Ẹyano 17

Ame nẹ Oragha rhe

(Ukeri 20.1-13)

1Ukoko rẹ ihwo rẹ Izrẹl na ejobi da yan nẹ aton ri Sin ekuẹko, kirobo rẹ Ọrovwohwo tare, ayen de mu erhọn phihọ Rẹfidim ẹkẹvuọvo ame gbe rha herọ rẹ ihwo na da-a. 2Fiki rẹ ọtiọye na ivun ri Mosis ko miovwi ihwo na, ayen da ta, Kẹ avwanre ame da. Mosis da ta kẹ ayen, Die we vwo duota mẹ? Die wa vwọ davwẹ Ọrovwohwo nẹ? 3Ẹkẹvuọvo urhuru rẹ ame de hwe ihwo na vwẹ etiyin, ihwo na de gun Mosis, ayen da ta, Die wọ vwọ reyọ avwanre nẹ otọ rẹ Ijipt rhe, rhe vwọ vwẹ urhuru rẹ ame hwe avwanre vẹ emọ rẹ avwanre kugbe uchuru rẹ avwanre? 4Etiyin Mosis de kperi se Ọrovwohwo, Die me vwẹ ihwo nana ru? Ayen choma re ayen vwo phi vwe hwe. 5Ọrovwohwo da ta kẹ Mosis, Ka obaro kẹ ihwo na, wọ reyọ ekpako rẹ Izrẹl na evo nene oma, wọ reyọ ọkpọ re wọ vwọ teye Nile na, wọ yanran. 6Nighe, Mi che mudia vwẹ obaro wẹn vwẹ asan oragha vwẹ obi Horẹb; ku wọ teye oragha na, ame ko che nẹ evun rọye rhe, rere ihwo na da. Mosis de ru ọtiọye, vwẹ irharo rẹ ekpako rẹ Izrẹl na. 7O de se odẹ rẹ asan na Masa kugbe Meriba, fiki rẹ ivun emiovwo rẹ emọ rẹ Izrẹl na, kugbe fiki rẹ Ọrovwohwo rẹ ayen davwi ni tanẹ, Ọrovwohwo ohri rẹ avwanre vwẹ etiyin na gbene ọ herọ-ọ?

Ayen vẹ Amalẹk Phi Ofovwi

8Etiyin Amalẹk de rhi nene Izrẹl họnre vwi Rẹfidim. 9Mosis da ta kẹ Joshua, Jẹ ihwo kẹ avwanre, wa yanran, ra họnre Amalẹk; odẹ rọ cha mi che mudia vwẹ obenu rẹ ugbenu na vẹ ọkpọ rẹ Ọghẹnẹ vwẹ obọ mẹ. 10Etiyin Joshua de ru kirobo ri Mosis ta kẹ na, o de nene Amalẹk họnre; Mosis, vẹ Erọn te Họ, de kpo enu rẹ ugbenu na. 11Mosis da kpare obọ rọye kpenu, Izrẹl me kparobọ, ọ da rha vwẹ obọ kpotọ, Amalẹk me kparobọ. 12Ẹkẹvuọvo abọ da rhe rhọ Mosis kọye ayen de mu oragha vwọ obotọ rọye, o de tidia enu rọye, Erọn vẹ Họ da kpare abọ rọye kpenu, ọvo ẹbẹre nana, ọvo ẹbẹre rivẹ; ọtiọye abọ rọye da kpọvi re te ọke rẹ ọnre vwọ ro otọ. 13Etiyin Joshua da rọye ọlọkọ vwọ nyavwe Amalẹk kuotọ.

14Ọrovwohwo da ta kẹ Mosis, Si ọnana phihọ ọbe re ọ dia ekarohọ rere wo se ki Joshua nyo tanẹ, mi che phoro ekarohọ rẹ Amalẹk nẹ otọ rẹ odjivwu na. 15Mosis da so agbada o de se odẹ rọye, Ọrovwohwo aphiana mẹ, 16tanẹ, Obọ vwẹ enu rẹ aphiana rẹ Ọrovwohwo na. Ọrovwohwo che nene Amalẹk phi ofovwi nẹ uvwiẹ re te uvwiẹ.

Currently Selected:

Ẹyano 17: UBV77

Highlight

Copy

Compare