayen ruẹ-ẹ, ẹkẹvuọvo wo mi gere ayen she tototo wo mi hwe osunsun rayen ivwivwuvwu. 25Wọ me ga Ọrovwohwo Ọghẹnẹ wẹn, ki mi bruphihọ ikara wẹn vẹ ame wẹn; ki mi si emiavwe nẹ ohri wẹn. 26Evun gbi she ne ohwo ọvuọvo awọ-ọ yẹrẹ ohwo ọvuọvo gbe cha dia ẹga vwẹ otọ wẹn na-a: ẹdẹ mi bru kẹ wẹ na ku wo yere gba dẹndẹn. 27Ke me cha vwẹ uguegue mẹ ka obaro kẹ wẹ, kọ cha ghwẹ ọyanghan phihọ ihwo re wọ cha vwa ejobi, ki mi che ru ivwighrẹ wẹn ejobi chuko ku we. 28Ki mi ji iro mẹ ka obaro kẹ wẹ, e re cha djẹ ihwo ri Hiv, vi Kenan, vi Het, nẹ obaro kẹ wẹ. 29Ọ dia ẹgbukpe ọvo me cha vwọ djẹ aye-en, otọ na da rhe dia ofefe eranvwe rẹ aghwa de rhi bunọ ri de rhi kpokpo ovwan. 30Ememerha me cha djẹ ayen nẹ obaro rẹ ovwan, bẹsiẹ we vwo bu nọ ayen ri we de vwo otọ na. 31Ke me cha vwẹ ughwru rẹ ovwan vwo mu nẹ Abadi ọvwavware na re te Abadi ri Filistia nẹ aton na re te Yufretis; kidie mi che phi ihwo rẹ otọ na phihọ obọ wẹn, ke wọ cha djẹ ayen nẹ obaro wẹn. 32Wọ vẹ ayen re ọphọ-ọ eyẹ edjọ raye-en. 33Ayen cha dia otọ wẹ-ẹn, ayen da nẹrhẹ owẹ ru imwemwu kpahe ovwẹ; kidie wọ da ga edjọ rayen, ke me cha dia ufi kẹ wẹ.

Currently Selected:

Ẹyano 23: UBV77

Highlight

Copy

Compare