Ẹyano 21

Obo ra Yọnre Eviẹn wan

(Urhi Rivẹ 15.12-18)

1Asakiephana enana ẹgha ru wo che keri kẹ ayen. 2Wọ da dẹ ọviẹn ri Hibru, ọ me ga ikpe esan, ọ rẹ ighwrẹn yẹ e mi siobọ no kpo ọphẹ. 3Ọ da dia ọye ọvo rhere, ọye ọvo ri ji kpo; ọ da dianẹ o vwo aye nu rọ ke rhe, aye rọye ko ji nene kpo. 4Onini rọye da vwẹ aye kẹ o de vwiẹ emeshare vẹ emetẹ kẹ aye na vẹ emọ rọye ke rẹ onini rọye ọye ọvo kọye kpo. 5Ẹkẹvuọvo ọviẹn na da ta phia nẹ, Me guọnọ onini mẹ, aye mẹ, vẹ emọ mẹ, mi se kpo ọphẹ-ẹ, 6etiyin onini rọye kọ rọye vwo rhe Ọghẹnẹ, ọ me rọye rhe anurhoro eyẹ ẹchẹ rẹ uwevwi na, onini rọye me vwẹ isapara rharhe erhọn rọye, kọ ga bẹdẹ.

7Ọke rẹ ohwo da shẹ ọmọtẹ rọye kpo ọviẹn, o rhe se kpo ada kirobo rẹ eviẹn rẹ eshare ruẹ-ẹ. 8Ọ da dianẹ o gbi rhe ru obo ri je onini rọye-e, rọ reyerọ kẹ oma rọye-e, o mi jovwo rere a tan; o vwo ogangan ọvuọvo rọ vwọ shẹ kẹ ọrhorha-a, kidie ọ rovwerọ beku nure. 9Ọ da dianẹ ọ vwe rọ kẹ ọmọshare rọye nẹ ọ vwọ rọvwọ, ọ vẹ ọye ki yeri kerẹ ọmọ vẹ ọsẹ. 10Ọ da rọye aye ọfa, e jo siẹnẹ emuọre rọye-e, amwa rọye, eyẹ ogangan rẹ aye ro rhere jovwo e jo ghwrẹ-ẹ. 11O gbi rhe ru emu nana erha na kẹ-ẹ, ọ me yan jovwo kpo ọphẹ, ọ gbe hwa igho ọvuọvo-o.

Urhi kpahe Ohwo ro Gbe Ozighi

12Ohwo kohwo rọ teye ohwo o de ghwu, ohwo yena e mi hwe ghwu. 13Ẹkẹvuọvo ọ da dianẹ ọ hwa phihọ hẹrhẹ-ẹ, ẹkẹvuọvo Ọghẹnẹ ruro ro de she phihọ obọ, ki mi che dje asan rọ cha djẹ ra kẹ wẹ. 14Ẹkẹvuọvo ọ da vwẹ arudo vẹ ọnko vwo hwe, we mi sionẹ agbada mẹ, rere o ghwu.

15Ohwo rọ teyọ ọsẹ rọye yẹrẹ oni rọye ka teyọ hwe.

16Ohwo ro cho ohwo, owenẹ ọ shẹrẹ eyẹ a mrẹrẹ vwẹ obọ rọyee je hwe ghwu.

17Ohwo rọ harhe ọsẹ eyẹ oni rọye ka teyọ hwe.

18Ihwo da kọ unu ọvo da rọye oragha vwọ teye ọrivẹ yerẹ obọ ọ vwọ teyọ ẹkẹvuọvo ohwo na ghwuru-u, rọ da woma; 19ohwo na de vrẹn kẹ ọkpọ kọye ọ vwọ yan kpo asan ejobi jẹ ota nẹ ọ rọ teyerọ na oma; ọke rọ ghwọre ọvo kọye ọ hwa osa rọye, ọ me rha nabọ sivwo.

