Ẹyano 22
22
Urhi kpahe Ẹrhan Rhivwi
1Ohwo de cho erhuẹn yẹrẹ ogodẹ o de hwe yẹrẹ ọ da shẹ, kọ hwa irhuẹn iyori vwẹ enu rẹ erhuẹn ọvo na, igodẹ ẹne vwẹ enu rẹ ogodẹ ọvo. Kọ hwa osa rọye, o rhẹ vwo emuọvo-o, ka shẹ fiki rẹ uji rọye.
2Ọ da dianẹ a mrẹ eranvwe rẹ e chori na ọkpokpọ vwẹ obọ rọye, ọ da dia erhuẹn yẹrẹ ekẹtẹkẹtẹ yẹrẹ ogodẹ kọ hwa ọhwọhwivẹ.
3A da mrẹ oji rọ tọn uwevwi, a da teyọ ro de ghwu, o vwo abe rẹ ọbara kẹ-ẹ; 4ẹkẹvuọvo ọ da dianẹ ọnre da varhe vwẹ ẹnu rọye, abe rẹ ọbara kọ dia kẹ.
5Ohwo da vwẹ eranvwe re odi vwẹ udju ri vain eyẹ o de siobọ nẹ eranvwe rọye ra ghwọrọ vwẹ udju rẹ ohwo ọfa, kọ vwẹ eranvwe ro me yovwi vwẹ ogba rọye kugbe ekakọn ro me yovwi vwẹ udju rẹ vain rọye hwa osa rọye.
6Erhanre de mu torhẹ rọ da ra la ro erhu yẹrẹ eka ri mudia yẹrẹ aghwa da torhẹ, ohwo ro koko erhanre na phihọ ko hwa osa roye gba.
7Ohwo da vwẹ igho yẹrẹ ekuakua kẹ ọrivẹ rọye yọnre, e de cho vwẹ uwevwi rẹ ohwo na, e de mu oji na kọ hwa osa rọye ọhwọhwivẹ. 8A rha mrẹ oji na-a, ohwo ro vwo uwevwi na ko si kẹrẹ Ọghẹnẹ ro dje phia se o vwo obọ vwẹ ekuakua rẹ ọrivẹ rọye na.
9Vwẹ emu kemu rẹ ephianphiẹn ejobi, ọ da dia erhuẹn, eyẹ ekẹtẹkẹtẹ, ogodẹ, amwa, eyẹ ọ ri kemu kemu ro ghwuru, rẹ ohwo na ọvo da ta, ọnana ọye, ẹdjọ rẹ ihwo na ivẹ na ki bru Ọghẹnẹ rhe; ohwo rẹ Ọghẹnẹ bru orhiẹn hwe kọ hwa ọtiọye akuava kẹ ọrivẹ rọye. 10Ohwo de mu ekẹtẹkẹtẹ eyẹ erhuẹn eyẹ ogodẹ eyẹ oka rẹ eranvwe ọfa kẹ ọrivẹ rọye o de ghwu yẹrẹ ọ da wan oma eyẹ ọ da djẹ ghwru ohwo ọvuọvo mrẹrẹ-ẹ, 11ayen ivẹ na kẹ vwẹ Ọrovwohwo duvwu iyori sẹ ọ vwẹ obọ te emu rẹ ọrivẹ rọye; ọ ro vwo emu na me rhọvwe iyori na, ọ gbe rha hwa rhivwi-i. 12Ẹkẹvuọvo e de rhe cho mie, ọ me hwa kẹ ọrovworo. 13Eranvwe da riọ, jo muo rhe ra mrẹ, ọ rha cha hwa osa rẹ obo rẹ eranvwe na rere-e. 14Ohwo de momo emu mie ọrivẹ rọye, ọ da wan oma eyẹ o de ghwu, ọ ro vworo gbe rha etiyi-in, kọ hwa osa rọye gba. 15Ọ da dianẹ ọ hẹ obọ rẹ ohwo ro vworo, ọ gbe rha hwa osa rọye-e, ọ da dianẹ ayaerọ, jẹ o rhere fiki rẹ eyarọ rọye.
Irhi rẹ Uruemu kugbe Egagọ
16Ọshare da riẹriẹ ọmọtobẹ ra je saotọ-ọ; o de nene vwerhẹ, ko ru emu rẹ orọvwe kẹ, rere ọ dia aye rọye. 17Ọsẹ rọye da sẹn nẹ ọ rọvwọ-ọ, ọshare na kọ hwa igho uchunu re ruẹ phihọ ọmọtobẹ vwọ kẹ.
18Wo jẹn ọbuepha vwo rẹ ọ dia akpọ-ọ.
19Ohwo ro nene eranvwe vwerhe ke hwe ghwu.
20Ohwo ro ze izobo kẹ ọghẹnẹ ọfa, jokpa rẹ Ọrovwohwo na ọvo ka guọghọ tototo.
21Wo ruẹ ọrhorha obo re chọre-e eyẹ wo shenyẹ-ẹ, kidie ovwan je dia erhorha vwẹ otọ rẹ Ijipt vẹrhe re. 22Wo kpokpo ayeuku-u eyẹ omophrorivwi-i. 23Wo de kpokpo ayen rẹ ayen de kperi se vwe, Mi che nyo oviẹ rayen; 24ophu me kọ tua, ke me vwẹ ọlọkọ hwe we, eya wẹn ke cha dia eyauku emọ wẹn gbi che vwo esẹ-ẹ.
25Wo de momo igho kẹ ohwo ọvo vwẹ ihwo mẹ na rọ dia ogbere, wọ gbe dia kerẹ omomigho kẹ-ẹ, wo ji suẹn kẹ-ẹ. 26Ọ da dianẹ ọrivẹ wẹn vwẹ ewun viẹ ẹwan kẹ wẹ, reyọ vwọ kẹ tavwe rẹ ọnre ke ruotọ; 27kidie ọye ọvo o vwo phopho, ọye amwa rẹ oma rọye, ki didi emu ọ vwọ vwerhẹ? O de kperi se vwe, Mi nyo kẹ, fikiridie Me vonre vẹ ehrọre.
28Wọ jẹ Ọghẹnẹ fia-a, yẹrẹ wọ harhe osun rẹ ihwo wẹ-ẹn. 29Wo jo krẹ wọ ke vwẹ orhọ wẹn vẹ obuebu rẹ udi wẹn vwọ kpẹvwẹ Ọrovwohwo-o.
Ọmọshare rẹ otuvwiẹ wẹn wọ vwọ kẹ vwẹ. 30Ọtiọye wọ je vwẹ irhuẹn wẹn ru vẹ ogodẹ wẹn; ẹdẹ ighwrẹn o che nene oni rọye dia; ẹdẹ rẹ ẹrẹnre wọ me vwọ kẹ vwẹ.
31Wa dia ihwo re ruru fuanfon kẹ vwẹ; fiki rẹ ọtiọye na wa ria eranvwe rẹ eranvwe hweri vwẹ aghwa-a; muo kẹ eranko.
Currently Selected:
Ẹyano 22: UBV77
Highlight
Copy
Compare
Share
Want to have your highlights saved across all your devices? Sign up or sign in
Bible in Urhobo © United Bible Societies, 1977.