20Ohwo da ghwiẹ ọviẹn rọye rẹ ọshare yẹrẹ ọ rẹ aye ro de ghwu ghene, e mi gboja kẹ re. 21Ẹkẹvuọvo ọviẹn na da dia ẹdẹ ọvo yẹrẹ ivẹ, e gbi hwe-e; kidie ọviẹn na igho rọye.

22Ihwo da họnra, ayen da wan aye vẹ evun oma, rẹ evun na de she nu, je emu rọ brare ọfa ruro-o, e mi ho ohwo rọ wanrọ oma na kirobo rẹ ọshare rẹ aye na tare nẹ ọ hwa, ọ me hwa kirobo rẹ iguẹdjọ na tare. 23Emu rọ brare de ruo, ọke yena a me vwẹ arhọ hwa osa rẹ arhọ, 24ẹro hwa osa rẹ ẹro, ako hwa osa rẹ ako, obọ hwa osa rẹ obọ, owọ hwa osa rẹ owọ, 25ẹtorhẹ hwa osa rẹ ẹtorhẹ, omẹwan hwa osa rẹ omẹwan, oka hwa osa rẹ oka.

26Ohwo da ghwiẹ ẹro rẹ ọviẹn rọye rẹ ọshare yẹrẹ aye, ro de rhu, ko siobọ nẹ ọviẹn na kpo ọphẹ fiki rẹ ẹro na. 27Ọ da teyọ ako rẹ ọviẹn rọye rẹ ọshare yẹrẹ ọ rẹ aye kpare nu, ko siobọ no kpo ọphẹ fiki rẹ ako na.

Urhi kpahe Obo rẹ Ohwo ro vwo Oviẹn ru

28Erhuẹn de dje ọshare yẹrẹ aye ghwu, ke phi erhuẹn na hwe, ẹkẹvuọvo a ria oma rọyee; ẹkẹvuọvo obọ rẹ ohwo ro vwo erhuẹn na nuro. 29Ẹkẹvuọvo erhuẹn na de rhe dje ihwo hwe vẹrhẹ ra da vuẹ ohwo ro vworo ro gbi rhe churo vwẹ uwevwi-i, o de hwe ọshare yẹrẹ aye, ke phi erhuẹn na hwe, e mi ji hwe ohwo ro vworo ghwu. 30A da tanẹ ọ tan, kemu kemu ra tanẹ ọ hwa kọye ọ hwa vwọ tan oma rọye. 31Ọ de dje ọmọshare yẹrẹ ọmọtẹ rẹ ohwo ọfa ghwu kerẹ urhi nana kọye eruo nene. 32Erhuẹn na de dje ọviẹn ọshare yẹrẹ ọ rẹ aye, ohwo ro vworo me hwa shekẹl ọgban rẹ idọnọ kẹ onini rọye, e mi rhe phi erhuẹn na hwe.

33Ọke re ohwo de rhie ọgọdọ, eyẹ ohwo da tọn ọgọdọ yo rhurhuro-o, rẹ erhuẹn yẹrẹ ẹkẹtẹkẹtẹ de she phihọ, 34ohwo ro vwo ọgọdọ na kọ hwa osa rọye; kọ vwẹ igho kẹ ọ ro vworo, eranvwe oghweghwu na kọ dia ọrọye.

35Erhuẹn rẹ ohwo ọvo da wan erhuẹn rẹ ọrivẹ rọye oma, o de ghwu, ka shẹ erhuẹn ọkpọkpọ na ayen me ghare igho rọye, ayen ke je ghare erhuẹn oghweghwu na. 36Yẹrẹ a da rha mrẹ vughe nẹ erhuẹn na ko dje ihwo vẹrhẹ, jẹ ohwo ro vworo rhe churo vwẹ uwevwi-i, kọ vwẹ erhuẹn hwa osa rẹ erhuẹn, eranvwe re oghwuru na ko muo rọye.

Currently Selected:

Ẹyano 21: UBV77

Highlight

Copy

Compare